Marlasniroha Ai Mian Do Debata Ditongtonganta
(Sepania 3:14-20)
Huria ni Tuhan na hinaholongan dibagasan Jesus Kristus,
Sadarion masuk ma hita tu minggu Adven na patoluhon jala songon nasomal pagalakonta ma tolu lilin sadarion dua ma i naviolet sada na merah jambu. Lilin adven napatoluhon on didok ma i lilin lasniroha. Barita las niroha dohot haroro ni Debata songon sipalua ido nang na taida dipaandar diturpukta sadarion na dienet sian Sepania 3:14-20 namangontang hita mariaria, marlasniroha jala marolopolop. Ragam do naboi mambahen hita marlasniroha, boi do ala malum sian parsahiton, lulus ujian, godang langku tigatiga, sohot ianakhon, dlan. Alai hombar tu turpuk jamita sadarion adong mamang na piga alasan na boi mabahen hita marlasniroha dimasa adeven on natape ragam do hamaolon dingolunta.
Advent: Marlasniroha ala ni pengampunan
Huria ni Tuhan na hinaholongan dibagasan Jesus Kristus,
Alasan na parjolo nadipandar di turpuk asa marlasniroha ima haradeon ni Debata pasahat pengampunan tu jolma na mangulahon dosa. Marhite pengampunan i dipauba Debata do nang hadirion ni bangsona. Turpukta sadarion paandarhon hamubaon i marhite na jou bangso i boru Sion, dohot boru Jerusalem. Nian panjouon nasomal doi dibahen angka panurirang tu bangso Israel, alai anggo diturpuk on tung patuduhon rehabilitasi ni status ni bangso i do i. Ai di ayat 1 dibindu tolu on dijou do nasida huta na jungking, na ramun, dohot siulahon gogo. Ala ni ma binna disuriranghon si Sepania mulai bindu sada barita panguhuman ni bangso i. Alai ala ni denggan basaNa, rade Debata pauba rimasna gabe asi ni roha bolon. Barita pengampunan sekaligus rehabilitasi status ni bangso i boi taida do di pandohan Nungga diunsat Jahowa uhumna tu ho, nunnga disiaphon musum (15a). Halak na marsala jala mangulahon dosa do na patut dapotan uhum alai halak nadapotan pengampunan diunsat do uhuman na tu ibana hian. Direhabilitasi ma status nasida sian pardosa gabe nabadia, sian na taruhum/tarhurung gabe nadipalua. Mangihut ma tu pengampunan i maniaphon musu ni Israel na manosak jala na pasipal nasida.
Tutu, hasesaan ni dosa do barita na tung mansai sihalashononton. Ai saleleng sai diihot dosa nang hasalan i sai manongtong ma diparhatoban jala dao sian las ni roha. Adong do rupani sada sarito namanggombarhon las ni roha ni pengampunan jala malua sian parhatobanon ni dosa nang panguhuman. Disada tingki, rodo dua halak pahompu ni sada ina na matua marpakansi sian tano parserahan. Tadok ma jo goarna si Togap dohot si Tiur. Godang do bibi ni ompung on dipahani dipudi ni jabuna. Diajari ompung na i do si Togap markatapel laho mangalele panangga na ro naeng manoro bibi i. Disada tingki dang disegaja si Togap manghatapel bibi i dungi mate. Ala ni biarna ditabunihon ma i dang dipaboa tu ompungna. Dinaso panagamanna diida si tiur do i jala laos dipangke laho mambiarbiari jala mangogapi ibana. Tung mansai biar do si Togap sotung dipaboa ibotona i tu ompungna na mate bibibina. Laos dipangke siTiur do biar ni rohana i mamparhatoban ibana. Ganup adong ulaon disuru ompung na i gabe sae dipabali ma tusi Togap sambil didok ingot bibi. Ala ni biarna, sai dioloi do hata nisi Tiur . Naeng borhat keluarga ni ompungna i marlibur tu pantai, ala ingkon adong natinggal manjaga jabu, tipa tu ibana ma i ai didok si Tiur, si Togap ma ompung na tinggal nungga manghatai hami nangkin, huhut dihusiphon ingot bibi. Sai torus ma songon i diparhatoban hasalaan jala ibotona i ibana. Mago ma silasnirohana na marpakansi i. Disada tingki dang tahan be ibana dungi diakui ma tu ompungna naung dikatapel ibana bibina pola sampe mate. Alai roma ompungna mandok, huboto do i jala gira doho huampuni. Malua ma ibana sian parhatobanan ni ibotona dohot rasa bersalana jala mulak ma sialasniroaha.
