Jamita Partangiangan Rabu, 28 April 2021 Josua 1:5-8

 

Mangaradoti patik ni Debata

Josua 1: 5-8

Huria ni Tuhan na hinaholongan dibagasan Jesus Kristus,

Sude do hita manghirim paruntungan, keberhasilan, dohot hamuliaon di ngolu on jala ndang adong managam di harugian, kegagalan nang haleaon pe. Isarana paruntungan di ulaoan, keberhasilan ni usaha, parsikkolaan, parumatanggaon, panghobasion di huria, dlan. Alai tasadari manang dang, boi do panghirimon i mambahaen tertekan ngolu ni sasahalak apalagi ma paruntungan, keberhasilan dohot hamuliaon sipasautonna mangihuthon naung dipatupa naparjolo hian. Isarana rupani, songon pengalaman niba di huria on na mangganti Amang Pandita Hutasoit naung tarbarita berhasil jala marmulia panghobasionna. Tontu, ndada hal na neang dihami laho manguduti panghobasion nasida hian. Apalagi ragam do angka na hinirim ni ruas binege di acara serah terima uju i taon 2015. Boi do tertekan ngolu niba apalagi nasopola godang dope pengalaman namanguluhon huria. Pandita naposo, na metmet mangganti pandita na luar biasa. Borat do i alai ingkon do adopan.

Panghilalaan na hampir sarupa, natape lobi borat, dihilala si Josua do uju dilehon Debata tu ibana sada tugas na tung mansai dokdok, ima manguluhon bangso Israel dung hamatean nisi Musa! Marhabot ni roha dope si Josua di parmonding nisi Musa nungga diampehon tu ibana ulaon natung mansai borat. Borat ala ingkon udutanan ulaon nisi Musa naung tarida keberhasian dohot hamuliaonna mulai sian Misir sahat tu parmondingna i. Tamba ni i dang haru berpengalaman dope ibana, di tanda ibana do bangso Israel uju didongani si Musa manguluhon bangso i. Bangso na jugul, sijogal rukkung, tangkang jala parmungutmungut.

Alani i, boi tertekan do ngolu nisi Josua hatiha manjalo parsuruon i. Boa ma bahenonna manguduti panghobasion i? boa bahenonna mangadopi bangso si jogal rukkung i? boa muse ma bahenonna mangadopi angka bangso na asing pangisi ni tano Kanaan i? angka bangso naung terbentuk jala terlatih diparporangan huhut lengkap peralatan porang na? Alai ditonga ni panghilalalan sisongon i, mandapothon tingki manaripari Jordan roma tona ni Debata tu ibana songon na tarsurat di turpukta borngin on, pahothon rohana mandalani parsuruon i jala bagabaga diparuntungan, hamuliaoan, keberhasilan sian Debata.

Huria ni Tuhan na hinaholongan dibagasan Jesus Kristus,

Molo tapamanat turpuk ta sadarion adong manang napiga siulahonon nisi Josua nang hita pe asa maruntung jala berhasil angka ulaonta nang parngoluan siapari, dia mai?

Pos ni roha di pandonganion ni Debata (5).

Naparjolo sahali sitiopon nisi Josua nang hita pe molo naeng manguduti angka ulaon nang pardalanan ditonga ni ngolu on ima pos ni roha dipandonganion ni Debata. Ai didok Debata do tusi Josua  "Songon pandonganionku di si Musa, dongananku ho; dang tagamon pasombuonku manang tadinghononku ho". Onma napapos roha nisi Josua laho manguduti ulaon nisi Musa, natape borat, alai ala didongani Debata na talup do ibana mangulahonsa. Ondo nang na papos rohanami ujui manguduti panghobasion ni Pandita Hutasoit di huria on. ”Songon pandonganionku di Pdt. Huatasiot, dongananku ho;dang tagamon pasombuaonku manang tadinghononku ho" Ido na mian di rohanami ido molo diingot hamu uju i hudok do metmet pe sihapor dijujung do baringina. Metmet pe hami tuhukon do ulain on ala ni aha? di dongani Debata!. Pos nirohata dipandonganion ni Debata ido na talup margogoihon hita mamungka, manguduti ngolu on diragam ni angka hamaoloanna.

