Mangendehon Hamonangan
Pangungkapon 15:1-4
Huria ni Tuhan na hinaholongan dibagasan Jesus Kristus,
Ndang adong sada pe jolma dihasiangan on naso hea mangadopi pangunjunan/godaan. Ragam do rumang ni pangunjunan i. Isarana, halak nanaeng burju, jujur boi do diunjuni/digoda sibolis i marhite naso didongani angka donganna. Halak naeng ringgas marminggu diunjuni marhite insak-insak ni donganna, ehe unang pola pasintuasintuahon hita on dongan ninna, rupani. Naeng martangiang pintor tubu losok ni roha. Adong do muse pangunjunan i marrumang haporsuhon isarana parsahiton, hamaolon ni ngolu, pandaraman na sumurut, parange ni angka parjahat, dlan
Pangunjunan boi do mambahen jolma naporsea gabe sumurut dihaporseaon dungi sundat mangulahon. On ma halak na songon karupuk jange, holan diantuk langsung maropuk. Alai adong do nang halak naporsea na marsihohot natape godang angka pangunjunan diadopi. Dang olo talu alai marsihohot natape ingkon martaru hosa dang olo maninggalhon haporseaonna. Lam godang pangunjunan lam timbo nang hanunuton dohot pos ni rohana di Debata. On ma halak na songon bola. Lam gogo diantuk lam timbo manimbung. Angka jolma sisongon i ma na godang marujung ngolu secara Martir. Mate ala mampartahanton haporseaonna di Debata. Naeng ma nian hita marparange sisongon i unang songon karupuk jange ate.
Maol do mampartahanton haporseaon di tonga ni hamaolon? Maol alai ndang marlapatan i dang boi ulahononton. Memang, ragam do na boi mambahen martahan jolma dihaporseaonna di Debata ditonga ni angka hamaolon nang pangunjunan. Alai soanari tadok maju dua hal. Naparjolo panghirimon nang panatapanna tu jolo. Isarana, boasa boi angka natuatua marsori mangula ulaon? ala adong panatapanna dihamajuon ni ianakhonna. Boasa manongtong halak tau mangurus jolma na marsahit pola sampulu taon lelengna dang sadar jala koma? ala adong panghirimona na sadar do muse nahinaholonganna i. Alani i, saleleng so tos hosana, tung denggan do di rawat. Napaduahon, Adong do muse martahan jolma dihaporseaon nang dihaporsuhon ala diingot pambahenan ni Debata nang angka namangkaholongi ibana diari naung salpu. Isarana boi do togu roha ni angka iananghon mangurus natorasna na peak dipodoman ala diingot nasida holong ni roha nang pambahenan ni natoras nasida i uju metmet be nasida. Natape maol perekonomian alai sai diusahahon do mamboan natorasnai marubat boama asa marhamalumon. Rotak jala bau pe natoras na i dang diterge i jala dang gabe dipasiding. Molo pe diujungna marujung natorasna i alai marhamonangan do nasida manaluhon pangunjunan asa pasombuonna natoras na i.
Huria ni Tuhan na hinaholongan dibagasan Jesus Kristus,
Hal sisongon i ma na dipatuduhon di turpuk jamita dipartangianganta borngin on na dienet sian bukku Panungkapon 15:1-4. Songon naung taboto konteks ni bukku Pangungkapon on ima na tongon mangadopi hamaolon angka huria naparjolo i ala ni penindasan dohot pengekangan na binahen ni pamarenta hatiha i rap dohot angka nasoporsea di Debata. Dipasipal do nasida pola godang halak na mate martir, diorai mamuji Debata pola ingkon martabuni nasida laho mamuji Debata, diorai marbarita nauli dohot manjaha hata ni Debata pola ingkon gabe godang digurithon barita nauli dibagasan bahasa simbolik, dlan. Laho mangapuli roha huhut patuguhon haporseaon ni huria i asa manongtong marsihohot mangadopi hamaolon i digurithon si Johanes ma turpuk on tu nasida. Dua rumang ni alasan na mambahen martahan jolma i manaon haprosuhon songon naung pinatorang nagkin dihangkam do di turpuk on. Ima panantapan tu nanaeng masa sogot suang songon i manatap/marningot dinamasa diangka partingkian naung salpu dalam bentuk Pangungkapon.
