Jamita malam natal 2021 (Psalmen 147:1-11)

Endehon Ma Jahowa

(Psalmen 147:1-11)

Huria ni Tuhan na hinaholongan dibagasan Jesus Kristus,

Selamat ari natal ma dihita saluhutna!

Tahalashon do naung boi hita patupahon ibadah parningotan di ari hatutubu ni Jesus huria nang dihuta pe, dung nataon nasalpu dang boi tapatupa hinorhon ni panosak ni Korona. Alani i, tung adong do surung na panghilalaan taon on na manghalashon ari natal on! Hera naung sombu uas rupani, dakdanak Sikkola Minggu pe nungga boi marnatal natape dengan protocol kesehatan jala dipatupa dua sesi. Ido alana patut ma hita mangauhon panjouon ni tema ni malam natal on Endehon ma Jahowa!

Ragam do alasan ni jolma dihasiangan on marende. Di endehon jolma o rura Silindung, inganan parminaanta on, hinorhon ni uli na, suang songon i nang Tao Toba pe. Alai di endehon jolma do nang arsakna, diendehon do hamonanganna, hamalumonna sian parsahitton, dlan. Antong borngin on aha do alana binna dijou hita mengendehon Jahowa? Mangihuthon turpuk borngin on Psalmen 147:1-11 parendeonnta di Jahowa didasorohon tu huaso ni Debata sitompa jala sipalua portibion. Molo tahalashon ari hatutubu ni Jesus bongin on songon dalanNa paluahon hita dang boi tarsirang hita sian huasona na manompa langit dohot tano. Asa karya penebusan tidak bisa lepas dari karya penciptaan Alah.

Malam Natal : Endehon ma Jahowa di hatimbulonna ai Ibana Sitompa ho

Huria ni Tuhan na hinaholongan dibagasan Jesus Kristus,

Jou-jou mangendehon Jahowa tung mansai tangkas do taida di turpuk on. Songon pesalmen haleluyah, dipungka ja dipaujung do psalmen 147 on marhite hata Haleluyah namarlapatan pujima Jahowa. Asa sian na mamungka sahat tu na mangujungi pardalanan ni ngolu tama do hita mamuji Debata. Mangendehon Jahowa boi do pangke alat isarana hasapi (ay. 7) alai boi do holan marende sambaing, isarana markoor, dlan.  Sian pengalaman ni parpesalmen do ungkap rohana laho mamuji Debata. Hombar tu hatorangan ni angka pande bisuk, psalmen on digurithon dung mulak halak Israel sian habungan Babel. Asa natape hea nasida mandalani paruhuman, haberniton, tartait sian tanona, alai dang tung i mambabahen parpesalmen so mamuji Debata. Dipungka do turpuk on marhite napatuduhon na tung mansai denggan jala tama do pujion Debata. Didok rupani: Haleluya! Ai denggan do endehononton Debatanta, ai hasudungan do Ibana tama pujipujion (1).

Ragam do diturpuk on dasor ni pamujion alai jumolo ma taida na ingkon taparhatopot do na Debata na jumadihon hita nang saluhut na adong dihasiangan on. Somal do, pamujion sisongon i taida dingolu siganup ari, molo tapangan kue natal isarana nastar na lembut jala tabo pintor tapuji do ise namambahen kue i, “malo nai poang sibahen kue on”, ninna rupani. Dijou bangso i nang hita mamuji Debata ala Timbul do Tuhanta i jala pargogo situtu, dang habilangan parbinotoaanna i (5). Dang adong na holip sianparbinotoaana termasuk ma parsorionta. Hinorhon ni huaso nang parbinotoaanna di tompa do nasa na adong  Ibana umbilang torop ni angka bintang, dijou do goarnaside sudena (4). Ise ma na talup mamilangi godang ni bintang di langit dungkon ni Ibana na manompasa? Hea do tingki dakdanak iba rupani, didok dongon manungkun “sadia ma godang ni bintang na dilangitan?” Samilliar”, ningku. “Boai ai, siandia di boto?” Ninna mangalusi. Dungi hudok ma antong, “molo soporsea ho ba etong sandiri ma”, dungi mangupir ma ibana. Ala dang adong jolma na boi mangetong i dungkon ni Debata sandori. Ndada patut Ibana pujion namanopa jala naumboto goarnasida?

