Hatigoran ni Debata Na Paluahon

Hatigoran ni Debata Na Paluahon

 ( 2 Pet. 1:1-9)

Syalom jala selamat ari Minggu ma di hita saluhutna. On ma parjolo sahali tapatupa parmingguon dibagasta be hinorhon ni Virus Korona na manosak ngoluta disandok hasiangan on. Hirim ni roha nami tongtong ma ria jala renta hita sude patupahon kebaktian minggu on.

Huria ni Tuhan na hinaholongan di bagasan Jesus Kristus,

Dihalak Batak, molo adong dakdanak baru sorang, jojot do binege pandohan magodanggodang ancimun ma ho anaha ninna na ro mangidasa. Pandohan on hurang lobi marlapatan do asa hatop jala denggan magodang dakdanak i. Pandohan i, patuduhon kerinduan menjalani pertumbuhan. Tontu hal na denggan do molo tahasiholi magodang dakdanak i. Di sisi na asing, lam magodang dakdanak lam godang do na binotona. Lam godang na binegena jala lam godang na boi siparguruhononna. Isarana rupani anak nami si Elnatan, ganup ari sai tarsonggot do iba di angka pandohanna. Nasogot rupani, tompu di didok itu Eong Among, mandok Keong na manjangkit di tiang ni terras ni rumah dinas. Sian dia ma diboto i ninna roha. Godang na i na boi contoh tabahen, alai nananeng sidohonon lam magadong dakdanak lam godang do nang jolma na boi diparguruhon sialani laos olo do dapot dibege jala diihuthon angka poda na hurang sintong. Isarana, hea do tompu didok si Elnathan, eee BOBANG tu Inong na. Songgot roha! Sialani i, pertumbuhan dohot perkembangan ni dakdanak ringkot situtu do di pantau natorasna.

Suang songon i do nang dinamasa nuang, lam rarat perkembangan dohot penularan virus Korona lam rarat do nang angka pangajarion na muncul. Godang do pangajarion i na lipe sian haporseaon nang sian bidang kesehatan pe. Isarana, saminggu on adong barita na binege tolor rebus boi menangkal virus Korona molo dipangan sogot manogot i, sanga do viral sampe adong dongan pandita didungoi ruas na di Tapteng jam 5 pagi asa parsidohot apnadita i manggalang tolor i. Suang songon i di sada huria di Afrika, dilehon pandita na do ruas na minum Detol ala didok boi i laho mangalo virus i. Akibatna torop do ruas na i na monding. Pangajarion na lipe boi do pamatehon haporseaon huhut pamatehon pardagingon. Siala ni i, tung ingkon manat do hita mangadopi angak perkembangan na masa.

Huria ni Tuhan na hinaholongan dibagasan Jesus Kristus,

Kondisi si songon i adong ma miripna tu na nialaman ni huria na parjolo i, na niangkupan ni Apostel Petrus di bukuna na paduahon on. Songon dakdanak na baru magodang, songon i ma huria i di hatiha i. Lam magodang nasida laos lam godang do angka hamaolon na niadopan nasida, baik sian duru ni huria alai lumobi na sian bagas huria i sandiri. Lam godang do guru-guru pargapgap na mangajarhon pangajarion na maralo sian Injil Kristus na mangancam dasor ni hasintongan ni pangajarion ni huria. Alani i, songon antoras ni huria Apostel Petrus ringkot ma dihilala laho manuturi nasida, marhite na manongos surat 2 Petrus on asa lam ringgas jala benget mangeahi hadaulaton dohot panandaiaon na sintong di Kritus Jesus huhut laho patuduhon huhut manolak/mangalo pangajarion ni angka guru-guru pargapgap do na mangajari di tonga nihuria angka pangajarion nasosintong, ma marmual sian akal busuk nasida sandiri jala dang mardasor tu hata ni Debata.