Manonton panguhuman ni Debata di ari sogot
Di ayat 1-2 turpuk on, Sian Pulo Patmos digurithon si Johaness ma Pangungkapon ni Debata tu ibana. Diida ibana ma tanda dibanua ginjang. Tanda na balga jala halongangan: Adong ma pitu surusuruan, na umpeop pitu haporsuhon na parpudi; ai dibagasan ido marujung rimas ni Debata (ay.1). Pandohan on patuduhon na tigor do Debata diuhumna. Ditingkina, uhumonna na do saluhut portibion hombar tu haporseaon nang parulaon nasida. Sude naso porea jala parjahat dapot rimas ni Debata do i. Digombarhon ma i diturpuk on na ditiop jala naeng saburhonon ni pitu surusuruan ni Debata. Ima rimas dohot panguhuman ni Debata na parpudi jala na singkop. Asa joujou do tu hamubaon ni roha do nang barita on tu angka parjahat i anggiat ditinggalhon dalanna asa unang hona uhum. Songon dia rumang ni pitu haporsuhon i boi taida di bindu 16.
Alai anggo halak na marhamonagan na manahan sahat rodi ujung i dang manaon haporsuhon i alai ditonton nasida ma panguhuman i mangonai angka parjahat i. Didok di ayat 2: Jadi hudia ma laut sada songon sorminan, na marsaor api; na jongjong do ditopi laut sorminan i angka naung monang maralohon binatang i nang taringot tu gombaranna dohot bilangan ni goarna, ditiop do angka hasapi ni Debata. Dibukku pangungkapon, laut sada gombaran do i tu malapetaka, ancaman, huaso hajahaton, dohot hamatean. Api martudutudu doi tu dua hal ima panguhuman ni Debata dohot pangaramotion ni Debata. Panguhuman tu angka parjahat pangaramotion tuangka na porsea. Sialani i molo didok diturpuk on jonjong ditopi laut na marsaor api i angka nuang monang i martudutudu doi tuangka naporsea jala marsihohot uju diportibion maralohon ragam ni hamaolon nang hamatean alani haporseaonna. Natape ingkon mate martir nasida humokkop haporseaon i alai diujung na monang do nasida. Boi do dibolus nasida laut i jala ditonton nasida ma angka parjahat i disurbu api rimas dohot panguhuman ni Debata.
Gombaran on paingothon huria dihatihai nang hita pe dihamonangan ni halak Israel na niuluhon nisi Musa manaripari laut rara. Dilele parangan niraja Firaun nasida hape dijolona nungga bostang laut rara. Antara dua pilihan ma bangso i, molo so nasida mate di podang ni halak Misir, mardalan tu jolo mate gujop di tonga laut i. Alai basa do Debata dipatuduhon do huasona na so hadodoan i. Tolak dua do laut i dungi boi mardalan bangso i manariparisa sahat tu bariba. Dung sahat sude bangso i dibariba ni laut rara i, mardomu muse laut i jala mate marragean gojap parangan ni Misir i. Sude bangso Israel hatiha i jongjong do ditopi ni laut i huhut marnida/manonton panguhuman ni Debata dihalak Misir i.
Panatapan nisi Johannes diturpuk on bernuasa ganda. Panatapan tunanaeng masa sogot suang songon i panatapan na paingothon nasida dipambahenan ni Debata diari naung salpu. Ima antong na papos roha ni angka naporsea i asa margogo mangadopi hamaolon hatiha i. Laos ima na paingothon nang hita pe dipartingkian sisaonari on. Ingot ma hita diangka pambahenan ni Debata di halak na porsea di ari naung salpu i jala pos rohanta manatap tu jolo na jongjong do hita ditopian ni laut nang hamatean i molo sahat hita marsihohot jala marhamonangan sahat roti ujung ni ngolunta.
