Haheheon ni Jesus
(Joh. 20:1-10)
Holong niroha dohot Hasatiaon tu Jesus
Huria ni Tuhan na hinaholongan dibagasan Tuhan Jesus Kristus,
Borngin on ma partangiangan sektor na parjolo tapatupa dunghon ari paskah. Alani do hata ni Debata namamanghulingi hita borngin on tong dope taringot tu barita haheheon ni Kristus i. Ganup taingot barita haheheon ni Kristus, huhut ma disi taingot harentaon ni angka parompuan i na ro tu tanoman dimanogot ni ari i. Molo diturpuk ta on holan si Maria Magdalena do na dibaritahon dang pola didok angka parompuan na asing isarana Maria Inang nisi Jakkobus, dohot Si Salome. Mangihuthon jamita di Jumat Agung nasalpu, laos nasida do na mangida Tuhan Jesus sahat tu na mate di hau pinorsilang i, natape manatap nasida sian nadao. Dipatudu nasida do hasatiaon dohot holong na tutu tu Jesus sahat tu hamateanNa. Bahkan dung mate Tuhan Jesus, nasida do nang na mangalaputi naringkot sibahenon tu bangke ni Jesus i. Borhat do nasida tu tanoman i laho mamiahi bangke ni Jesus songon bentuk penghormatan na parpudi hombar tu tradisi ni Jahudi hatiha i. Ditaon si Maria do ngali ni ari, ditondong nang nambur i, dipalao do hepengna manuhor angka na angur i. Tung tutu ma holong roha na di Jesus i. Holong ni rohana hot do natape nungga mate Jesus di hau pinorsilang i. Dang talup haporsuhon na disilang i, ngali ni ari dohot nambur, suang songon i panarik ni simalolong, mangambati ibana patuduhon holong dohot hasatiaonna tu Jesus. Kasih Maria melampaui kengerian kubur dan maut.
Holong na tutu dohot haporseaon di haheheon
Huria ni Tuhan na hinaholongan dibagsan Jesus Kristus,
Ringkot situtu do tahangoluhon holong ni roha na polin maradophon Debata songon na pinatudu nisi Maria i. Alai, dang sae holan holong ni roha di Debata, ingkon mangihut do tusi haporseaon di haheheon ni Jesus sian hamatean. Molo holan holong ni roha i do na adong di hita olo do madabu tu kekecewaan ganda songon na nialaman nisi Maria di turpuk on. Sabotulna, nungga tung kecewa jala dokdok rohana, magopu tondina hinorhon ni hamatean ni Jesus di hau pinarsilang i. Kecewa ma muse ibana uju diida ibana nungga magulang batu i jala dang jumpangsa bangke ni Jesus. Bobonosan ma ibana marpingkir tudia do bangke ni Jesus i jala didia boi jumpangan? hinorhon ni kekecewaan, kepanikan i marlojong ma ibana mamaritahonsa tu angka siseaan ni Jesus huhut ma didok: Nungga dibuat namambuat Tuhan i sian tanomanna; ndang binoto manang tudia di taruhon" (ay.2).
Kekecewaan ganda dohot haberniton na nialaman nisi Maria mambahen ibana ndang boi hantus jala tigor marpingkir. Ai gabe boi ditangko jolma Tuhan i? Tontu dang boi! Jala diturpuk on taida do angka tanda napatuduhon naso dibuat halak bangke ni Jesus i. Isarana, didia nasida do pangalilit ni bangke ni Jesus dohot sekka panaputi ni uluna denggan peak di tanoman i jala dibalun tu ingananna (ay. 5-7). Ai dang adong panakko na sanga manang lao rohana mamalun sekka dohot pangalilit i. Somalna, molo panakko do mambuat bangke ni Jesus ndada dohot do pangalilit i buatonna? Alai ala ni holong na sodiihuthon haporseaon di haheheonNa gabe dibuat ma Tuhan i sian rohana. Aut sura diantusi, diingot si Maria hata ni Jesus naingkon hehe ibana muse dung mate, peristiwa naung magulang batu i jala dang disi bangke ni Jesus gabe barita las ni roha bolon do i di ibana. Alai ala dibagasan habot niroha dohot tondi na magopu i dope ibana gabe hukhup ma barita haheheon i, gabe kepanikan ma naro. Jotjot nai habot ni rohanta i manghukupi roha nang pingkiranta tu hatigoran ni hata ni Debata.
