Mangolophon Asiniroha ni Debata
(Luk. 19:28-38)
Palmarum: Manatap Hangoluan songon panatapan ni Jesus
Huria ni Tuhan na hinaholongan dibagasan Jesus Kristus,
Ragam do angka tekanan ni ngolu na boi tadaopi dingolu on jala dang adong jolma dihasiangan on na malua sian tekanan ni ngolu. Di konteks ni virus Korona natongon dope taadopi saonari na mangkorhon ragam ni perubahan isarana pola pendidikan, perekonomian na melambat, parsahiton, isolasi, parsaoran na gabe maol pajumpang, dlan tontu patamba tekanan ni ngolu do i jala laos jotjot do i mambuat silasnirohanta. Ala somalna hademahon, hasonangan, hamoraon, keberhasilan ido na dibahen gabe suhat-suhat ni las ni roha. Dang salah i nean, alai gabe mambatasi las ni roha do i naso boi panghilalaaon ni angka halak na tongon mangadopi tekanan ni ngolu, halak na porsuk. Minggu Palmarum na taingot nueng mangontang hita asa marlas ni roha ala ni Asiniroha ni Debata. Lasniroha di Palmarum tontu tusude halak do i termasuk tu halak na tongon mangadopi ragam ni tekanan ni ngolu.
Antong boa do mengelola tekanan ni ngolu asa manongtong boi marlasniroha jala marsuraksurak? Turpuk partanginganta sadarion na dienet sian Evangelium Lukas 19:28-30 mangurupi hita laho mangalusi i. Turpuk on mamaritahon boa Jesus masuk tu Jerusalem lima ari andorang di parsilangkon jala saminggu andorang so hehe Ibana sian hamatean. Sian urutan kronologi i, tontu boi ma taboto tung dibagasan tekanan bolon do Jesus mamongoti Jerusalem ala naeng dipusa jala diparsilangkon ibana disi. Diboto Jesus do i? di boto! Sorat na i ate? antar hira sarupa ma i borhat hita tu sada luat hape naeng mate manang manaon na hansit disi. Tontu sorat jala maol do i. Alai boi do Jesus mardalan dibagasan hademahon tanpa ganggu tanpa murhing manang bobonosan, boasa? alusna ala talup Jesus mengelola tekanan ni ngoluna marhite na fokus Ibana tu Debata dohot tujuan ni ngoluNa ima laho paluahon jolma i. Marhite i do talup Jesus pasahathon diri nang ngoluNa hibul tu Debata jala dang terpengaruh be di kondisi nahumaliangsa.
Ido alana tung mansai pos rohana mamasuhi Jerusalem i ndang mardongan biar niroha. Tarida ma i sian pandohan diayat 28 ni turpuk ta on didok Jadi dung didok songon i, hehe ma Ibana laho nangkok tu Jerusalem. Dihata Indonesia didok Yesus mendahului mereka dan meneruskan perjalanan ke Yerusalem. Hata hehe/mendahului patuduhon ndang adong biarna nanggo saotik, tetap do diulahon ulaonna jala diuluhon siseanna i natape sahali nai naeng manopot hasusaan do Ibana nangkok tu Jerusalem. Dang diatur penderitaan nanaeng ro i ibana alai baliksa Jesus do mangatur haporsuhon i. Rade jala dang mabiar Ibana mamasuhi haporsuhon bolon i ala memang umbalga do holongNa tu jolma sian haporsuhonna i. Umbalga do huasoNa sian haporsuhon nang hamatean i sandiri. On ma na patauhon halak naporsea disaluhut partingkian dang mabiar/gentar mangadopi angka haporsuhon termasuk ma serangan ni angka teroris na manganam hangoluan marhite hamatean i, songon nabaru masa di ari Minggu nasalpu di Makasar. Dang tung talup teror i mambahen mabiar hita ai umbalga do huaso ni Debata sian huaso ni teroris i.
Laos sikap sisongon i do muse na taida dung masuk Ibana tu Jerusalem. Marende jala marsuraksurak do angka natorop i di dalan na nibolosna huhut pahembang angka ulosna be di dalan i. Alai ndang gabe madabu Jesus tu sikap na Junawa, euforia, alai tetap tenang, hohom. Jala di ari Jumat Agung dang pola gabe susa rohana natape angka na marsurak di minggu Palmarum i balik gabe mangalea i ibana. Boasa? ala dang fokus ibana tu kondisi nang parange ni na humaliangna alai fokus tu Debata nang tujuan ni ngoluna. Dang talup pujian, surak surak ni natorop i mengalihkan fokusna. Suang songon i do dang talup insak insak ni natorop i pabalihon fokusna.