Asa pengampunan tutu situtu boi mambahen hita marlasniroha. Ido nang na tahalashon marhite Jesus sipalua i. Hita na patutna hona uhum ala ni dosa i, alai diampuni Debata marhite panghongkopon ni Tuhan Jesus. Ido mambahen ingkon mansai las rohanta paima haroroNa napaduahalihon songon paimahon sisolhotta naung tung tahasiholii harorona. Mangarade sadenggan ni dengganna pola do sipata sampe di jemput tu bandara ala ni las ni rohana naeng gira nian pajumpang. Ihut tusi, rade ma hita mambahen silasniroha ni donganta marhite na masisesaan dosa.
Adven: Marlasniroha ala mian do Debata ditongatonganta
Huria ni Tuhan na hinaholongan dibagasan Jesus Krsitus,
Didok diturpukta ai Jahowa raja ni Israel do ditangatongami, ndang be idaonmu hinamago (15b); Ai jahowa Debatam do ditongatongami, ulubalang silehon tua do Ibana (17a). Tung aha penamasa, nang hinorhon ni hajungkaton ni jolma i, dang dung he Debata maninggalhon bangsoNa. Dalam konsep berpikir hatiha i, molo dibaritahan muse na mian Debata ditonga nasida marlapatan ma i nungga mulak roha ni Debata, diampuni nasida, jala digomgomi muse bangso i. Mago ma biar niroha huhut margogo ma. Ido binna didok diari nasasada i, dohonon ni halak ma tu Jerusalem: Unang ho mabiar; ndang be idaonmu hinamago. Haroro ni Debata mian rap dohot nasida paubahon biar ni roha gabe hadameon, hagaeleon gabe hagooon, lomos ni roha gabe pos ni roha, arsak gabe silasniroha, dlan. Dohot jempek dohonon, kehadiran ni Debata menjamin hatuaon, las niroha, parolopolopon dibangsona.
On ma nang na papapos rohanta marlasniroha diombas on, dang dung hea ditinggalhon Jahowa hita. Hinorhon ni holongNa sai mian do ibana rap dohot hita ganup ari, tung aha pe namasa. Kehadiran ni Debata ditongatonganta mual ni hatuaon, hademahon, lasniroha nang parolopolopon. Saleleng posrohanta jala porsea na mian do Debata rap dohot hita jala sabalikna unang tatinggalhon ibana, disima hita sai dapotan las niroha. Mago ma biar niroha nang hinorhon ni manang aha pe, ala biar mida Jahowa paagohon biarta na asing. Kehadiran ni Debata mamastihon hita margogo mangadopi angka namasa, jala onding ma hita sian angka hinamago. Ido alana ingkon marlasniroha hita naung ro Tuhan Jesus asa mian rap dohot hita manongotong marhite Tondina naung di tongos tu rohanta ganup. Huhut marlasniroha hita paimahon haroro ni Kristus napaduahalihon lahi pasingkophon sangkap haluaonNa.
Adven: Marlasniroha ala dang dihalomohon Debata panguhuman
Huria ni Tuhan na hinaholongan dibagasan Jesus Kristus,
Hal na tung mansai sihalashononta marhite turpukta sadarion diadven napatoluhonon ima naso dihalomohon Debata panguhuman natape sipata ala ni dosa ingkon masa panguhuman. Sabalikna, tung dihalashon Debata do pemulihan hubungan jala haluaon ni bangsoNa. Ido binna didok “Marlasniroha situtu Ibana mida ho, hohom ibana dibagasan haholongn ni rohana, marolopolop ibana mardongan pujipujian mida ho (17b)”. Dung diampuni bangso i jala mian Debata ditonga nasida, tung las situtu rohaNa mida bangso naung pinalua i. Dibagasan las ni roha na dipatupa do nang haimbaruon tu nasida. Didok hohom ibana dibagasan haholongn ni rohana/ Ia membaharui engkau dalam kasih-Nya. Alani i, patut ma bangso nang hita pe marlas niroha ala ni lasniroha ni Debata. Antong di minggu adven on taihuthon ma las niroha ni Debata i marhite na rade hita patupa ulaon pardenganan unang parbadaan. Mardenggan ma hita dohot na humalinag, hohom marhaimbaruon, masihaolan dibagasan tangiang nang pambahenan pe.
