Jamita adven I 2021 (1 Tesalonika 3:9-13)

Manomunomu Haroro Ni Tuhan I Dibagasan Habadiaon

(1 Tesalonika 3:9-13)

Huria ni Tuhan na hinaholongan dibagasan Jesus Kristus,

Sadararion masuk ma hita tu Minggu adven I sekaligus gabe taon baru parhuriaoan. Sialani i, dohonon nami ma parjolo, Selamat Adven jala selamat taon baru parhuriaon ma dihita saluhutna!

Molu tamasuki minggu adven sarion taingot ma na mangarade do hita laho marningot haroro ni Kristus na parjolo marhite hatutubuNa di Betlehem na tapestahon di ari Natal nanaeng ro, huhut mangarade diri laho manomunomu Kristus diharoroNa napaduahon laho manguhumi halak namangolu dohot namate. Masa adven paingothon hita mandalani ngolu parugamoonta dibagasan spiritualitas napolin na martumbur jala mangodang dibagasan sistem dohot nilai-nilai ni harajoan ni Debata ima: Habadiaon, holong, hasintongan, hatigoran, pangoromon diri, dlan. Ido alana ciri-ciri perayaan masa Adven ima hademahon dohot kesederhanaan ala penekananna ima hamubaon ni roha na mardongan panghirimon di haroro ni Tuhan i. Alani i, tung mansai ringkot do hita mandalani jala manghangoluhon masa adven sadenggan ni dengganna laho papolin ngolu partondion, patang haporseaon dohot panghirimon huhut margogoihon hita mandalani ngolu siganup ari. Laos ido nanaeng tarimangi di minggu adven na parjolo on dibagasan tema minggu “Manomunomu Haroro ni Tuhan i Dibagasan habadiaon” Bao carana? Ima nanaeng taida sian turpuk Jamita sadarion nadienet sian 1 Tesalonika 3: 9-13.

Masa adven: Ngolu nagabe mual ni silasniroha

Huria ni Tuhan na hinaholongan dibagasan Jesus Kristus,

Turpuk jamitata sadarion ima barita silasniroha na ginurithon ni apostel Paulus tu huria Tesalonik. Mansai denggan do parbue ni pangajarion ni si Paulus di huta Tesalonik, alai ala ni halak na Jahudi namambahen hagunturon, hatop do ibana bungkas sian huta i (pat. Ul. 17:1-9). Dung ditingalhon apostel i huria Tesalonik, ragam do hamaoloan na diae nasida hinorhon ni angka panurirang pargapgap nang ala ni pambahenan ni halak naso porsea, baik halak Jahudi nang Romawi pe. Hinorhon ni i, sai lomos do roha ni apostel i sotung gabe sumurut do haporseaon ni huria i. Alani i, ditongos ibana do si Timoteus laho manguduti panghobasionna di Tesalonik. Dungkon manghobasi si Timoteus sadia leleng di Tesalonik, roma ibana mandapothon si Paulus songon na paboahon kondisi ni huria i (1 Tes 3:6-8). Dung dibege Apostel Paulus parsihohoton ni huria Tesalonik dihaporseaon tu Debata, natape didondoni ragam ni hamaolon, tung so apalang las ni rohana.  Didok ma “Ai hamauliateon dia ma tarlehon hami tu Debata, balos ni saluhut halalasniroha na huhilala hami dijolo ni Debata nami marningot hamu?” (ay.9). Las rohana ala marparbue pangajarionna na jempek di huria Tesalonik ala hot nasida dihaproseaon i natape doa nasida sian Apostel Paulus. Ihut tusi, taida ma hinabalga ni haporseaon gabe mual ni halalasniroha nang roha mauliate diangka na porsea.

Ngolu ni huria Tesalonika on ma parbue ni Barita Nauli, alani i, songon naung manjangkon Barita Nauli, baik pribadi suang songon i songon sada huria, tarjou do hita asa gabe sibahen las niroha tu angka na humaliang, tu angka uluan suang songon i angka sisolhot nang dongan saulaon di huta, di kantor, dlan. Asa unang nean hita gabe sibossiri ni hadokdohon ni roha, iluilu, nang haporsuhon dihumaliangta. Alai gabe pamujion nang roha mauliate na tubu di roha nina humaliang hita hinorhon ni haporseaonta na marsihohot diragam ni na masa di ngolutta siganup ari, suang songon i nang hinorhon ni parangenta na denggan diparsaoran, ulaon holong niroha, nang semangat hidup na tongtong marpanghirimon. Tapatudu ma holong ni Kristus tu ganup halak. Molo dang tarurupi hita donganta nanggo apala unang tabahen jut ni roha nasida. Marmula sian adven na parjolo on mansohot ma hita mambahen jut ni roha ni dongan jala marlumba hita gabe mual ni silasniroha. Antong tauji majo marnida mulai sadarion sahat tu tangggal 24 malam, dia magumodang taulahhon mambahen las roha ni dongan manang mambahen jut roha nasida, mangarimasi dongan/mambahen dongan rimas manang pademanghon roha ni dongan,dlan.