Molo talup do Debata manompa, mamilangi, jala manjou goar ni bintang i, talup do nang ibana manopa, mamilangi jala manjou goarta ganup. Tung boa pe kondisi fisik nang psikista nuaeng on, ingot ma tompaan ni Debata do ho. Dang holip ngolunta on rap dohot saluhut pargulmitonna, silasniroha nang arsakta pe sian Debata. Ido alana sipujion jala siendehononta ma Debata di las niroha nang arsak pe. Lumobi ma di malam natal on natapajojor nang pambahenonna mulai sian panompaon sahat tu hasosorangNa. Tapatuduhon ma pamujionta di ari natal on marhite na tutu situtu hita tompaanNa, patuduhon dingolu siganup ari kualitas hidup dan karakter ni Debata. Mangolu ma hita dibagasan roha biar maradophon Debata ai dihalomohon roha ni Jahowa do angka na manghabiari Ibana, angka na manghalungunton asi ni rohana (11).

Malam Natal: Endehon ma Jahowa ai Ibana do silehon ngolu jala na sumarihon ho.

Huria ni Tuhan na hinaholngan dibagasan Jesus Kritus,

Molo taendehon Jahowa ala ibana si panompa, ingkon endehononta do na Jahowa do silehon hangoluan jala na sumarihon hita.  Debata dibagasan huaso nang parbinotoaan na sun balga i do naparade nasa na ringkot ni ngolu ni na tinompaNa. Ibana do na mangaturhon siklus makanan ni angka tompaan di portibion. Diparade do udan asa martumbur angka duhut duhut nang suan suanan (8). Dilehon do nang sigagaton ni angka pinahan nang sipanganon ni angka pidong na ngoakngoak (9). Saluhut binatang disarihon do sipanganonna. Haru pidong na nimaksudna dison ima burung gagak, ima pidong na najis (pat. 3 Musa 11: 15) tong disarihon Debata. Lam hita jolma na hinaholonganNa?

Taida jala tadai do na tong dilehon Debata ngolu dihita natape mangadopi ragam ni hamaolon hinorhon ni Korona. Disarihon do hita natape ragam angka pembatasan namasa, maol do perekonomian, godang sundat angka ulaon, habot do rohanta diparmonding ni angka sisolhotta jala dang boi patuapaon acara na patut tu nasida. Alai, dang adong dope nanggo sada naso mangan hinorhon ni Korona on, dang adong annggo sada hita ruas ni huria on na binege barita na mate hinorhon ni naso dapot managan be. Dison ma tung ingkon talup hita mangendehon Jahowa ai disarihon do hita rasirasa sadarion.

Malam Natal : Endehon ma Jahowa ai Ibana na paluahon ho

Huria ni Tuhan na hinaholongan dibagasan Jesus Kristus,

Diborngin parnigotan hatutubu ni Jesus borngin on diontang do hita marlasniroha jala mangendehon Jahowa na pamalum jala paluahon hita. Sanga do di loas Debata bangsona tu habuangan Babel, sanga do lengse nang Jerusalem hinorhon di dosa pangalaosion ni Debata, alai ndada diloas manongtong nasida tarbuang jala malengse. Parsiajaran na arga do i asa diantusi bangso i hinaarga ni haluaon. Golap do roha nasida dihabuangan i, alani lam diantusi nasida hinaarga ni hatiuron. Magopu do roha nasida, alai lam dinatusi nasida hinararga ni silasniroa dohot hademahon. Bojok do roha nasida ala honarupa, alai lam diantusi nasida ma hinargaarna di kebebasan. Mabugang do roha nang pamatang nasida, alai lam diantusi nasida ma hinaarga ni hahipason. Saluhutna namasa ndada gabe mambahen mandao sian Debata alai lam pahot haporseaon huhut pasolhot diri tu Ibana ai ndang dung dipasombu bangsoNa magopo. Diturpuk on dipatuduhon do balga ni asi ni rohaNa na paluahon jala paulihon mulak bangsoNa.

