Jamita Partangiangan Rabu, 24 Februari 2021 1 Petrus 3:18-22

 

Marhagogoon Manahan di Haporsuhon

1 Petrus 3: 18-22

Huria ni Tuhan na hinaholongan dibagasan Jesus Kristus,

Songon naung somal tabege, diminggu nasalpu di sada partingkian manikkir na monding hami, soluk do sukkun sukkun ni sahalak ama tu hami na mandok: Boasa boi angka naporsea, namangulahon nasintong, na satia tu Jesus mangadopi haporsuhon/penderitaan? Memang, mulai sian hajongjongan ni huria naparjoloi i, nungga tarbege sukkun-sukkun sisongon i. Ai jotjot do tarajumi, molo halak na porsea, satia, dang tung be nian manaon haporsuhon. Halak parjahat siulahon dosa do nian naingkon manaon haporsuhon songon uhuman ni hajahatonna. Pangantusion sisongon i ma na manggangu haporseaon ni jolma sahat tu ombas on. Jala laos godang do hinorhon ni i gabe mulak manundalhon Debata.

Songon i do nang namasa di huria naparjolo i uju digurithon si Petrus bukku 1 Petrus on. Hinorhon ragam ni haporsuhon na marrumanghon penganiayaan, ketidakadilan, dlan, sian penguasa dohot halak naso manghaporsea i Jesus. Sialani i, diapoi, diapuli huhut dipatogu Apostel Petrus nasida asa marsihohot huhut patuduhon naung dipaimbaru ngolu nasida marhite na mangolu di habadiaon jala gabe tiruan dingolu siganup ari songon bangso ni Debata natarpillit. Disosoi do huria i asa marnida hamaolon i songon dalan laho patanghon haporseaon ndada laho paganggu haporseaon. Marhite siani, disosoi ma huria i asa mangadopisa dibagasan habengeton nang hasabamon songon naung pinatudu ni Kristus uju manean huhut tumaluhon haporsuhon i marhitehite hatigoran ni panguhum  sitigor roha i.  Ido nang na taida di turpuk jamita borngin on di partangiangan parjolo dung tamasuhi masa Prapaskah marningot pardalanan ni Jesus manaon hapursuhon sahat tu hamatean nang haheheonna. Sian turpuk on boi do hita marsiajar boa do asa rade jala margogo hita manahan dihaporsuhon na taadopi siganup ari

Haporsuhon ni Jesus tiruan dihaporsuhonta.

Huria ni Tuhan na hinaholongan, di minggu Prapaskah on, dirajumi do ia  parsorion natinaon ni Jesus boi mangurupi hita marhagogoon dibagasan haunduhon manaon haporsuhon na taadopi di partingkian sisaonari on. Molo pe nungga taulahon na dengggan, na sintong hape tong manaon haberniton ndang tung pola gabe mandele hita bahenon ni i. Ala songon na dipanadar diturpuk on, ditaon Jesus do haporsuhon pola sahat tu hamatean ndada hinorhon ni dosa manang hasalaanNa, alai ala ni dosa ni jolma do (ay. 18a). Atik pe boi do nian tulahonna haporsuhon i, marhite namandok ai so marsalah ahu, bosa ingkon taononku naporsuk i? alai rade do Ibana manjanghonsa ala sangkap ni Debata do i. Dison ma taida, rade pihak na sintong/tigor i manaon naporsuk humokkop angka pargeduk. Aha tujuanna? asa ditogihon hita tu Debata. (ay. 18).  Ai dosa do na padaohon hita sian Debata alai haporsuhon dohot hamatean ni Jesus si sahali i do na manogihon, pajokhon hita tu Debata. Asa marhite i, aha pe haporsuhon na taadopi ndang tung hea dao Debata alai jonok jla rap dohot hita. Asing ni i, gabe boi ma tadok, molo pe mangadopi hamaolon angka na burju uju mangulahon natigor, dalan ma i pajonok diri tu Debata, unang sabalikna!

Molo Jesus sandiri pe di hasiangan on ndang bebas/malua sian penderitaan, dang tung adong dalanta naeng malua sian i. Molo rade Jesus manaon haprosuhon hinorhon ni dosanta, boa dang talup hita manjangkon parsorion ni ngolu dalan laho patanghon haporseaonta?  Alani i molo rope sukkun-sukkun ditonga diparsorion, isarana hinorhon ni Korona, boasa dohot angka naburju jala na porsea manaon naporsuk jala sampe mate alani korona? ala ni dosa na do i? dohononta ma  ndaong manang paling tidak belum tentu ala ni dosa.  Alai natape ndang mardosa halak naporseai, ndada holan naeng manjanghon surgo dohot hasonangan, alai naingkon do nang rade manaon haporsuhon huhut manaluhonsa. Jala dao do tumagon manaon naporsuk alani na mangulahon hasintongan daripada alani na mangulahon naroa. Ido binna diuduti Apostel Petrus di bindu 4: 1 mandok: "Antong, ala naung marsitaonon Kristus di dagingna, roha sisongon i ma gabe sinjata nang di hamu, ai na mansohot mardosa so halak na mangahap di dadingna"