Di angka ina na baru mabalu, diianakhon nami na naeng mamungka tahapan naimbaru di parsikkolaan, diparsaripeon na imbaru, di parhalado/majelis naimbaru, dohot angka ulaon naasing, taingot ma na didongani Debata do manongtong do hita ganup naporsea. Alani i, unang mabiar, unang bobonosan. Ulahon ma ulaonmu, dalanani ma dalanmu rap dohot Debata tontu diujungna dapotan paruntungan jala hamuliaon ma hita! Pukka jala ujungi ma ganup ulaonmu dibagasan tangiang. Isarana diangka partigatiga, bukka jala tutup pintu sorong ni lapo/tokkom dibagsan tangiang unang dibagasan ungut ungut nang hamuruhon pe.

Tondi na Pir jala marsihohot (6)

Tung aha pe siulaonta jala naneng udutanta, hal napaduahon naringkot adong dihita ima Tondi na pir jala marsihohot. Ido nang hata ni Debata tusi Josua, Pirma Tondim jala Marsihohot. Molo tajaha olat ni ayat 9 pola do sampe tolu hali pandohan on didok Debata napatuduhon hinaringkotna. Dihata Indonesia didok Kuatkan dan teguhkanlah hatimu. Namarlapatan pos roha unang ragu jala unang gangu/jangan ragu dan jangan goyah. Natape halak nametmet do si Josua hatiha i namanggantihon si Musa na bonggal i unang tung ganggu roha na. Natape halak nametmet do ibana nadipasahat ni Debata ulaon na balga unang tung ragu manang gabe humitir ibana. Ai didok Debata  ai ingkon ho do marsagi tano on bahe partalian ni bangso on, na huuarihon tu ompunasida, lehononku tunasida. Jala laos ido memang namasa. Natape hera naso mungkin do bangso Israel nabaru haruar sian parhatobanan i talup manaluhon angka bangso pangisi ni Kananan naung mapan hatiha i, baik di ekonomi nang di strategi nang peralatan porang pe. Di taluhon nasida do i mardongan huaso ni Debata. Si Josua ma tutu marsagi tano kanaan i tu bangso i dung dibongoti nasida. Sanga mangkuling jala marbagabaga Debata sai tung manjadi do. Jala ndang adong naso tarpatupa Debata. On ma nang na papirhon tondinta manguduti ngolunta. Rap Debata manjadi ma angka na taula jala tartaluhon hita ma angka abat-abat nang ragam ni hamaolon.

Radot jala marsihohot dipatik ni Debata: Bertindak hati-hati  (7)

Pos niroha dipangaramotion ni Debata dohot tondi napir marmual do i sian Debata. Alai ndang sae holan i, naingkon radot jala marsihohot do mangulahon huhut patupahon na hombar tu patik ni Debata. Pandohan radot jala marsihohot dihata Indonesia didok bertindak hati-hati. Unang gumarapus, humarojor, alai ingkon manat, cermat jala punya perencanaan diganup angka ulaonna asa unang sala jala sumolsol dipudi. Molo diangka parsikkola, ringkot ma adong jadwal pribadi. Asa unang adong partingkian na dipansuasaehon jala unang adong langka nang haputusan na manimbil sian patik nang parenta ni Debata! Haradoton jala parsihohoton di Patik ni Debata, tarida ma i dihaunduhonna mangulahonsa dibagasan kedisiplinan. Ido parenta ni Debata tusi Josua unang ho manimbil sian i tusiamun manang tu hambirang (7). Marlapatan ma i unang meolmeol, alai konsisten jala hot di dalan na tigor. Unang mura munggil tu hambirang molo adong hamaolon, manang tusiamun molo adong disi hasonangan. Alai satia dihata nang patik ni Debata aha pe na masa. Ido dalan tu paruntungan dohot hamuliaon.