Didok diturpuk ta Jahowa pauli Jerusalem, papunguhon halak angka na mampar, pasabam angka parroha na bojok, mangaliliti bugang nasida, pahehehon angka na nirupa (2,3,6). Satangkarisap do i di ula Debata? Natape boi diulahon i satongkin alai ingot hita adong do proses na saluhutna. Molo didok Jahowa pauli Jerusalem, dalam konteks ni turpuk on martutu tudu do i tu proses pembangunan ulang Jerusalem dung mulak nasida sian habuangan Babel. Taboto do dalam sejarahna, dipangke Debata si Esra dohot si Nehemia laho manguluhon ulaon pemulihan. Leleng do i ndada sataon manang dua taon. Alani i do, tung mansai ringkot do hita marsihohot molo pe pemulihan ta ndada langsung manjadi. Adong do proses sidalananta hombar tu tingki ni Debata. Unang humarojor. Ingot hita, sai na pamalumon ni Debata do angka sahit nang bugangta. Molope ndang pintor haru dapot natasangkapi unang madele manundalhon Debata. Ai dang tingkinta tingki ni Debata, alai sai na dumenggan do na disangkapisa.

Marhita pandohan ni turpuk on tapanghilalahon do hinajonok ni Debata tuangka jolma na gale. Tapanghilalahon do nang panarihononNa dohot sangkap nang visiNa napaluahon, papunguhon jala pasasdahon. Angka namampar diparadedangedangan ni ngolu baik secara fisik nang roha pe dipapungu do muse. Dipasada dibagasan huaso panggomgomionNa. Diapuli do angka na bojok roha/patah hati hinorhon ni angka ragam ni namasa, isarana ala ni parsirangan ni pamatang dohot nahinaholongan, sitaonon nasora mansohot, hirim niroha naso ra manjadi, dlan. Barita natal on paingothon hita asa rade apulan jala pasabamon ni Debata ai sangkap pahehehon do sangkapna ndada sangkap hamagoan. Jala laos ido joujou tu hita di ari natal on asa rade hita marlasniroha jala rade hita masipaulan, masiurupan, jala sangkap pahehehon ma na tapareak tujoloan on.

Molo tapamanat pandohan ni Jesus “Songgop do tu ahu Tondi ni Tuhan I, ai dimiahi do ahu, mamboan barita nauli tua ngka napogos, disuru do ahu mamamritahon tu angka na tarhurung asa malua, tu angka na mampitung asa marnida, paluahon angka na ginosagosa, mamaritahon taon parasinirohaon ni TUhan i (Lukas 4:18-19 pat. Jes.61:1) patarma dunghon hamulak sian Babel manongtong do diulahon Debata porses pemulihan jala haluon  I ima dibagasan Jesus Tuhanta i. Bahkan haluaon dohot pemulihan I ndada be haluaon dohot pemulihan secara fisik hinorhon ni hamaolon nang parhatobaonon ni musu ni pardagingon alai dohot do nang haluaon nang pemulihan sian parhatobanon ni dosa. Asa hatutubu ni Jesus na tahalashon borngin tung haluaon na singkopdo baik pardagingon nang partondion pe. Ido alana tung ingkon marlasniroha hita mamuji pasangap goarna.

Lao manutup renungan on, huingot ma pandohan ni Hellen Keller sahalak na mapitung dohot nengel mulai sian hasosorangna na mandok : “ Sai hupingkiri do tung mansai denggan jala gabe pasupasu do molo ganup halak boi mapitung jala nengel pigapiga ari di masa simagodangna. Haholomon ingkon mambaen jolma I mangargahon hatiuron. Hahohomon mambahen jolma I mangargahon lasniroha di angka suara” Marhite pengalaman na sorat jala porsuk hinorhon ni Korona lan taantusi ma hinaarga ni hahipason dohot namasitungkolan Antong borhat ma manghalashon denggan basa ni Debata diganup pargulmiton ni ngolunta. Taendehon ma ibana na manompa, sumarihon jala na paluahon hita. Selamat ari natal Debata ma mamasumasu hita ganup. Amen

 

 

 

 

 

 

 

Jamita Adven IV 2021 (Jesaya 7:10-16)

Immanuel

(Jesaya 7:10-16)

Huria ni Tuhan na hinaholongan dibagasan Jesus Kristus,

Sadarion masuk ma hita tu minggu Adven na paopathon jala pagalakonta ma opat lilin sadarion tolu ma i naviolet sada na merah jambu. Lilin adven napaopathon on didok ma i lilin pardamean manang hadameon. Ragam do ra naboi mambahen dame rohanta, alai napaling ringkot ima posniroha na manongtong do mian Debata ditongatonganta. Ima barita na naeng tarimangi minggu on marhite hata ni Debata na dienet sian Jesaya 7:10-16 ima barita bagabaga taringot tu Immanuel.