 Hamonagan Maralohon haporsuhon: Haheheon dohot Hamuliaon ni Jesus

Huria ni Tuhan na hinaholongan, turpukta sadarion ndada holan patuduhon haunduhon ni Jesus manaon naporsuk alai diuduti do nang papatarhon hamonangan ni Jesus manaluhon haporsuhon dohot hamatean i. Natape tarbunu daging na, alai dipangolu do tondina (ay. 18). Ditaluhon do hamatean i marhite haheheonNa huhut bongot tu hamuliaonNa marhite namian  di siamun ni Debata do Ibana, dung laho tu banua ginjang, gabe marundeuk do tu Ibana angka surusuruan, angka gomgoman dohot angka hagooon (ay. 21d-22). Sian pandohan on, tangkas ma taboto sude do unduk tu huasoNa diujungana. Molo ditaon Jesus haporsuhon i dungi bongot muse ti hamuliaon, ndada i do na manaruhon hita asa marhasabaron/marhasabamon di tonga ni ragam ni hamaolon nang haporsuhon di hasiangan on, termasuk ala ni Korona? hamaolon dihasiangan on parsatongkinan do ai ihuthononta do Jesus tu hamualiaon i sogot, molo marhaunduhon jala marsihohot hita.

Molo manaon haporsuhon Jesus asa diboan hita tu Debata, antong taida ma angka hamolon namasa dingolunta lumobi angka namasa naso binahen ni dosanta, songon dalan laho mamboan hita mulak tu Debata. Unang sabalikna! Molo sahat tu hamuliaon i do Jesus dung manaon nasa ragam ni haporsuhon, haleaon na tung mansai bagas, ido mampargogihon hita asa unang mandele, alai manongtong marpanghirimon ia dung salpu angka hamaolon nataadopi, sahaphononna do tu hita hamuliaon na mangatasi hasiaangan on. Ingot ma hita dipandohan habis hujan namapak pelangi.

Halambason ni roha ni Debata

Huria ni Tuhan na hinaholongan dibagasan Jesus Kristus,

Halambason ni roha ni Debata ndada holan marhite haradeon ni Jesus manaon naporsuk humokkop hita. Alai sian mula ni hasiangan on pe nungga dipatudu Debata halabason ni rohaNa humokkop jolma pardosa i. Diturpuk on, dipaingot do huria na parjolo i, dihalambason ni roha ni Debata uju masa nisi Noak. Dijou jala di paima Debata do pardosa i asa anggiat muba jala mulak manopot Ibana. Dipauli do marhite si Naok parau nabolon asa unang maup jala mago jolma i, dipaima alai dang ra muba jolma i, asing ni si Noak dohot pinomparna. Gabe holan ualu halak do namalua dihatiha i ala ni jogal ni rohana be. Lambas do asiniroha ni Debata alai jogal roha ni jolma i huhut ndang marnida dihabasaon i. Alani i, sangkap haluaon na pinarade ni Debata ndang boi diparsaulihon nasida. Alai si Noak, natape sintong ngoluna, taboto do direhei, diinsahi, dipaotooto natorop i do ibana ala pature parau di atas dolok. Didok natorop ido naung senu/gila ibana. Alai nangpe songon i nang sumurut ibana dinamangulahon parsuruon ni Debata sahat tunasimpul parau i. Hasilna, malua ibana diparsihohoton i, magopo angka natotop i dihatangkangon ni rohana.

Halambason ni roha ni Debata, ndada olat ni i. Dihaholongi Debata do nang angka parjahat dimasa ni si Noak i asa anggiat nian dapotan haluaon nasida. Ai sangkap ni Debata ndada hamagoan tung haluaon do. Ido alana, dipatorang nang diturpuk on  dung mate Tuhan Jesus, dibagasan tondi i do ibana laho marjamita tu angka tondi na dibagasan hurungan i, angka naso mangoloi najolo, dinamaimaima lambas ni roha ni Debata uju diangka ari ni si Naok.(ay. 19-20). tung mansai lambas do roha ni Debata ai olo dope parade tingki nang kesempatan tuangka nuang jumolo i asa marhamubaon, ditopot jala di jamita i. Laos on ma na mangalusi angka sukkuksukun na mandok boa do angka ompunta najolo na mangolu uju so ro dope Jesus manang uju so sahat dope barita nauli tu luatta on? magopo do nasida hape dang hea dibege taringot tu Jesus? pandohan on ma na paingothon hita di huaso ni Debata dang dibatasi RUANG DAN WAKTU.  Ndada holan di portibion alai dohot do nang tu hamatean i. Ndada holan najolo, alai sahat do tupartingkian on nang tu ari sogot pe.  Marhuaso do Jesus manjamitai angka naung monding i ai tuat do ibana tu banua toru, tu hamatean i, dungi pe ditaluhon marhite haheheonna. Alani i, tumagon do hita manaon naporsuk di hasiangan on alani na mangulahon nasintong daripada manundalhon Debata dungi masuk tu hurungan i.