Alani i, huria ni Tuhan na hinaholongan dibagasan Jesus Kristus, holong ni roha na polin tu Debata dohot haporseaon na tutu si tutu hehe ibana sian namate, ido mangalehon di hita hademahon, manamparhon biar ni roha, kepanikan, kekecewaan. Ido alana, molo tarayahon paskah merayakan hamonganta do nang i maralohon kekecewaan, kepanikan, dohot biar ni roha. Ido muse diudut ni turpuk ta on di ayat 11-18 dipatarida Jesus diriNa tusi Maria, asa unang magopo holongna tu Jesus alai asa mulak jala borhat ibana mamaritahaon haheheon i, mamaritahon barita las ni roha i. Unang nian sai mian si Maria di habot ni roha dohot kekecewaanna alai sabalikna marlasniroha ma. Marhite i ma tarayahon paska songon perayaan hamubaon ni habot niroha gabe silasniroha. Kekecewaan gabe panghirimon. Rodo si Maria tu tanoman i laho mangida hamatean jala dibagasan habot niroha, mulak mambaritahon hangoluan dibagasan las ni roha. Paskah menunjukkan perubahasan yang sangat radikal di tengah kondisi yang tidak biasa. Paskah menawarkan kehidupan ditengah kematian, menawarkan sukacita ganti dukacita, menawarkan ketenangan ganti kepanikan, menawarkan keteguhan ganti ketakutan, menawarkan nyanyian ganti tangisan.
Paskah: Ingot di Tradisi, Ingot hata ni Debata
Huria ni Tuhan na hinaholongan ni Jesus Kristus,
Mansai menarik do marnida kepedulian nisi Maria Magdalena dohot angka parompuan na asing na ro tu tanoman ni Jesus sogot dung simpul ari Sabbat i, ala diingot nasida di tradisi mamiahi bangke ni na mate songon bentuk penghormatan terakhir. Ndang salah nian nasida ala marningot jala mangulahon angka tradisi na denggan i. Alai adong na ringkot sipahusorhusoronta sada sungkun-sungkun ima: boasa dang adong nanggo sada sian parompuan i nang siang sisean ni Jesus namarningot pandohan ni Jesus uju di ngoluna ia naingkon mate do anak ni jolma i alai hehe di ari patoluhon? sude lupa di hata i!. Aut sura adong sahalak pe sian nasida namarngot hata ni Jesus i, tontu ndang pola bobonosan, panik, maringkati, bingung nasida uju ro si Maria paboahon naung kosong tanoman ni Jesus i.
Isarana rupani, mallojongi si Maria manjumpanghon si Petrus dohot sisesn na asing huhut mandok nungga dibuat na mambuat Tuhan i...Dungi dohonon nisi Petrus ma: "tenang jo, unang humarojor, buat jo hosam/tarik nafas da. Tenang ito da, dang na adong mambuat Tuhan i, alai naung hehe do Ibana sian na mate. Ai ido naung didok hian tu hita dangi? rap mambege do hita dihatiha i. Naingkon mate do ibana, dungi hehe diaripatluhon jala jumapanganna hita di Galiliea". Molo diingot si Petrus hian hata i, dang pola be mallojongi Ibana dohot sisean naasing tu tanomoan i laho mamastihonna. Alai jalo ma marlasniroha nasida ai tutu do hape hata ni Jesus i, jala borhat ma nasida tu Galilea asa jumpang nasda Jesus disi. Alai ala dang adong nanggo sada nasida marngot hata ni Jesus i, dohot ma si Petrus nang sisean naasing i garembor songon si Maria Magdalena. Boasa? ala gumodang dope habot niroha i manghungkupi roha nang pingkiran nasida! Malengleng dope ate atena mangopu nang tondi nasida. Holong do roha nasida di Jesus alai dang diantusi dang porsea dope nasida di haheheon i. Ido binna didok di ayat 9 Ai dang dope diantusi nasida hata ni Surat i namandok: Ingkon hehe ibana sian na mate.