Advent: Manghalashon hasatiaon ni Debata jala joujou Marhaunduhon paholang hajogalon

Huria ni Tuhan na hinaholongan dibagasan Jesus Kristus,

Dang tarasam denggan basa dohot haburjuon ni Debata, tung pe jojot hita on manundalhon Ibana alai sai disarihon jala dipangkulingi do hita. Ido nataida di masa ni panurirang Jesaya, lumobi ma na dipanadar di turpuk on. Maihuthon barita tu 2 Raj raja 16 dohot 1 Kronika 28 tongon do bangso Juda digomgomi raja Ahas na jukkat jala na manudalhon Debata, namamarenta sewenangwenang, kemunafikan beriabadah dlan. Asing ni i, uju disuarahon si Jesaya turpuk on, tongon ma dibagasan biar niroha halak Juda ala nangkok do Si Resin raja sian Ram dohot si Peka raja ni Israel marmusu dompak nasida. Dikondisi sisongon i, disuarahon si Jesaya do asa marhamuban raja i rap dohot bangso Juda asa dapotan haluaon molo dang ingkon do dapotan panguhuman. Alai dilaosi raja Ahas do barita ni panurirang i ai tumagonnan dirohana mangido pangurupion sian raja na asing ima raja ni bangso Asyur. Ditundalhon jala dang dihaposi si Ahas be Debata.

Nean nungga tung manghansiti roha ni Debata pangalaho ni raja Ahas, alai nang pe songon i dipatuduhon Debata do holongNa na sumalim tu bangso na i, marhite dipanghulingi nasida asa mulak porsea jala mangido pangurupion sian Debata. Didok ma tu raja i: pangido sada tanda diho sian Jahowa Debatam, pangido sian banua toru manang sian banua ginjang sahali (11). Naeng nian marhite pandohan on mulak porsea si Ahas na talup do Debata paro pangurupion sian manang dia pe, sian banua toru nang sian banua ginjang. Alai andul do alus ni si Ahas, dipajogal do rungkung nang rohana. Natape sangkap haluaon jala na denggan do sangkap ni Debata, ditulak jala dang dihaporsea i si Ahas. Didok ibana mangalusi ndang olo ahu mangido asa unang huunjuni Jahowa (12). Disada sisi hira na tung manasai tobok do si Ahas on dang olo mangunjuni jala mangido tu Debata alai disisi na asing nungga lao ibana mangido pangurupion tu raja Asyur. Tontu on sikap munafik do on. Ido alana alus na on naso marhaunduhon tu suara ni Debata, ditulak ibana holong satia nang pangomgomion ni Debata. Jala ido nang sikap napatuduhon ia dang dihaposi ibana be na parsidohot Debata dipardalanan ni bangso i.

Taida ma, dang hasuhatan holong ni Debata, dang dibatasi hajungkatonta holongNa. Ia ditundalhon raja Ahaz Debata alai sai rade do Ibana mangantoi, mamarateatehon jala menawarhon pangurupion nang haluaon. Alani I, tung patut do hita marlasniroha jala marhadameon manjangkon jala mamparsaulihon holong ni Debata. Unang be nian diragam ni hamaolon nang hatahuton na taadopi jala ditonga ni balga ni holongNa sai tapajogal roha nang pingkiranta. Unang be sai holan sangkapta nanaeng tapasaut, alai rade ma marhaunduhon tu sangkap haluaon ni Debata. Diminggu adven IV dijou ma hita asa paso roha na jugul, jogal, jungking, alai marsiajar ma patutoru roha, marhalambohon dohot marhaunduhon tu Debata nang sangkapNa. Ditoga ni angka biar nirohanta unang ma talului hademahon sian hagogoon ni portibi on alai sian Debata ma. Diragam ni natalului baik harajaon, parkarejoan, sirongkap ni tondi unang ma hita berkoalisi dohot huaso ni portibion jala mangulahon angka praktik praktik naso gabeak.