Onma ontangan las ni roha tu hita asa tadalani hangoluan dihasiangan on dibagasan panatapan na sarupa dohot panatapan ni Jesus i. Unang sai marsigantung tu namasa dihumaliang alai sabalikna hita do na mangatur roha nang pingkiranta mangadopi namasa di humaliang. Halak Kristen na tutu ndang be gabe stress mambege hata ni halak baik pujian nang insakinsak. Dang sumurut mangulahon ulaon natape ragam angka hamaolon. Dang mago las no rohana natape dang denggan situasi na diadopi. Alani i , naeng ho manontong marlasniroha? fokus ma tu Debata dohot tujuan ni ngolum. Unang sai momar!
Palmarum: Haunduhon dohot Ngolu na pajolohon na ringkot di Tuhan i.
Huria ni Tuhan na hinaholongan dibagasan Jesus Kristus,
Adong do hita naumboto aha nanaeng masa di ari sogot? tontu dang adong. Alai Jesus diboto do i. Sian turpuk on marsiajar do nang hita na tung patar do di panatatapan ni Jesus saluhut na masa dohot na nanaeng masa pe. Patar do sude diparnidaanNa saluhut inganan jala nanaeng masa disi. Boi ma i taida sian parsuruon ni Jesus tu siseanna asa diboan nasida sada halode sihundulanNa mamongoti Jerusalem. Diboto Jesus do didia tambat halode i, ndang hea dope dihunduli halak, jala aha naingkon sukkunon ni halak tu nasida mandok: boasa harharan muna i? (ay. 29-31). Ihut tusi ma diparade Jesus ma alus sidohonon ni angka sisean i dok hamu ma: Ringkot do i di Tuhan i. Ala diboto Jesus na naeng masa, talup ma Ibana parade sisean i sebagai bentuk antisipasi. Sialani i, tung ahape nanaeng masa dijolonta, tapasahat ma dirinta tu Debata asa tung Ibana na mangurupi hita laho patudu dalan, alus, nang hagogoon manalpuhonsa. Unang sai mangasahon gogo nang pingkiranta sandiri be. Mari menyerahkan masa depan kepada Yesus supaya bersamaNya kita mengukir dan menjalaninya dengan benar.
Ihut tusi, dung dibege angka sisesean i parsuruon ni Jesus, unduk do nasida mangulahon songon na nidok ni Tuhan Jesus, dang adong panjuaon dohot sukukunsukuun na asing. Diida nasida ma tutu tambat disi sada halode, di harhari ma, jala dung adong na manukkun boasa diharhari nasida halode i, di alusi nasida ma hombar tunadok ni Tuhan Jesus, na ringkot di Tuhan i do i. Dang adong nang panjuaon di halak namarnampunahon halode i. Unduk do nang ibana di hata i, ai molo ringkot di Tuhan i do tutu, dang adong na boi manjua. Ai saluhut na adong dihita ampuna ni Debata jala sipangkeon tu naringkot di Tuhan i do i. Ido alana dang pola jolo parmisi mambuat halode i. Ndada naeng manangko alai naeng patuduhon na ampuna ni Debata do halode i.. Rade ma antong ibana patujulohon naringkot di Tuhan i.
Laos on ma namagonjar hita di minggu Palmarum on asa tutu situtu marhaunduhon tu parsuruon ni Debata. Rade ma nang hita marsiajar patujolohon naringkot di Tuhan i, unang sai holan na ringkot dirinta be. Jala laos sian on ma hita marsiajar asa tung rade jala unang tungki molo tung adong dibuat jala dipangke Debata angka ugasanta ganup.
Palmarum: Haserepon ni roha
Huria ni Tuhan na hinaholongan dibagasan Jesus,
Palmarum paingothon hita dihaserepon ni roha ni Tuhan Jesus. Uju dibongoti Jesus Jerusalem, didok di turpuk ta on dianakhoni ibana do halode. Adong tolu hal nanaeng sipapataron ni Jesus marhite simbol nanihundulanNa halode i. Naparjolo, ibana do Mesias songon naung disuriranghon Panuriang Zakaria namandok mariaia situtu ma ho, ale boru sion... Ida ma na ro ma rajam tumopot ho...na serep do rohana jala marsihundul di halode dohot di anak ni halode inaina (Sak. 9:9). Napaduahon, dipartingkian ni Jesus, halode simbol ni hadameon, alani i marite na marsihundul Jesus di atas ni halode partanda do i na martudutudu ia Jesus ima Mesias jala raja ni hadameon ndada raja nanaeng marporang. Mesias na padamehon Debata dohot jolma manisia marhite hasesaan ni dosa ndada Mesias Politik na nanaeng paluahon bangso Israel sian tangan ni halak Romawi. Napatoluhon, halode ima simbol ni hatoruhon ni roha ni Jesus.
