Jamita adven II 2021 (Lukas 3:1-6)

Marhamubaon Parade Dalan di Debata

(Lukas 3:1-6)

Huria ni Tuhan na hinaholongan dibagasan Jesus Kristus,

Sadarion masuk ma hita tu minggu Adven na paduahon nasomalna ditandai marhite na pagalak dua lilin na violet disetiap ibadah baik gareja suang songon i nang dijabunta be. Tema besar ni Minggu Adven napaduahon ima hamubaon ni roha manomunomu Tuhan i. Ido nang na taida dipaandar diturpukta sadarion na niedet sian Lukas 3;1-6  dipaingot ma hita asa marhamubaon niroha manolsoli dosa dalan haluaon. Hamubaon ni roha na parade dalan di Tuhan i pature dalan di Jahowa.

Advent: Marhamuboan parade dalan di Debata

Huria ni Tuhan na hinaholongan dibagasan Jesus Kristus

Huingot uju di manghobasi di Doloksanggul dope ahu, hea do ro Presiden Jokowi berkunjung via bandara Silangit. Dua ari andorang so ro dope presiden, hubolus do dalan tu bandara ala naeng tu Balige ahu. Hatiha i, godang dope dalan sian Lintongnihuta sahat tu Parranginan na marlobang-lobang, pola do ingkon hira na marjoget iba mamboan mobil i. Alai dung ro presiden, hubolus muse dalan i, nungga disosopi angka lubang i. Lentes ma antong dalan i suang songon i nang roha ni rakyat manomunomu presiden pola sampe maraburan tu topi dalan. Salah do i? ndaong,  justru denggan. Songon i do nang somalna masa mulai sian najolo suang songon i dipartingkian ni Jesus. Molo naeng ro sada raja tu sada luat, nungga disuru jumolo utusanna laho paboahon tu pemerintah setempat asa dipatupa pangaradeon. Somalna, pintor sibuk do nasida pature dalan asa boi mulus lewat hureta ni raja i, unang tartuktuk, unang tarlombang. Huta pe dipaias, dipasang ma nang angka gaba-gaba tanda penyambutan ni huta i di raja i. Molo dang, hona uhuman ma nasida.

Antar hira Songon i ma nang namasa uju naeng sorang Jesus tu portibi on. Disuru Debata si Johannes manjoloani asa ibana parade dalan diharoroNa sekaligus penggenapan ni panurirangon ni si Jesaya. Dienet si Lukkas do barita ni panurirang Jesaya diturpuk on na mandok "Soara ni na manjoujou di halongonan! Pature hamu ma dalan di Tuhan i, pahornop hamu ma sidalananna!" Ingkon gohan do nasa rura jala siparejeton do nasa dolok dohot buntulbuntul, sipatigoron do na bengkuk jala sipadosdoson na marbungkibungki." “Jala idaon ni nasa daging do haluaon na sian Debata!" (Luk 3:4-6, pat Yes. 40:3-5). Boasa dienet on? Naparjolo, dipatudos ma kondisi ni bangso Jahudi hatiha i songon kondisi ni ompu nasida uju dihabuangan Babel, rap terjajah. Holan i bedana uju i dang ditanona nasida alai angggo saonari tung terjajah pe nasida alai ditano na sandiri; Napaduahon Si johannaes ma suara na joujou di halongonan i na manuarahon jamita hamubaon ni roha laho parade dalan di Tuhan i! Si Johannes ma na parade dalan tu haoro ni Jesus.

Alai ingot hita ndada holan raja sambing Jesus, alai raja ni sude raja asa dalan siparadeon ima roha nang parangenta!  Ido binna dijamitahon ma pandidion hamubaon ni roha, laho pasesahon dosa/"Bertobatlah dan berilah dirimu dibaptis dan Allah akan mengampuni dosamu. Dijouhon bangso i marhamubaon ni roha, sumolsol bagi jala dididi tanda ni hamubaon ni roha huhut sumesahon dosana. Hamubaon ni roha dohot penyerahan diri do anak hincu ni penggenapan ni panghirimon dihaluaon nasian Debata, termasuk kemerdekaan politik dan reformasi kehidupan beragama.

