Jamita Buha buha Ijuk 2020

 Haheheon ni Jesus

(Markus 16:1-8)

Marbuha-buha ijuk diganup bagasta

Huria ni Tuhan na hinaholongan di bagasan Tuhan Jesus Kristus, Selamat Paskah ma di hita saluhutna.

Somalna partangiangan buhabuha ijuk on do na pinaima ni angka ianakhonta sikkola minggu. Ala ganup taon dipatupa do perayaan paskah ni sikkola minggu dalam bentuk mangalului telor paskah, kuis berhadiah, laos di uduti ma dohot kebaktian sikkola minggu. Taon on, hinorhon ni namasa Covid 19 dang boi tapatupa i di gareja. Alai tung gomos ma dipangidohon hami, asa tung unang tarhirim angka ianakhon ta manang pahompu ta i, tetap ma tapatupa diganup bagasta be kebaktian buha-buha ijuk on jala huhut ma tarobus tolor dijabunta be. Laos dung simpul ibadah buha-buha ijuk di jabunta be tapatupa ma ulaon mangalului tolor paskah.

Mangharingkothon parjumpangan dohot Debata

Huria ni Tuhan na hinaholongan dibagasan Tuhan Jesus Kristus,

Kebaktian buha-buha ijuk paingothon hita dina hehe Tuhan Jesus sian tanoman i. Huhut ma marnigot harentaon ni angka parompuan i, ima si Maria Magdalena, Maria nisi Jakobus, dohot Si Salome laho tu tanoman ni Jesus i. Mangihuthon jamita di Jumat Agung nasalpu, laos nasida do na mangida Tuhan Jesus sahat tu na mate di hau pinorsilang i, natape manatap nasida sian nadao. Dipatudu nasida do hasatiaon dohot holong na tutu tu Jesus sahat tu hamateanNa. Bahkan dung mate Tuhan Jesus, nasida do nang na mangalaputi naringkot sibahenon tu bangke ni Jesus i. Somalna memang, sebagai bentuk penghormatan na parpudi, sai dimiahi do bangke ni na mate, alai ala tongon jumpang ne nama ari Sabat gabe dang dimiahi bangke ni Jesus. Pukkul 3 Jesus na mate i, pukkul 6 di ari jumat i nungga masuk ari Sabat menurut paretongan ni kalender ni Romawi. Jala di ari Sabat dang boi mangulahon siulaon. Ido alana, dung salpu ari Sabat dituhor nasida ma ragam-ragam ni na hushus laho mamiahi ibana, jala sogot manogot i dung simpul ari Sabat borhat ma nasida tu tanoman i, di na binsar mataniari (ay. 1-2). Ditaon nasida do ngali ni ari ditondong nang nambur i. Tung tutu ma holong roha nasida di Jesus i. Dang talup haporsuhon na disilang i, ngali ni ari dohot nambur, suang songon i panarik ni simalolong, mangambati nasida patuduhon holongna tu Jesus i.

Tung sada pangalaho sitiruon ma on tutu nang dihita saonari. Nungga be lima taon iba rupani manghobasi di GKPI JK Saroha on, nda tung apala hea dope gok gareja di buha-buha ijuk. Godang do nean na ro, alai gumodang do i sikkola minggu. Sipata molo binege carita ni sikkola minggu i, na didungoi jala ditarik nasida do natuatuana asa adong mambuan tu gareja, ido binna dohot angka natorasna marbuha-buha ijuk. Alai tontu dang sude songon i. Molo sinukkun rupani, boasa bangkol hita marbuha-buha ijuk, alus napaling jotjot binege ima, ngali ari amang, dungi nambur dohot ombun pe somalin hapal na, tung pas tabo panarik ni simalolong molo tongon pukkul 4-5 ninna angka natorop i. Laos ido memang na tinaluhon ni angka parompuan na ro tu tanoman i, jala ingkon ido sitaluhononta dinamarbuha-buha ijuk. Saonari, huria ni Tuhan ndang pola manondong ngali ni ari dohot nambur manang ombun nahapal i hita. Ala ni Korona on, dijabu be ma hita patupa buha buha ijuk, boi sambil marbulusan manang mandadang di tatataring, alani i unang be nian adong naso marbuha buha ijuk. Molo adong dope na peak modom saonari uju dijaha/dibege renungan on, didungoi ma, hehe ma ho ompung, oma, bapa, anggi, abang, ai nungga hehe Tuhan Jesus ninta be ma. Unang tung adong be alasan nian dang marlas niroha dibuha-buha ijuk on.