Adven: Marlasniroha ala dipamalum/ dipalua Debata
Huria ni Tuhan na hinaholongan dibagasan Jesus Krsitus,
Tontu barita haluaon pasti do mambuan silasniroha diangka na tarhurung, na gale, namarsahit, dlan. Ido nang nadipatudu turpukon binna dijou bangso i marlasniroha ala pauluahon ni Debata ma muse angka na tarbuang i tu tano nasida. Dalam proses hamumulak nasida i patupaon ni Debata ma angka ulaon haluaon ima: Halak na gondok roha, angka na holang sian luhutan i, papupunguonku do (18); marlulu Debata dompak angka na mangarupa Israel (19a); pamalumonku ma halak na mengkat, papunguanku halak na pinabali, jala bahenonku nasida gabe pujipujian, jala marbarita di saluhut tano haurahan nasida nasailaon (19b); ditogihon mulak jala dipapungu, dibahen marbarita jala hamuliaon (20). Pemulihan secara total ma i antong. Pemulihan fisik, angka na mengkat dipamalum, pemulihan psikis sian na tarurak gabe pujipujian dohot hamuliaon, pemulihan status sian na tarbuang dipamulak tu tano na; sian na dipabali gabe diadopan ni Debata. Tontu barita i gabe mual ni las niroha ni bangso i, natape ndang haru manjadi dope i, alai bagabaga i nungga mangalehon panghirimon di bangso i ia panguhuman nanaeng sidalanan nasida ndada manongtong adong do tingki hasusudana. Panghirimon i ma na mangogoihon nasida mandalani paruhuman i. Panghirimon ima na mangonjar nasida marlasniroha. On ma nang na mangonjar hita togu jala marposniroha mandalani angka ragam ni hamaolon na tongon taadopi. Marujung do sude hamaolon i jala ditingkina pulihonon ni Debata do ngolunta baik secara fisik, psikis, identitas nang rumang ekonomi politik dohot sosial pe. Asa haporseaon sisongon i ma na mangalehon gogo dihita manghamonanghon nasa ragam ni hamaolon na taadopi nuaeng jala talup hita marlasniroha mandalani ngolu huhut mangarade diharoroni ni Kristus napaduhon i. Asa manongtong hita rade jala polin tung andingan pe haroroNA i.
Adven: Marlasniroha dibagasan panghirimon
Huria ni Tuhan na hinaholongan dibagasan Jesus Kristus,
Ra, tubudo tu rohanta boa do ahu marlasniroa ai tongon dibagasan parsahiton nasora malum, pergumulan nasora marujung? Boi masa do i, alai ndada ingkon jolo masa sude asa boi las rohanta. Ai saluhut barita las niroha na binaritahon nisi Sepania ndada naung masa dope dihatiha i alai sipaimaon nasida dope. Alai nang pe songon i, ala adong barita las niroha sipaimaon margogo do bangso i mandalani ngoluna jala adong dasorna marlasniroha. Songon i do nang hita, na tongon paimahon haroro ni Kristus napadua halihon, panghirimonta di haroroNa napaluahon jala mamboan hita rap dohot angka naporsea tu surgo hasonangan i ima na margogoihon hita mangolu sadenggannidengganna jala manongtong marhaunduhon tu lomo ni rohaNA. Ihut tusi, panghirimon ima na mambahen hita marlas niroha dingolu on. Songon angka partani marlasniroha mangombak dohot marsuan eme, sayur, jeruk, dlan ala adong hirim ni rohana manapu,mangotil,mamanaen nasinuanna i. Partigatiga baju,sepatu margogo jala marlasniroha manuhori barangna jala mangangkut tu onan/tokona ala adong panghirimonna dimasa adven dohot natal on godang annon langku tigatigana. Halak na paborhat dakdanak marsikkola natapae tung mansai borat margogo jala marlasniroha ala marpangkirimon marhite parsingkolaan i dapotan ngolu na dumenggan ianakhonna i tujoloan on. Asa manongotng ma hita pagalakkon api ni panghirimonta asa margogo jala marlasniroha hita di masa adven napatoluhon on natongon manjou hita marlasniroha.
Antong, dimasa adven na patoluhon on adong do sihalashononta saonari jala laos adong dope silasnirohanta naso manjadi dope. Marlasniroha do hita nuang ala naung taboto disesa Debata dosanta marhite haroro ni Kristus naparjolo i. Marlasniroha do hita saonari ala mian do Debata rap dohot hita dingolu siganup ari marhite tondiNa. Alai I natarpaima dope hita disilasniroha bolon diharoroNa napaduahon asa tung mulak hita saluhtna tu surgo hasongan I rap dohot Debata. Antong tahalashon ma denggan basana naung tajalo jala tahalashon ma denggan basaNA nanaeng jangkononta muse dijoloan ni ari. Marhite I tutu situtu ma hita mariaria jala marolopolop. Tahangoluhon ma hata ni Debata na mandok Marlas ni roha ma hamu tongtong di bagasan Tuhan i! Huulaki ma mandok: Marlas ni roha ma hamu (Pilipi 4:4). Amen
Tidak ada komentar:
Posting Komentar