Holong Na Paimbaru Roha
(Jeremia 31:31-34)
Huria ni Tuhan na hinaholongan dibagsan Jesus Kristus,
Godang ihot ni hubungannta di hasiangan on. Adong do na niihot ni parmudaron manang paradatan. Adong muse do na niihot ni parpadanan. Parpadanan i pe boi do marragam. Adong do parpadanan ni budaya,isarana padan ni marga Siregar tu Naingolan, parpadan bidang ekonomi, politik, somal ma didok MoU (Memorendum of understanding/kesepahaman bersama); manang boi do didok kontrak manang perjanjian Kerja, dlan. Parjanjian on somalna parpadanan ekonomi/politik na saling menguntungkan. Somalna, molo adong na mangose parpadanan i sai adong do pinalti manang uhuman naung disepakati hian mannag na muncul dipudian ni ari.
Di ngolu siganup ari pe jotjot do nang hita marjanji/marpadan naeng rampak mangulahon sesuatu. Isarana marjanji asa rap lao tu pesta, manggallang mie gomak di simpang bakkara, rap borhat tu partangiangan, dlan. Sipata olo do dang tarulahon hita janji i dungi gabe tubu ma ungut-ungut manang sogo ni roha. Ai siose padan do hurua nasida ate? dang sitiopon hatana, haduan dang olo be iba mambege janji ni i, ninna rupani. Alai diginjang ni saluhutna i, adong dope parpadanan na asing ima parpadanan ni parrumatanggaon. Parpadanan on ndada holan ihot-ihot na saling menguntungkan, alai parpadanan na badia na paihothon sada boa dohot parompuan tu parrumataanggoan na badia i. Napasadahon nasida na dua ditoru ni huaso ni Debata. Ho ma dia au, au ma diho hita na dua, hita nadua gabe sada. Au ma Amantam ho ma inantangku. Manang sabalikna, Au ma inantam ho ma amantangku. Ai dok hata ni Debata na dua i gabe sada jala na pinadomu ni Debata ndang jadi sirangon ni jolma.
Padan na mangihot hita dohot Debata.
Hurian ni Tuhan na hinaholongan dibagasan Jesus Kristus,
Sian sude model hubungan dohot parjanjian na mangihot i, parpadanan dia ma na mangombarhon hubungan nang parpadananta tu Debata? tontu ndada parpadanan ekonomi manang kontrak kerja. Napaling tengen ima parpadanan ni parrumatnaggaon. Ndada parpadanan naholan saling menguntungkan alai parpadanan nabadia. Ido binna di hata inggris, parpadanan dohot Debata ndada sebatas agreement, alai covenant, parpadanan na badia. Ala ni i, dang boi pandang enteng hita disi. Ai Debata sandiri tung mansai serius do di padan na i jala naso oseonna. Ido alana di dok ndang ramunangku padan na hubahen i, jala dang ubaonku na ruar sian bibirhu (Pslm. 89:35).
Sian mula ni panjouon ni bangso Israel (marhite panjouon nisi Abraham) gabe bangso ni Debata diihot do i marhite parpadanan marhite tanda parsunaton. Isi ni parpadanan i ima : Ahu gabe Debatam dohot Debata ni pinomparmu sogot (1 Musa. 17:7) jala nasida gabe bangso ni Debata. Parpadanan on diuduti ma muse marhite manogos patik na sampulu i na disurathon di dua loh batu na manghangkam padan holong ni roha maradophon Debata nang dongan Jolma. Dung sahat nasida di tano Kanaan, marhite si Josua marpadan do muse nang bangso i asa holan manomba Jahowa songon Debata nasida. Napatuduhon hubungan nasida tu Debata songon hubungan suami Isrtri. Debata ma nagabe ama (Suami), bangso i ma na gabe ina (istri).
Alai dipardalan ni bangso i jotjto do nasida mangose padan i dungi manomba sombaon na asing. Dihata na asing boi ma didok berselingkuh secara rohani! Pangalaho na mangose padan i do nang na dipatudu di turpuk ta on ai dok hape di ose nasida do padan na hubahen i, atik pe Ahu harajaan nasida nian, ninna Jahowa (Jer 31:32b). Parange nasida na mangose jala dang talup mangulahon padan i mangkorhon panguhuman sian Debata. Dipartingkian nisi Jeremia, diroksokkon bangso Asyur ma Israel Utara tain 722 jala diroksokkon Babel ma Yehuda ditoan 587 jala diboan tu habuangan, dalan ni Debata maminsang huhut papolinton holong nang haporseaon nasida.