Pandohan i marlapatan do nang i asa mangulahon nasa ulaon dibagasan keteraturan, terencana, unang ma nian sai mian pandohan mangida disi ma i annon. Jala unang somal menunda ulaon songon na nidok ni angka pande bisuk don't wait till tomorrow what can do you do today. Unang paima ari marsogot laho mangulahon aha na boi ulahononna sadarion. Parange na marpainte jo, tung jotjot do mangambati hita tu keberhasilan, alani i tung ingkon sipasidingon do i dingolu siganup ari, baik dipangula, partigatiga, parsingkola, nang ulaon panghobasion pe. Ido binna sai jojtot hudok hami rupani pandohan ni bunda theresa Tuhan tidak menginginkan kita suskses tetapi ia menginginkan kita setia". Kesusksean adalah hasil dari kesetiaan dan kedisiplinan. Ido binna didok didunia pendididkan Disiplin adalah kunci keberhasilan. Antong halak na radot di patik ni Debata, halak na disiplin jala taratur ma i.

Akrab dengan Firman/Solhot marsaor dohot hata ni Debata (8)

Naparpudi sipareahan nisi Josua nang hita pe dipartingkian on asa sai maruntung/berhasil huhut marmulia dipardalanan ni ngolu ima solhot marsaor dohot hata ni Debata. Tarida ma i dipandohan ni turpuk on di ayat 8 namadok unang meret buku ni patikon sian pamanganmu, sai pingkir-pingkiri mai arian dohot borngin, asa diradoti ho, jala dipatupa ho hombar tusude na tarsurat di bagasan i,.. ". Sian pandohan i tarida ma hinaringkot ni parsaoran dohot hata ni Debata. Parsaoran dohot hata ni Debata tarida do i dibasan dua rumang ima: naparjolo, unang meret buku ni patik sian pamanganmu/janganlah engkau lupa memperkatakan kitap taurat ini. Namarlapatan dijaha, dibege huhut diparateatehon, jala dihatindangkon. Boi do i taulahon sandiri dinatajaha bibel nabadia i dibilutta be baik dalam ibadah pribadi nang diangka partingkian na asing. Alai ndada sae holan manjahasa ihut ma muse napadudohon, sai pingkir-pingkiri ma i arian dohot borngin/renungkanlah itu siang dan malam. Marhite na manjaha, mambege hata ni Debata huhut sai dipingkirkiri ido na mangonjar hita laho mangulahonsa dingolu siganup ari. Marhite i sai taevaluasi ma ngolunta on nungga hombar tu hataNa manang ndang. Nadua rumang i ma na mamastihon ngolunta mardalan di dalan na hinalomohon ni roha ni Debata manang dang jala laos ima na marbagabagahon hamualiaon dohot paruntungan.

Ido alana ndang ra bosan huria manosohon angka ruas asa sai giot manjaha hata ni Debata siganup ari minimal hombar tu daftar ayat alkitab na dibagihon di warta jemaat ta i. Parsaoran dohot hata ni Debata ndada ringkot holan diparngoluan di huria alai ringkot do nang dingolu siganup ari. Torop do halak na sukses, mamora manghatingdakon hinaringkot ni parsaoran dohot hata ni Debata do na pataluphon nasida mamolus angka hamaolon jala na mangalehon hademahon ni roha nang petunjuk laho mangulahon ulaonna. Ai sude do gulmit ni ngolu on boi sondangan ni hata ni Debata.

Antong, mulak ma hita tu ngolu siganup ari, hirim ma paruntungan nang hamuliaon di dalan nang parulaoonmu, ingot ma nasai donganan ni Debata do hita manongtong dipanggulmiotn ni ngolu on. Alani papir tondim natapape maol nueng dalan sidalanan, natape hira naso mungkin ulahononmu mannag udutanmu ngolum alai patalupon ni Debata doho. Natape hira naso sanggup hit pasikkolahon dakdanak, alai rap dohot Debata talup do hita. Ihut tusi, radoti patik ni Debata, manat unang humarojor, satia jala disiplin mangulahon na denggan huhut ma ronsot patupa parsoaran dohot hataNa. Marsangap ma Debat a marhite ngolunta na mangaradoti patikNa. Amen.