Masalah: Ise Manggulang batu i di hita?

Huria ni Tuhan na hinaholongan dibagasan Tuhan Jesus,

Ditonga dalan laho tu tanoman i, sambil mardalan rupani, manghata-hatai do nasida huhut mamikkiri ”Ise ma manggulang batu i di hita sian baba ni pintu ni tanoman I?" (ay.3). Memang mangihuthon barita ni bibel ta i, tung nabalga situtu do batu panutup ni pintu ni tanoman i (ay.4). Ala ni i dang dung adong dibahaen alus ni sungkun-sungkun nasida i, ala memang tung so adong do jolma naboi manggulang batu i, boasa? Mangihuthon angka pande bisuk boi adong piga alasan ima:

1.      Tanoman i, ndada songon tanoman dihita on na disuanton namonding tu tano. Di hatiha i, tu sada gua di dolok batu do na hinali dengan arah horizontal.

2.      Pintu ni tanoman i somalna opat suhi, alai sipata tikko jala timbona 1,5-2 meter. Pintu ni tanoman i miring do dibahen ndada lurus.

3.      Pintu ni tanoman i ditutup dope muse dohot sada batu na balga situtu

4.      Pintu ni tanoman i disegel dope dohot materai ni Kaisar. Ise na mambuka materai i, ingkon hukum mati.

5.      Tanoman i dijaga angka soldadu.

Siala ni i, molo disungkun nasida ise ma manggulang batu i di hita? dang ADONG! apalagi ma nasida parompuan na gale jala otik muse do nasida. Batu i ma na hira-hira manirang/memisahkan nasida sian Jesus Tuhan i. Alai adong do namenarik dison. Diboto nasida do adong masalah ima naso boi nasida manggulang batu i, alai dang dung gabe sumurut manang mulak nasida sian tonga dalan. Torus do nasida sahat tu tanoman i. Naeng dohonon tung marsitutu do nasida jala fokus tu tujuan nasida ndada tu masalah, abatabat. Sada pangalaho sitiruon jala na ringkot sipahusorhusoronta sian spiritualitas ni paskah. Tidak fokus pada masalah tetapi pada solusi dan tujuan. Memang dingolunta on jojot do hita sundat mangulahon na denggan hinorhon ni napintor pagundanghu mamingkiri masalah, pagodanghu mambahas masalah. Nga direncahon mangulahon na denggan, alai pintor ro tupingkiranna rupani: "boama i ake?" "sotung gabe songon on, manang songon an?" dlan, ujung na gabe sundat. Rencana na denggan i sundat jala tinggal pembahasan. Pembahasan i sandiri boi do nang gabe memunculkan masalah naimbaru naso adong hian, ala namambahas i sama sama dang masiantusan manang dang mangantusi masalah na dibahasna. Boi do mambahas "masalah" alai unang gabe mambahen hita sumurut manang gabe mundur dang jadi mangulahon nadenggan. Alai molo tung pe dibahas masalah sahat ma tutu solusi jala fokus ma tu tujuan. Spiritualitas paskah menolong kita untuk tetap berjalan menuju tujuan meski diperjalan memperbincangkan masalah.

Alus ni masalah: Nungga Magulang batu i

Huria ni Tuhan na hinaholongan dibagasan Jesus Kristus,

Molo tajaha ayat 4 didok do disi 'mamareng dompak i nasida, diida ma naung digulang batu i, ai na balga situtu do i'. Ise manggulang batu i, tung so adong nanggo sahalak na boi iango so Tuhan namangolu i. On na sintuhu ni Paskah/buhabuha ijuk. Dang tung ringkot sibelaon jala sijagaon Ibana. Sabalikna ibana do na manjaga hangoluanta marhite na manaluhon hamatean i. Ibana do na manggulang batu na sun balga na manirang/memisahkan Ibana dohot jolma na manghaholongi jala na hinaholonganNA, ima angka parompuan na gale i. Dison taida ma na diparade Debata do angka pangurupion diangka halak na fokus ro tumopot ibana, natape tung adong angka abat abat. Dipartingkianta sisaonari on, abat abat manang batu na balga nanaeng tagulang i, na manirang hita secara fisik sian parsaoran dohot Debata di bagas joro ima virus Korona on. Alai dilehon Debata do dalan tu hita asa boi tongtong marsaor dohot Ibana marhite kebaktian dibagasta be. Jala pos ma rohanta, tadalani ma ngolunta huhut fokus hita tu Debata dohot huaso haheheonNa ditingkiNa gulanghonon ni Debata do batu na balga na taadopi saonari ima virus Korona dohot sude dampakna na natae nuaeng dingolunta.