Marhamubaon/bertobat/metanonia marlapatan ma i mulak maninggalhon dalan naso ture tu dalan na hinalomohon ni Debata. Alani i, mansohot mangulahon dosa isarana manangko, hamokkuson, marhata rorang, dlan satonga dalan ni pertobatan dope. Asa singkop pertobatan i, dung mansohot mangulahon dosa diulahon ma halomoan ni Debata. Isarana mansohot margabus dimulai marhata na sintong, tapaso mambulli tamulai mangurupi, Taparbadia ma rohanta marhite parsaoran dohot Debata, tapatigor, tapaias ma rohanta sian angka na rotak jala jorbut. Tapalentes ma angka dolok ni rohanta na marrumang haginjangon ni roha, hamokkuson, tasosopi ma rura ni rohanta hinorhon ni bugang hansit ni roha, sogo ni roha, biar nang holso pe. Mulak ma hita sian angka hagigiot dohot dalanta na jahat tu dalan natigor dohot hagigiot ni Debata. Tapaso mambuat naso ugasan/bagianmu, paso KDRT tapasomal ma masiurupan jala masihaholongan, patupa ibadah keluarga dijabunta be, dlan. Taproklamirhon ma haimbaruonta i dingolu siganup ari asa boi diboto jolma naung tajangkon sipalua i. Jala tarjalo ni salut jolma haluaon, ai ndada holan dihita i.  Asa marhite sian i nasa daging boi marnida haluaon nasian Debata (ay.6). Hea do didok Stephen Covey: Kita harus memperluas kandang Ayam dan mempersempit kandang Musang” boi ma talapati ingkon pabidangon do inganan ni hangoluan na denggan jala tapasompit inganan ni ngolu na manegai. Unang tapabalga angka persaolan alai gira tapasidung.

Ido alana hamubaon sipareakon ndada hamubaon dekoratif, hamubaon bagian parduru ni ngolunta alai dohot do nang bagian parbagasan pe. Perobahan dekoratif mura do taulahon jala pintor semangat do hita disi. Mandekorasi gareja, paias alaman, mancet jabu, marpangkas/marsalon laho marnatal, marpanghean naimbaru, dlan. Alai dang i na rumingkot. Molo na taparde holan marnigot haroro ni Kristus diari hatububuna boi ma holan dekoratif alai tapaima jala tatotmutomu do nang haroroNa napaduahalihon alani i ringkot tapauba, tapauli rohanta. Asa ngolunta on gabe polin diharoroNa i. Unang hamubaonta i gabe songon LANTEUNG. Uli idaon di duru alai sapot dibagasan, uli idaon di duru alai dang marguna, dang adong jolma nang binatang pe na mamparsaulihonsa. Sabalikna, di minggu Adven II kita dipanggil Allah untuk bertobat dan menjadi orang yang bernilai dan manusia yang berguna dalam kehidupan keluarga, teman, jemaat dan orang lain, terlebih bernilai dan berguna bagi Tuhan.

Asing ni manjouhon hamuboan, uju disuru Debata si Johanes parade haroro ni Jesus, diparade ibana nanaeng gabe sisean ni Jesus. Molo taparetaatehon si Andreas dohot si Simon Petrus, andorang so gabe sisean ni Jesus, sisean nisi Johannes do nasida. Diparade si Johannes do nasida asa gabe siap gabe sisean ni Jesus (Yoh.1:32-42). Alani ido, selain rohanta, taparade ma ruas ni huria mulai sian Sikkola Minggu sahat tu naung lansia asa gabe tutu situtu sisean ni Debata. Molo adong hita on na mengabaihon pangobasion tu ianakhonta be, adven paduahon on manjouhon hita asa muba jala taparade haporseaon ni ianakhonta i ganup. Didok Martin Luhter, tapangke ma masa adven laho mangajari angka ianakhonta taringot tu Kristus nang haroroNa marhite na patupahon partangiangan na jempek ganup borngin dibagsta be dung simpul mangan bodarina i. Jempek dohonon taparade ma partondion na lam ronsot marsaor dohot Debata.

Parsaoranta dohot Debata na lam ronsot ido nang na manaruhon hita lam unduk tu hata ni Debata. Marsiajar ma hita tu haunduhon nisi Johannes dihata ni Debata mangonjar ibana luar sian ingananna laho manopot inganan ni natorop. Laos on ma na paingothon hita asa tatadingkon partabunianta nang hasonanganta laho mangulahon hata ni Debata. Unang tabahen kondisi ni ngolunta (hasusaan nang hasonangan) gabe partabunian manang alasan unang mangulahon hata ni Debata. Tatiru ma si Johannes na rade ruar sian halongonan tu hariburon mangihuthon hata ni Debata parade dalan tu haroro ni Jesus. Antong rade ma hita mangendehon BE.38:4  O Jesus ro ma Ho tuson Ai naung huungkap rohangkon Patongon asi ni rohaM Patolhas denggan ni basaM Tu au marhite TondiMi  Togihon au tu surgo i Ai naeng tongtong disi Hupuji goarMi