Adven: Dang hasundatan sangkap haluaon ni Debata

Huria ni Tuhan na hinaholongan dibagasan Jesus Krsitus,

Dang tarambatan ni jolma sangkap ni Debata. Inisiatif ni haluaon sian Debata do, jala ingkon do manjadi natape torop halak ndang manjangkonsa. Tangkas ma i taida diturpuk on, dung ditulak si Ahas manjalo tanda I rimas do si Jesaya namandok: ua tangihon hamu ma ale pinompar nisi Daud! Dang dope sae hamu pauruuruhon jolma, dohot do Dbeatangku naeng lojaanmuna (13). Alus ni si Ahas i diidado songon alus ni sude bangso Juda pinormpar nisi Daud. Mansai koras do pandohan i naung leleng nasida pauruuruhon jolma marhite penindasan dan kelaliman alai laos dohot Debata dipauruuru nasida. Nungga ditawarhon holongNa na polin, pangurupion dohot haluaon ditonga ni hatahuton na tongon di adopi nasida alai laos ditulak nasida. Alani i, Debata sandiri nama nanaeng mamungka, berinisiatif patupahon haluaon i. Debata sandirima mangalehon tanda. Didok ma dibahen i apala Tuhan i sandiri ma mangalehon sada tanda dihamu: ida ma, gabegabean ma sada namarbaju, jala tumubuhon sada anak, jala bahenonna goarna: Immanuel (14). Sapala naung disangkapi Debata sangkap haluaon sai manjadi do i. Tanda i ma na dipapatar Debata marhite barita hasosorang ni Jesus tuportibion marhite si Maria. Asa marhite Tuhan Jesus ma mian jala donganta ma Debata. Aha nasinurirangkon ni si Jesaya ndada hata gabus alai manjadi do hombar tu tingki naung binuhul ni Debata. Immanuel marlapatan donganta ma Debata, huhut laos ido patandahon na rade Debata mardame dohot jolma, jala laos ringkot do pemulihan ni Kristus i dingolu ni jolma.

Alani i, tahalashon ma ai Debata na tasomba i ndada Debata sipargabus alai Debata na mangulahon na hinatahonNa. Tahalashon ma na talup do parbinoto Debata dinanaeng masa di masa depan. Molo so pargabus do Debata antong talup ma hita manghaposi jala mangulahon hataNa. Ihut tusi unang be sai margabus hita alai halak na manghatahon, manghajongjongkon, dohot mangulahon angka nasintong ma dingolu siganup ari. Unang be parsidohot hita manghatindakhon barita hoax, unang parjanji koling, unang tartait gabe pargabus ala ni hamajuon ni jaman on isarana HP, nunga didalan ninna hape di jolo jabu dope, dlan. Ihut tusi, marsigantung tu Debata ma hita taringot tu masa depanta ai ditanggnana siamun do i. Unang lomos natape ingkon tetap do rencanahonon jala ulahononta aha naboi patupaonta.

Adven: Marhademahon mandalani proses ni ngolu

Huria ni Tuhan na hinaholongan dibagasan Jesus Kristus,

Immanuel paingothon hita dihasadaonta diproses ni ngolu dohot Debata. Natape asing do hasosorang ni Jesus sian angka posoposo ai sorang ibana sian sada namarbaju, alai anggo hadirionna tutu situtu do jolma, magodang jala diparmudu songon angka posoposo na asing mantege dohot situak ni loba do panganonna. Natape gabegabean sian Tondi Parbadia alai anggo sipangononna ndada gabe sipanganon napinarade ni angka surusuruan alai sarupa songon angka donggana na asing. Ihut tusi, natape sorang ibana dibagasan halongangan, ndada langsung magodang ibana alai dos songon angka posoposo na asing martumbur do ibana secara bertahap, mulai sian posoposo, dakdanak, remaja, sahat tu namagodang jala botooanna mambalongkon na jat jala mamillit nadenggan. Sude proses ni hajolmaaon ni naingkon dalannna do laho paluahon hita.