Tung sihamauliatehononton do halambason ni roha ni Debata huhut ma tatiru asa gabe halak siparlambas roha nang hita. Ihut tusi, marnida halambason ni Debata i, tontu ingoot ma hita dang adong hata tarlambat marhamubon salaleng adong dope hosa hangoluanta. Nungga tabege barita nauli i, dang adong be sidalian haduan ndang hea tabege uju ngolunta.  Alani i, ingot mamamakke partingkian naadong saonari laho mulak jala mamparsaulihon denggan basa dohot halambason ni rohana. Dimasa prapaskah on, tatopot ma ibana, tasolsoli dosanta, huhut tapatuduhon ma parange na marsihohot di hataNa natape ragam hamaolon na taadopi saonari. Jala ingot ma hita didongani Debata do hita jala talup do Ibana paluahon hita.

Haluaon nisi Naok dohot haluaon ni Halak na porsea

Huria ni Tuhan na hinaholongan dibagsan Jesus Kristus,

Haluaon napinatupa ni Debata uju masa nisi Naok marhite Parau napasiding si Noak dohot angka panisi ni jabuna hatiha i, diida si Petrus do i songon tudosan ni Pandidion nabadia napaluahon naporsea. Didok ibana Ido tudosan ni pandidion i, napaluahon hamu nuaeng (21). Molo dipalua Debata si Noak naporsea jala unduk tu parsuruon ni Debata sian aek na sumar marhite parau i, dipalua Debata ma angka naporsea i marhite pandidion nabadia i. Marhite na bongot si Noak tu parau i, ndada sarombang be ibana dohot angka parjahat di hatiha i, songon i ma nang angka naung tardidi i, dang sarombang be dohot angka parjahat na mangulahon naso nihalomohon ni Debata. Sian i, manang na ise naung tardidi jala marhaunduhon naung saparau do hita rap dohot Debata, jala na talup mamolus angka galumbang ni aek haporsuhon nataadopi. Alai ndada holan asal tardidi. Ai pandidion ni ndada songon na mambalingkon na rotak sian pamatang, alai na tapangido do disi tu Debata panggora ni roha, na so olo manolsoli be, hinorhon ni haheheon ni Jesus Kristus (21). Pandidion i ndada holan paiashon pamatang songon na martapian siganup ari alai lumobi ma haiason ni roha nang parniulaon pe. Marhite pandidion i do sarombang hita tu hamatean, haheheon dohot hamuliaon ni Debata.

Ihut tusi, natape holan ualu halak na mangoloi Debata di masa nisi Noak alai tung dipalua Debata do. Alani i, molo pe ummotik/minoritas halak na porsea asal rap dohot Debata diujungna nasai monang jala malua do. Ido alana unang pola gabe paihut halak natorop hita, alai hot ma di Debata. Ido alana, dang manongtong suara torop suara hasintongan!

Marhite hinalambas ni roha ni Debata napinatorang ni Apostel Petrus di turpuk on, patarma taida Huaso dohot Padan ni Debata diportibion na marhaujungan tu HANGOLUAN ndada tu HAMATEAN/HAMAGOAN. Alani i, ganup halak namanagam di hangoluan jala pasiding hamagoan diihuthon ma Debata dihaporshuon nang dihasonangan pe. Molo pe sai soluk sukkun sukkun boasa manaon naporsuk angka na porse jala siula hatigoran i, ingot ma hita namangihuthon Jesus do hita. Alani i, rade ma hite marsitaonon songon Kristus alani na mngulahon nasintong unang ma alani ulaon na roa. Jala tapeop ma hata ni Debata namandok  Ai tagonan do, hamu manaon haporsuhon alani ni ulaon na denggan, molo tung i lomo ni roha ni Debata; unang ma ala ualon na roa (1 Pet 3:17). Antong mulak ma hita tungolu siganup ari, marposniroha mangulahon hatigoran natape ingkon manaon haporsuhon alani hatigoran i. Ingot didongani jala pamonan gon ni Debata do hita. Amen.