Masa Adven: Ngolu na Ronsot Martangiang (Sipartangiang)

Huria ni Tuhan na hinaholongan dibagasan Jesus Kristus,

Holang do apostel Paulus sian huria Tesalonik, hinorhon ni i tung godang do naso bou bahenonna secara langsung laho mamparmudu nasida. Alai nang pe songon i sai ingot do apostel i manangianghon huria i. Hinorhon ni holong dohot sihol ni rohana tu huria i lobi sumurung ma tangiangna maradophon huria i. Taida ma i dipandohanna Borngin dohot arian lobi sumurung do tangiangnami, asa anggiat idaon nami bohi muna laos patingkoson nami, ia adong dope hahurangan ni haporseaon muna (ay. 10).  Lam sihol rohana lam ronsot tangiangna, arian nang borngin pe. Adong dua tujuan ni tangiang na ima: Asa haru boi mangebati huta Tesalonik jala pajumpang dohot nasida; dung i asa adong partingkian dinasida laho patingkoshon angka na humurang dihaporseaon di ruas ni huria na di Tesalonik i. Ida ma, marlasniroha jala renta do apostel i manangianghon huria i natape adong dope na humurang ni huria i. Siala ni I, ndada jolo singkop sude ngolu on asa boi marlasniroha.

Ditangiangna i dipangido ibana ma asa tung Debata na mangungkap dalan tu ibana borhat tu Tesalonik: Alai Debata Amanta sandiri dohot Tuhanta Jesus ma pabulushon langkanami tu hamu (ay.11). Tung tangkas ma dipatuduhon na tu Debata do ibana ro mangido pangurupion asa tung Debata na manguluhon ibana di persoalanan ni ngolu siganup ari. Ra, dohononta do ndada hal na biasa do sihol ni roha laho pajumpang dohot na hinaholongan? Alai tung hal na biasa pe i, rodo apostel i mangido asa tung Debata na manguluhon jala pabulus langkana. Dihaposi apostel i do na Debata na mangurupi hita di ragam ni hamaolon (God-rescued life); huhut Debata do siuluhon hangoluan on (God-directed life).

Diajari Paulus do hita marhite turpuk on asa gabe halak na ronsot martangiang di ngolu siganup ari. Nian godang do ulaon naso boi tarpatupa hita di ngolu siganup ari suang songon i nang di huria hinorhon ni angka keterbatasan na taadopi. Alai ditonga ni keterbatasan i naeng ma gabe sipartangiang hita. Uju dang adong na boi tapatupa, dang adong be na tarpangasahon hita taharinggashon ma martangiang. Di persoalan ni ngolu siganup ari pe tapangido ma pangurupion sian Debata asa tung ibana na manguluhon jala pabulus angka sangkap nang langkanta dihasiangan on lumobi ma patulus langkanta tu hasonangan na manongtong i. Parsihohoton martangiang manaruhon hita nang halak na tatangianghon i hot di haporseaon unang ganggu jala talu binahen ni portibion. Tadalani ma masa adven on marhite na pagodang tingki ni partangiangonta dingolu siganup ari.

Masa Adven: Mengasah Kepedulian-Siparholong

Huria ni Tuhan na hinaholongan dibagasan Jesus Kristus,

Nadenggan do nian gabe sipartangiang molo dang adongbe naboi tarpatupa hita agai aha, alai sanga boi dope naeng ma nian gabe halak siparholong hita jala na rade peduli tu ngolu ni na humaliang. Taida ma i nang dipangidoan ni Apostel Paulus ditangiangna asa digohi Debata huria Tesalonik marhite haholongon ni roha. Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni roha nami tu hamu (ay.12). Nian nunga tung las roha ni apostel i dihaporseaon dohot holong ni roha ni ruas ni huria di Tesalonik (pat. Ay.6) alai dipangidohon ibana do asa digohi jala lam ditambai Debata holongNa di roha ni huria i sama nasida nang tu saluhut halak. Holong ni roha ni huria i naeng nean songon holong nirohana tu huria i. Holong na polin, naso marpambuat songon holong naung jinalo nasida rap dohot apostel i sian Tuhan Jesus sipalua i. Ima holong na rade sumeahon diri. Sian pangidoan ni apostel on taingot do na Debata do mual ni hagoogon nang holong niroha, alani i dalanan ma ngolu on rap dohot Debata.