Marhite hatorangan i, disosohon do hita marlasniroha di minggu Palmarum on ala ro Jesus sipalua i laho patupa haluaon dohot hadameon di tongatonga ni ngolunta na gok hadosaon on. Ido nang na paingothon hita diharadeon ni Debata dibagasan haserepon ni roha mamongoti ngolunta natongon mangadopi ragam ni hamaolon asa parsidohot ibana manean i jala asa rap hehe hita rap dohot ibana. Minggu palmarum on huhut do paingothon hita asa manongtong mangolu dibagasan haserepon ni roha dohot hadameon maradophon Debata nang dongan jolma. Molo tung sai adong na manahi angka parbadaan hian, saonari diajak ma hita asa taorom rohanta jala tapauba gabe manahi hadameon
Palmarum: manomu Jesus dibagasan hasintongan dohot las ni roha
Huria ni Tuhan na hinaholongan dibagasan Jesus Kristus,
Uju dibongoti Jesus huta Jerusalem, tung mansai torop do halak na manomunomu ibana di tongan dalan i. dipampeakhon nasida do angka bajuna di dalan i huhut marende marsuara na gogo :Pinasupasuma Raja i, na ro marhitehite Goar ni Tuhan! Dame do disurgo; hasangapon di ginjang!. Di bukku Evangeliun Johanes, ende natorop i dipungka do marhite hata hosianna namarlapatan sai Palua ma, mamang sai tibu ma palua. Dienet do on sian Pslmen Mazmur 118:25-26 songon psalmen hamonangn. Sian i, boi taida na ditomutomu natorop i Jesus songon Mesias na nimiahan, jala penakluk namarhamonangan secara politis. Ido alana andul dihalala nasida dung gabe diparsilangkon Jesus. Jut ma roha nasida, kecewa ala nanihirim ni rohana dang manjadi. Marbalik ma olopolop nasida i gabe burabura, insakisak dlan. Ima bahayana molo mangihuthon jala manomu Debata dingolunta holan naeng papuas kebutuhan/hagiot ni ngolunta.
Sian on patut ma hita ingkon manangkasi aha do tujuanta manomunomu Jesus dingolunta. Holan naeng memenuhi keinginan manang harapanta sambing do? molo songon i do, boi madabu do hita gabe pangaleai di Jesus ala kecewa hita dang boi dapot hita sude keinginanta i, songon natotop di masa palmarum i. Manomu Jesus di ngolu siganup ari dalanta doi laho manjanghon haluaon sian sumbia nisibolis sekaligus managam hagogogon mamolus nara ragam ni hamaolon dibagasan panghirimon naingkon marhamongaan hita songon Jesus na monang manaluhon haporsuhonna. Marhite i manongtong ma hita boi marlasniroha nang marolopolop. Molo rade Jesus manaon naporuk patuduhon holongNa tu ngoluna, antong aha na naung tabahen laho mamalos holongNa di ngolunta?
Antong, mangihuthon simbol ni Minggu Palmarum ima maremare nagabe tudutudu tu ngolu naso mura melos jala putus asa, tadalani manguluon dibagasan hatoguon jala dao ma angka pandelean. Manongtong ma marlasniroha, marhademahahon jala marhadameon ni roha natape tongon mandalani dalan namaol nang haporsuhon pe. Ala pos do rohanta sai donganan ni Debata do hita. Tapasahat ma dirinya hibul tu Debata jala tajanghon ma asi ni roha ni Debata na patoguhon hita huhut na paluahon ngolunta. Uju so adong be manang na aha na boi tapangasahon, uju danga adong be nango sahalak na boi tapangasahon, berpaling dan andalkanlah Tuhan. Marsiajar ma hita fokus tu Debata dohot tujuan ningolunta unang ma tu angka haporsuhon ta i. Ai tau rumpak do hita molo fokus tu haporsuhon nang persoalanta. Sabalikna tarruppakhon hita do parsoalan i molo fokus hita tu Debata, ai doa do umbalga jala gumogo Debata sian angka parsoalanta. Taolophon ma asi niroha ni Debata marhite haunduhon, haserepon ni roha dohot ngolu na marhadameon nang mangharingkothon naringkot di Tuhan i. Selamat Minggu Palmarum. Selamat marlasniroha jala marolopolop. Amin
Tidak ada komentar:
Posting Komentar