Asing ni virus korona, godang do angka ragam ni batu na balga nasai mian dope dibagasan rohanta na manirang hita sian Debata isarana halosokon, kecongkakan, kesombogan, kebimbangan, kekuatiran, keputusasaan, egoisme. Asing ni godang do nang batu nabalga namanirang hita dohot dongan jolma isarana suku, haporsean,politik, tingkat ekonomi, usia, dlan. Alai marhitehite las niroha haheheon ni Jesus dibuha-buha ijuk on, taronjar ma rohanta manghatopothon ia Debata na tasomba i dibagasan Jesus Kristus naung hehe i mangontang hita saonari asa tung olo hita rap dohot Ibana manggulangkon angka batu na manirang hita dohot Ibana nang dohot dongan jolma pe. Termasuk ma manggulanghon panarik ni simalolongta dimanogot on. Paskah mengingatkan kita bahwa Allah senantiasa membuka jalan disaat sepertinya tiada jalan. Allah senantiasa menyediakan jawaban disaat sepertinya tidak ada jawaba. Allah memberi pengharapan disaat sepertinya tidak ada harapan. Siapa yang memiliki Allah dan merayakan Paskah ia memiliki harapan. Hanya teruslah berjalan, jalan berhenti dan jangan mundur.

Dibongoti ma tanoman i jala mulak mamaritahon hangoluan

Huria ni Tuhan na hinaholongan di bagasan Jesus Kristus,

Dung diida nasida magulang batu i, masuk ma nasida tu tanoman i. Dang diida nasida be bangke ni Jesus disi. Alai adong ma disi sahalak doli-doli na marulos marlinang-linang na paboahon tu nasida naung hehe Tuhan Jesus. Dungi dipodahon ma tunasida asa dipaboa i tusi Petrus dohot angka sisean na asing huhut paboahon na dijoloani Jesus do nasida tu Galilea asa disi idaon nasida Jesus naung hehe i songon naung dipodahon hian tu nasida. Ro nasida tu tanoman i laho mamiahi bangke ni Jesus alai mulak ma nasida sian i dengan tugas naimbaru, ima paboahon jala mamaritahon haheheon ni Jesus. Ro mangida hamatean, mulak mambaritahon hangoluan. Semangat dohot tondi ni buha-buha ijuk ima paubahon parnidaanta nasai dompak hamatean, namarrumanghon biar ni roha, kekuatiran, kepanikan, lomos ni roha, habot niroha, dlan, asa gabe mandompakhon hangoluan na boi marrumanghon pos ni roha, hademahon, holong, haradeaon marbagi, las ni roha,dlan. Antong saonari di tonga ni panosak ni Korona dohot angka dampak na, tapauba ma panatapanta dompak hangoluan unang tung dompak hamatean. Hehe ma hita marposniroha mandalani namasa on, marhademahon, marholong niroha, huhut rade masiurupan. Tabaritahon ma barita hangoluan unang sai barita hamatean i. Ro mangida hamatean jala dibagasan habot niroha, mulak mambaritahon hangoluan dibagasan las ni roha. Paskah menunjukkan perubahasan yang sangat radikal di tengah kondisi yang tidak biasa. Paskah menawarkan kehidupan ditengah kematian, menawarkan sukacita ganti dukacita, menawarkan ketenangan ganti kepanikan, menawarkan keteguhan ganti ketakutan, menawarkan nyanyian ganti tangisan. On ma namangalehon hagogogon dihita mangadopi namasa nuaeng. Amen.

Selamat Paskah, selamat manatap jala mamaritahon huhut manghangoluhon barita haheheon dohot hangoluan. Syalom!. (unang lupa patupa mangalului tolor songon simbol ni hangoluan di jabutta be marsadasada).