Antong aha na taae dingolu siganup ari dohot do Debata mangaesa jala mampargogoihon hita mangalewatisa. Ihut tusi, molo didalani Jesus do proses ni hangoluan na bertahap antong hita pe marsiajar ma marhaunduhon mandalani ganup tahap/proses ni ngolu on. Alani i, unang marroha instan hita dinasa na tahirim jala na tadalani. Marhasabamon jala sabar hita mandalani angka tahapan ni ngolu on. Ido sintuhu ni Adven managam jala manomunomu diharoroNa, natape dang haru ro dope alai didalani dibagasan hasabamon ni roha. 

Adven: Manghalashon jala managam Immanuel

Huria ni Tuhan na hinaholongan dibagasan Jesus Krsitus,

Di adven napaopathon on ndada so las rohanta marningot naung lam jonok ari hatutubu ni Jesus sipalua i. Marhitehite hatutubu ni Jesus, sipalua, malim, jala rajanta i, mian Debata rap dohot hita, jala dang dao, dang lao, jala dang dipasiding Debata bohina maradophon hita angka pardosa on. Baliksa, ditatap, dihaholongi, ditopot, jala dipalua Debata hita sian dosa nang sian saluhut haberniton hinorhon ni Dosa. Molo tahalason adven na paopathon on dibagasan tema Immanuel adong ma saotikna dua hal naboi talapati jala tahangoluhon songon pangkorhorna digoluntaa siganup ari ima: (1) Molo rap jala donganta do Debata, on do na paposhon rohanta dinamandalani ngolu tarlumobi uju mangadopi angka hamaolon, haporsuhon, pergumulan hita on. Immanuel patoguhon rohanta tung naso pasombuon ni Debata hita sandiri maralohon saluhut parsoalan i, alai sai dongananNa, urupanNa do hita asa marhamongan.  Antong disaluhut paraloan ni ngolunta taingot ma IMMANUEL, asa sabam jala marhagohoan hita; (2) Molo rap jala donganta do Debata (Immanuel), on do nang na paingothon hita asa sai torus marserep niroha jala maroha mauliate uju dibagasan kesuksesan, keberhasilan, hasonangan hita. Ai molo tasadari do na rap hita dohot Debata tung so adong do naboi sihaginjanghononta. Hamaoraon, hapistaran, haulion, hajagoonta na asing na i ndada tarptudos hita i tu huaso ni Debata na mandongai hita.  Astuanna rupani, molo adong horbonta dua ekkor hape donganta horbonta saribu, tontu ndang talup hita mangasangi manang manghaginjangkon horbonta si dua ekkor i. Hira songon i ma rupani, ala Debata do nampuna jala mual ni saluhut, tung naso tupa do tapangasahon hajagoaanta i molo tasadari rap hita dohot Debata. Kesadaran akan Immanuel menghantar kita bersikap rendah hati saat berada dalam kemakmuran, kejayaan, dan kehebatan yang lain. Sebaliknya, kesadaran akan Immanuel meneguhkan dan menolong kita saat menghadapi masa-masa sulit. Ido alana, tapestahon do sadarion posniroha nang hatoruhon niroha.

Antong huria ni Tuhan di minggu adven na paopathon on tapadame ma rohanta dohot Debata, tabutbuti ma jogal ni roha, halangguson jala taparaek ma haunduhon ja parsitutuon mangihuthon Debata. Ingot ma hita dihasatiaon ni Debata namanontong sumarihon hita natape olo mian hita dihajungkaton. Ihut tusi ingkon sadar do hita ndada gabe hita mangatur sangkap ni Debata. Tung pe torop halak manulak Ibana alai anggo sangkap haluaonNa tongdo ingkon manjadi. Ai dang pargabus ibana di janjina, alani mulak hita tu Ibana asa unang tung luangan hita diharoroNa napaduahon i. Tapapos rohanta molo rap Debata do hita monang do hita mangalo saluhut angka naamsa, ihut tusi marhaserepon ma hita diangka kesuksesan na tongon taidai. Manongtong ma hita rade mandalani proses na pinarade ni Debata tu hita dibagasan haunduhon dohot hasabamon. Dipasupasu Debata ma hita mangulahon hataNa. Amen