Ido alana, parningotan haheheon ni Jesus paingothon hita asa tung mansai ringkot do hita hantus marningot angka tradisi na denggan isarana paias tanoman (mangarihiti) di masa Paskah. Boi do i dalanta patudu holong niroha nang hasadaon ninamarkeluarga. Alai huhut ma ingot hita diangka hata ni Debata taringot tupardalanan ni ngolunta ganup. Isarana, laho pe hita mangarihiti taingot ma hata ni Debata na Debata do mual ni angka pasupasu jala na tau sisombaon, unang unang be di udean i hita mangido pasupasu tu sumnagot ni ompung dohot mamele sipelen tu tondi ni naung mate i.
Di sisi na asing, barita paskah paingothon hita manang na aha pe naung dihatahon Debata sai mansadi do i jala dang diose. Natape, olo manang jotjot do hita manghalupahon hata ni Debata, alai sai ingot do Ibana di hataNA. Penggenapan ni hata dohot janji ni Debata ndang saguru diparningotanta di hata/janjiNa i. Alai saguru di Debata sandiri do. Natape dang diingot angka sisean i pandohanNa naingkon hehe Jesus sian hamatean, ndada gabe sundat Ibana hehe. Ima na tung sihalashononta sekaligus paingothon hita asa unang mura lupa di hata ni Debata molo pe tongon mangadopi angka hamaolon nang habot ni roha hita on.
Paskah: Sigop Marlojong Alai unang humarojor
Huria ni Tuhan na hinaholongan dibagasan Jesus Krsitus,
Tung tangkas do targombar diturpuk on parange ni si Maria Magdalena, Si Petrus dohot sisean na asing i mansai sigop. Sigop do si Maria marlojongi manopot si Petrus jala sigop si Petrus dohot sisean na asing marlojong tu tanoman i laho mamastihon barita nisi Maria i. Rap loja ma nasida na marlojong i alani na humarojor. Humarojor marlapatan ndang manat manangkasi namasa i. Aut sura manat nasida manangkasi tontu songon naung nidok diginjang boi dora ingoton nasida hata ni Jesus naingkon hehe Ibana diari patoluhon. Alai sabalikna do masa humarojor do nasida. Marlojong tanpa marpingkir aha do namasa! Ido binna dung sahat nasida di tanoman i linglung do nasida.
Sisean naparjolo sahat sian si Petrus, dang barani masuk tu tanoman i, holan manikkir sambing do dungi laos jongjong dipintu ni tanoman i dung diida peak angka pangalilit i disi (ay.5). Adong surung nisi Petrus, dung sahat ibana tu tanoman i masuk do jala diida ma naung tutu kosong tanoman i jala disi peak pangalilit dohot sekka ni bangke i (ay.6-7). Habaranion nisi Petrus mangojar sisean naparjolo sahat i asa masuk tu bagas tanoman i. Diida ma manasa i jala porsea ma ibana (ay.8). Dung diida nasida saluhutna mulak ma nasida nadua tu jabu (ay.10). Manguhuthon barita ni Lukkas 24:12, mulak do si Petrus sian tanoman i alai dibagasan halongangon marnida angka masa i di hata Indonesia di dok ia bertanya dalam hati apa kiranya yang telah terjadi. Borhat tu tanoman i dibagasan na humarojor, mulak dibagasan kebingungan.
Alani i, marhite pesta paskah on dipaingot do hita memang ringkot do hobas, sigop marbarita na uli diragam ni cara na boi tapatupa, alai ingkot manat jala bagas do nang pangantusionta diangka nataula jala natabaritahon. Ringkot do habaranion alai naeng ma diikuti pangantusion na denggan asa tung talup hita maralus molo tung adong angka sungkun-sungkun. Nang dibidang ni hangoluan na asing pe tung mansai ringkot do marniula dibagasan hamanaton pasiding parange na humarojor. Ai manang na didia hita humarojor, ndang apala dung denggan hasilna. Olo do holan patamba halojaon dohot angka ungut-ungut tahe. Antong tapasiding ma parange na humarojor sian ngolunta. Marsiajar ma hita manat jala mangarimangi angka na masa andorang so tabuat haputusan sipatupaonta. Diragam ni hamaolon nang dokdok nirohanta pe manat ma hita marpingkir jala mangarajumi saluhutna asa tung bagas jala sintong angka hata nang pambahenanta laho mangadopisa. Sai dipamonang jala di pademak barita haheheon i ma hita dingolu siganup ari. Amen.
Tidak ada komentar:
Posting Komentar