Parpadan Naimbaru: Halambason ni roha ni Debata.
Huria ni Tuhan na hinaholongan dibagsan Jesus Kristus,
Tung pe diose bangso i padan i alai anggo Debata ndada pintor putus rohana dungi maninggalhon parpadanan i. Manongtong do diingot Debata parpadanan i suang songon i nang angka parenta na nihatahonNa hian (pat. Pslm 105:8). Marhite i, dang dipasombu Debata bangso i magopo saleleng ni lelengna di habuangan i. Sian lambas dohot haolong ni rohaNa disuriranghon do napaimbaruon ni Debata parpadanNa dohot bangso i (ay. 31) asa tung mulak muse nasida gabe bangso ni Debata. Dison ma dipatudu naso monoton sikap ni Debata, alai dinamis jala kreatif. Alai ingot ma hita, kedinamisan ni Debata di padan na i, ndada gabe na mubauba manang mencla-mencle Debata di hataNa. Secara Prinsip hot do Debata di hataNa nang holongNa alai dinamis dinamamboathonsa.
Kedimanamisan i tarida ma marhite haradeonNa pahot padan na imbaru singkat ni padan naung di ose bangso Israel. Molo tapamanat turpuk ta on di ayat 33 didok Ai on do padan sibahenonku tu pinompar ni si Isral dung salpu angka arion, ninna Jahowa: lehononku ma patikku tu bagasan ateate nasida jala surathononku di i tubagasan roha nasida, asa ahu gabe Debata nasida jala nasida gabe bangsongku. Sian on, isi jala tujuan ni padan naimbaru i sarupa do dohot padan naparjolo na niihotna dohot ompu nasida ima Ahu gabe Debata nasida jala nasida gabe bangsongku. Alai teknis na ma na dipaimbaru. Molo tu ompu nasida di lehon patik na marhite sunat dohot tarsurat di batu (dua loh batu) saonari lehononna i diroha nang ateate nasida. Asa unang be diduru ni ngolu nasida patik dohot padan i alai mian dibagasan roha jala mangula sian nasa roha nasida. Dohot hata na asing surathononton ni Debata ma i diunok ni hangoluan nasida. Jempek dohonon ndang na disesa manang dipamago Debata parpadanan na parjolo i alai dipaimbaru. Marhite na dilehon jala disurathon Debata i diroha nasida, dang dung adong be sian bangso i naso mananda Debata. Sude horong ni jolma na metmet sahat tu namagodang saluhut mananda Jahowa (ay.34. a). Hata mananda Debata dalam konteks ni panurirang Jeremia ima mengakui tuntutan tuntutanNya atas kehidupan manuisa, memberi respons kepada KasihNya dan menaatiNya.
Ondo nataingot nang dung masuk hita tu barita di padan na imbaru marhite haroro ni Jesus sipalua i. Nungga boi be hita parsidohot gabe bangso ni Debata natape ndang halak jahudi hita na ingkon marsunat. Ai tanda ni naung bangso ni Debata hita tajalo do i marhite pandidion nabadia. Ido binna didok dipasupasu uju na tardidi hita. Didok pandita do: ”Sai diramoti jala dipasupasu Debata ma ho diari habobongotmon tu harajaonna rodisalelengnilelengna. Asa molo pe dihatai di bukku nabadia isarana bukku Galatia taringot tu parsunaton, dipatorang si Paulus ma ia parsunaton na nihalomohon ni Debata iama parsunaton ni roha. Hamuaboan ni roha na paihothon dirina tu Debata.
Sian sikap ni Debata na dinamis alai hot diprinsip dasar on, mangonjar asa hita pe rade ma manjangkon hamubaon jala mangulahon hamubaon. Unang sai hot dipangantusion na mamang unang sai parhata sada. Rade ma hita memperbaharui diri hombar tuangka situasi dohot konteks na taadopi alai unang sampe manggade hasintongan. Memperbaharui diri dalan manopa hadengganon tu diri nang tu humaliang tung ingkon siperjuanghononta do i sahat rodi bagasan ombas on.