Roha haholongon ima sipareahonta di masa adven dinamangarade hita manomunomu haroro ni Kristus i. Roha haholongon i ima roha na taronjar mangurupi angka na humaliang diragam ni angka namasa, mangurupi na hahurangan sipanganon, mangurupi parsingkolaan ni na pogos, manogu angka na marhagaleon, mandulo angka na marsahit. Ihut tusi perduli ma hita diangka ulaon na denggan, peduli dihaiason, dihahipason, protokol kesehatan, dipanghilalaan ni dongan (berempati) dlan. Sada sian godang dalanta laho mangurupi dongan dibagasan holong huhut papita partondion ima marhite na mandalanton parpuasaon/pangoromon ni diri. Baosa? Ala Implikasi puasa dalam kehidupan sehari-hari pertama-tama adalah mengajari kita untuk tahu diri, merendahkan diri, rendah hati dan mengikis kesombongan, ego serta membangun kepekaan pada penderitaan sesama, serta makin terbuka pada kehadiran Tuhan di dalam hidup kita.

Najolo, parpuasoon memnag diulahon marhite naso mangan/minum dipartingkin naung ditontuhon.  Alai boi do tapahembang cara berpuasa asa mangarongkon na asing, isarana: marisap, menonton sinetron, manghansiti roha ni dongan, marbete-bete, mamanghe gedjed, FB, menggosip, dll. Saluhutna i boi do rap diulahon isarana puasa manganton sipagangon hasoloan ni roha rap dohot puasa marisap; manang puasa manonton sinetron rap dohot puasa menggosip, dll. Parpuasoon boi do nang dipatupa marhite na mangurangi frekuensi dan kuantitas makan kita, isarana somalna 3 hali sadari x 2 piring gabe 2 kali sadari x 1 piring. Molo soi i, diangka parsingkola mangorui frekuensi dan kuantitas jajan. isarana, somalna uang jajanta Rp. 5000/ari maka masa puasa tahurangi ma gabe Rp. 2000/ari.  Tapatupa mai saleleng masa Adven dan hasil puasa i disimpan asa di ari Natal disalurkan tu angka dongan na membutuhkan marhite gereja manang langsung pe taho. Somalna, hasil puasa i ma natabahen gabe Amplop bakti Natalta.

Marhabadiaon: Maraleale dohot Debata.

Huria ni Tuhan na hinaholongan dibagasan Jesus Kristus,

Haringgason ni apostel i manangianghon huria Tesalonik rap dohot pangidoanna na marragam i marujung do tu hirim ni rohana asa tung lam togu roha ni huria i jala parsinean dihangoluan nasaleleng ni lelenangna Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiana (ay.13. Naeng nian, di harroro ni Kristus na paduahalihon i dirgak huria i so hasurahan marhabadiaon. Boa do asa marhabadiaon sahat tu ari paruhuman i? ndang adong dalan na asing dungkon ni maraleale dohot Debata jala mandalani ngolu siganup ari rap dohot Ibana.  Marhite i, dipaingot ma nang hita asa tapatogu rohanta di masa adven asa unang hasurahan ngolunta. Ima ngolu na didalani dibagasan hatoguon ni roha marojahan di hata ni Debata jala na diulahon dibagasan hasintongan, hatigoran. Maraleale dohot Debata ima dalan pahot ngolunta marhabadioan. Ingot ma hita lam tang haproseaonta lam godang do nang alogo naro menghepas ngolunta asa munsat hita sian haporseaon jala habadioan i. Alani i, hot ma rohanta di Debata asa unang ala ni rimasta ro angka hata barangsi; ala ni malenta gabe manangko, ala ni parsahiton gabe mardatu, ala ni kegagalan isarana gagal Cpns/P3K gabe malas marminggu, dlan. Mangihuthon semangat parpuasoon, marpuasa ma hita marhata naso ture, marbada, manghatai jala manihasi dongan, muruk, dlan, nang di kegagalan na taadopi pe. Marmula sian pengalaman ni ngoluna, didok Pdt. Dr. Darwin Lumbatobing di bukku na namarjudul bukan menjaring angin “kegagalan senantiasa memiliki arti sebab orang tidak pernah gagal tidak akan bisa merasakan betapa nikmatnya kemenangan. Antong taparade ma ngolunta manomu nomu haroro ni Krisuts i dibagasan habadion asa unang hasurahan. Amen