Upa Hamonangan: Marende Marlasniroha songon Musa di padan narobi
Huria ni Tuhan na hinaholongan dibagsasan Jesus Kristus,
Godang do cara ni jolma manghalashon hamonangan nanijalona. Alai dia pe i, sai na mangihut do parendeon dibagasanna. Isarana, marpawai pe pendukung niparbola ala monang tim na, tong do ingkon marende nasida di dalan na binolusna. Diturpukta on pe, dipanatapan nisi Johannes diangka namonang jala maniop hasapi ni Debata i, marrende do nasida mangendehon ende nisi Musa, dohot ende ni biru biru i. Dua ende i paingothon nasida tu hamonangan ni bangso Israel manaripari laut rara suang songon i nang hamonangan ni Jesus manaripari hamatean marhite haheheonNa. Marende do bangso Israeel rap dohot si Musa di topi ni laut rara i dung tolhas nasida dibariba jala diida nasida gujop sude parangan ni Misir i.
Songon i ma nang huria na monang i haduan marende di surgo dung ditaluhon nasida nasa ragam ni hamaolon i. Natape ingkon mate nasida diportibion jala di ida parjahati songon hataluan ni naporsea i on i. Alai anggo di Debata hamonangan do molo hot manuhuk silang sahat tu hamatean i. Ai ise na marende parpudi ido na monang. Ima nean na pahothon roha nang panghirimon ni huria na parjolo i suang songon i nang hita mangadopi angka namasa dingoluna. Tung boa pe sorat nisi taonon molo rap dohot Debata marujung do dilasniroha nang parolopolopon.
Dinamarende i nasida, diendehon ma pambahenan ni Debata angka nabalga, jala halongangan na pinatupaNa. Ihut tusi diendehon nasida ma hatigoran dohot hasintongan ni Debata songon raja ni angka bangso. Mangihut ma muse mangendehon habadiaon ni Jahowa dohot hatigoran ni UhumNa. Sian saluhut pambahenan ni Debata suang songon i nang hadirionNa i gabe marluhut do sogot nasa bangso tu jolona jala sude bangso manghabiari Ibana. On na ma hudok hami di jamita na diari minggu i nagabe alasan laho mamuji Debata ima Pambahenan ni Debata di ngolunta dohot hadirion ni Debata sandiri.
Tung mansai menarik do ende nasida i. Dang adong na mamuji diri dohot hagogoon na sandiri gabe marhamonagan nasida. Alai tung hibul do ende i mamuji pasangap Debata. Asa manang na aha pe hamonagan dohot kesuksesanta jumolo jala hibulma pamujionta tu Debata. Unang nian gabe madabu tu pamujion ni diri na marujung tu haginjangon ni roha. Ai haginjangon ni roha do sada rumang ni pangunjunan sian sibolis na boi mambahen madabu jala mandao hita sian Debata.
Huria ni Tuhan na hinaholongan dibagasan Jesus Kristus,
Tontu adong do nueng parungkilon nang pangunjunan na taadopi ganup. Ingot ma hita bagian ni ngolu on do haporsuhon dohot habot ni roha alani i unang gabe sumurut alai tajanghon ma i. Ai marhite na talup hita manjangkon haporsuhon dohot habotniroha i disi do boi hita marsiajar menemukan kembali harapan ditengah kegelapan. Antong, olo do hamu marende di ujungna dibagasan hamonangan na marolopolop? molo olo, marsihohot ma rap mardalan dohot Debata jala marpangkirimon dihamonangan ni Kristus asa tartaluhon hita saluhut pangunjunan/godaan nang dosa di tano on. Nasa ragam ni hamonagan dingolu on marharoron ma sian sian haporseaon tu Debata. Molo tongon siparjahat do hita nuaeng, dijouhon turpuk on do hita asa marhamubaon manadingkon dalanta da roa i jala rap mardalan dohot Debata. Ai ingot ma hita holan dibagasan Debata do hita talup manaluhon nasa pangunjunan nang dosa pe. Hinorhon ni i sai ingot ma hita mamuji Debata saleleng marhosa dope hita dihasiangan on. Amen.
Tidak ada komentar:
Posting Komentar