Adven: Dipangkulingi Debata ditingki na lehet

Huria ni Tuhan na hinaholongan dibagasan Jesus Krsitus,

Ra, olo do gabe dohononta, na holan seruan moral dohot tanggungjawab do adven on? Holan suara hamuabon ni roha do? Aha do barita na uli disi? Mangihuthon turpuk on, masa mangarade haroro ni Jesus sekaligus do masa mamparsaulihon denggan basa dohot panarihonon ni Debata di bangsona. Nalnal do i taida molo talapati mansai bagas pandohan ni Lukas taringot tu kondisi ni bangso Jahudi uju dipungka si Johannes pandidi marbarita nauli dibariba ni batang aek Jordan. Secara politik dohot parugamoon tongon bangso Jahudi dalam kondisi naso denggan. Terjajah jala gabe tamu do nasida ditanona sandiri. Tarida ma i sian pandohan “Pasampululimataonhon hinarajahon ni Kesar Tiberius, uju Pontius Latus manggomgomi luat Judea, di tingki ni angka raja na opat on: Si Herodes di luat Galilea, si Pilippus, donganna saama, di luat Iturea dohot Trakonitis, si Lisanias di luat Abilene.” Secara agama, pe masa do naso hea masa. Somalna, sahalak do nagabe sintua ni malim/Iman besar di bagas joro. Alai hatiha i didok adong dua sintua ni malim ima Hanans dohot Kayafas “… uju si Hannas dohot Kayapas sintua ni malim”. Sintua ni malim i pe ndang mangulahon ulaonna jala ndang manguluhon nasida mangalo halak Romawi justru sabalikna pamora diri jala pahot harajonna ditoru ni huaso Romawi. Lumlam ngolu nasida hatiha i, alai taida ma, dalam kondisi na borat sisongon i, ro do Debata marhite si Johannes mamangkulingi jala manjou nasida tu hamubaon asa dapotan hasesan ni dosa jala malua sian hamaolon i.

On ma na paingothon hita di masa adven on ia dang dung dipasombu Debata jala dang dipangkulingi bangsoNa uju dihaholomon nang hasonangan pe. Ditonga ni hagolapon i, ro Debata mamangkulingi nasida. On ma siingotonta, tongon dibagasan hamaolon manang las niroha sai dibaritahon Debata do hataNa, patoguhon roha ni halak na tongon dibagasan hamaolon, manjou mulak halak naung manimbil, songon i nang paingothon halak na sonang asa unang mogap jala tarsulandit dihasonangganna. Antong, di minggu adven on tarjou do hita manghamauliatehon panarihonon ni Debata hala asa sae tinggil umbege hata ni Debata dipardalanan ni ngolu siganup ari.

Adven: Dijou jala dijumpangi Debata di halongonan

Huria ni Tuhan na hinaholongan dibagasan Jesus Kristus,

Hal napaduahon sihalashononta di masa adven ima haradeon ni Debata manjumpangi jala manjou hita di halongonan ni ngolunta on songon si Johannes na ditopot jala di jou Debata di halongonan ro ma hata ni Debata tu si Johannes, anak ni si Sakarias, di halongonan (2b). Rade do Debata manjumpangi hita manang na didia pe, uju peak hita di Rumah Sakit, di ruang isolasi, dipangarantoan, dlan. Rodo Debata manopot hita marhite ragam ni carana isarana marhite jamita, holong ni dongan, telepon ni parhalado, tangiang ni pandita, dlan. Asa di minggu adven on tahalashon ma ia ndang adong inganan na holip sian Debata na boi mangambati ibana manopot jala marsuru hita. Tung sahalak nisi Johannes pe dihalongonan i, tusi do ibana didapothon Debata jala mangalehon hataNa asa borhat mamaritahon barita hamubaon ni roha. Sadia dao pe hita martabuni, tu inganan na tung mansai sunyi pe hita tinggal asa unang taulahon parsuruon ni Debata tong do boi jumpanganNa hita.

Ihut tusi, saluhut jolma boi do pangheon ni Debata gabe suruanna laho parade haroroNa. Songon si Johanaes namian di halongonan i, dang ditanda jolma, ndang terkenal alai boi do di jou Debata. Alani i, ndang ingkon jolma naung terkenal, nabisuk, namarhuaso hita asa boi pangheon ni Debata gabe perpanjangan tanggana mambaritahon barita nauli i. Ido alana, unang marpainte jo mangulahon ulaon ni Debata. Alai tapatogu ma parrohaonata/kuat roh songon si Johannes na magodang togu parrohaonna di halongonan i (Pat. Luk 1:80). Boa do asa magodang jala togu haporseaonta? Manjaha jala mamparsiajari hataNa jala paholang dirim sian parange ni portibion jala gabe panondang dihaholomon.  Antong songon bukku ende 194 ima ngolunta on “anggiat ma holong rohangku sai tontong burju tu Ho. Sai dongananmu au manang tu dia lao sonang tutu. Amen.