Padan Naimbaru: Padan Hasesaan Ni Dosa
Huria ni Tuhan na hinaholongan dibagasan Tuhan Jesus,
Boasa ingkon dipaimbaru Debata parpadanan i? ala ni holong ni roha ni Debata naso marpansohotan i do. Ai natape diose bangso i padan i alai ndang dung gabe ditinggalhon Debata nasida. Hansit do nian na diseleingkuhi secara rohani jala dang tung dihalomohon Debata i, alai talup do Debata marpamuati dirohana. Ido binna didok diturpuk on ai marpamuati do sogot rohangku mida hajahaton nasida i, jala dang ingotonhu be dosa nasida i (ay.34). Tangkas ma sian on taida tujuan ni haimbaruon ni padan i ima: Hasesaan ni dosa. Onma na dihangkam secara singkop marhite haroro, hamatean dohot haheheon ni Tuhanta Jesus. Haroro dohot partinanonan ni Jesus di hau pinorsilang tudutudu doi tu nadiramoti Debata jala na rade do Ibana mengintervensi ngolunta marhite holong nirohaNa na tung mansai bagas i. Dihau pinorsilang ido hita pajumpang dohot Debata, manesa dosanta, jala mandongani hita uju mangadopi ragam ni hamaolon, kecelakaan, parsorion dohot ketidakadilan natae. Jala marhite haheheonNa dilehon ma ngolu naimbaru tuhita asa unang putus asa alai manongotng marlasniroha nang marpanghirimon.
Ingot ma hita, manongtong do Debata gabe Debatanta, jala tung naso tadinghonona hita. Alani i unang tung pola ganggu hita tung aha pe na masa jala nataadopi. Marsihohot ma hita marposniroha unang ganggu mandalani ngolu siganup ari. Halak na marnampunahon Debata dingoluna ndang porlu mabiar maradophon aha pe, dang porlu ganggu jala unang talu maralohon aha pe. Alai dang sae antong holan mandok Debata gabe Debatangta ingkon mangihut do muse na paduahon ima hami/ahu bangso ni Debata. Ai dang tung singkp manang sintong molo tadok isarana tu pardijabunta: homa nagabae parsinondukku namangulahon tugas dohot tanggungjawabmu, alai ahu dang olo gabe sinondukmu na burju. Manang tadok tu natorasna: hamu ma nagabe natorashu na maparmuduhon ahu sahat tu na sukses alai anggo ahu dang olo gabe anakmuna. Di koneks ni gareja tadok: hamu ma pandita manang sintu na burju di hami, alai hami dang olo gabe ruas na burju tu hamu.
Ido alana molo tadok Debata do na gabe Debatata (namarlapatan Debata nagabe batu partanobatonata, mual jala ujung ni ngolu, mual ni panghirimon, jala hasisingkop ni makna ningolunta) antong gabe Bangsona na burju ma hita. Carana boa? Marroha naimbaru, marhangoluan naimbaru songon halak naung disesa dosana. Ai halak naung disesa dosana tarida doi marhite roha maulite jala naso mian jala manguolu be di hadosaon i. Ido beda ni Padan na robi dohot padan naimbaru. Parasingan i ndada marhaojahan tu nasda mardasor/berpegang tu kitab 1 Musa sahat tu Maleaki nasada nari marsitiopan tu Injil Matius sahat tu Pangungkapon. Dang i. Mangolu di padan na imbaru marlapatan do mangolu dibagasan roha naimbaru. Ngolu ni partodion dohot parugamoon i tutu situtu marmual sian ias ni roha dohot roha na ias.
Tajanghon ma holong ni roha ni Debata na tung lambas jala naung paubahon parpadan i asa dapotan hasesaan ni dosa hita marhitehon na mangolu hita dibagasan hamubaon ni roha. Taulahon ma nasa na boi taula lumobi ma angka ulaon nadenggan sian ias ni roha. Martangiang sian ias ni roha ndada dalan laho pamer. Marsilehonlehon sian ias ni roha ndada laho paburnang diri. Mengampuni sian ias niroha ndada holan dibibir sambing. Manghobasi di huria sian ias niroha ndada asa songon na burju diida jolma. Mangulahon ulaon siganup ari sian ias ni roha ndada asal mangula buti.
Antong dimasa prapaskah na tadalani saonari, hohom ma hita sumolsol bagi diangka pangalosionta mangose padanta dohot Debata, tabutbut ma urat ni pangalaosion i huhut ma tajanghon asiniroha ni Debata na parade haseaan ni dosa i huhut manjangkon hita mulak gabe bangsoNa. Margogo ma hita mamparsaulihon holongNa jala mangihuthon Ibana dibagasan haimbaruon ni roha nang hagogoon ni Tondi Porbadia. Ingot ma hita dang dung tinggalhonon ni Debata hita jala na rade do Ibana paimbaru padanna dohot hita. Alani i unang mandele, unang mandao. Amen.
Tidak ada komentar:
Posting Komentar