Ido alana Jamita sadarion na didasorhon tu turpuk 2 Petrus 1:1-9 hufokushon hami do manaringoti Pertumbuhan Iman dan Spiritualitas di masa sulit. Haporseaon dohot hadaulaton na magodang di tonga tonga ni hamaolon. Molo didok magodang manang bertumbuh tontu dihaporluhon do disi proses. Ai dang adong nanggo sada na mangolu di hasiangan on na pintor magodang, sai jumolo do i sian na metmet baru pe magodang. Haporseaon dohot partondion ipe tong do songon i. Hatorason ni haporseaon i tong do membutuhkan proses. Marhite turpuk ta sadarion naeng ma hita rade marsiajar angka dia ma tahapan si dalananta i, ima:

1.    Manjangkon jala manghaporsea i Jesus sipalua (ay. 1). Adong do pandohan salah mandasor sega luhutan. Sialani i, tung mansai ringkot do mamparateatehon dasor ni saluhut, termasuk ma dasorta laho bertumbuh dalam iman dan spiritualitas. Diturpuk ta on, dasor ni pertumbuhan i, ima manjangkon hangoluan naimbaru sian Debata marhite haporseaon tu Jesus Kristus sipalua i. Ido binna didok mandapothon angka naung manjalo haporseaon n arga, rap dohot hami, marhitehite hatigoran ni Debata dohot Jesus Kristus Sipalua i. Haporseaon jala panjangkonon tu haluaoni do nagabe dasor ni pertumbuhan i. Haporseaon do dasor na parjolo monong naeng magodang di hadaulaton.

2.    Pahot motivasi na sintong (ay. 3-4). Unok ni bagian on paboahon tujuanta ima mangolu dibagasan hadaulaton, mual nihagogoonta asa boi marhadaulaton ima hagogooon ni hadebataonna, jala na boi menghubungkan nadua i ima panandaion dohot na manghaporseai angka bagabagaNa. Ai tong tangkas do di dok Dilehon hagogoon ni hadebataonna i do tu hita nasa na tau hangoluan dohot hadaulaton. Namarlapatan ma i, ia Debata do na mangalehon hagogoonNA di hita asa tung talup hita marhadaulaton. On do unok ni etika ni halak Kristen. Ia berjuang pe hita asa gabe daulat ala naung jumolo do mangula Debata digasan hita. Sian dia do asa dapot hita hagogoon i? marhite naung tatanda Ibana. Sialani i, motivasi ni ngolu na daulat ndada asa dipuji halak jala paro haginjangaon ni roha, manang asa tung dapotan angka ragam ni pasupasu. Alai, sabalikna laho papatarhon hagooon dohot nasa ragam ni silehonlehon ni  Debata, ima gabe partohap hamu di hadebataon/boleh mengambil bagian dalam kodrat ilahi; Partohap dihadebataon ndada marlapatan gabe doshon Debata na porsea i, alai kualitas ni parange nang ngoluna manuman Debata. Ido manang na ise na partohap dihadebataaon dapotna ma muse silehonlehon napaduahon iman maporus sian hamagoan, na dibagasan hahisapon na di portibion/luput dari hawa nafsu duniawi. On ma nanaeng sipapataron manang motivasi na sintong di naporsea i laho berjuang mangolu dibagasan hadaulaton. Jempek dohonon motivasi ni hadaulaton i laho pasangap goar ni Debata.

3.    Marharinggason sian nasa gogo (ay.5a). Molo nungga marhaporseaon tu Jesus, Ditanda nang Debata dohot angka bagabagana na balga i, tahap berikutna ima marharinggason "dibahen i haringgashon hamu ma sian nasa gogo" Ide pokok na ima: nungga dilehon Debata diho nglolu naimbaru dohot sude angka bagabagana. Saonari haringgashon ma asa magodang, magerbang jala mangolu haporseaonmu dohot hadaulatonmu. Hata haringgashon (Spouden di hata gorik) boi  marlapatan kerajinan, kesunguhan, kehatihatian. Laos andul ma on marasing sian hata  santai, malas, asal-asalan, ceroboh. Dohot jempek dohonon, haringgashon hamu ma, marlapatan ma i ulahon ma sian nasa roha, pingkiran, nang gogom as tung magodang haporseaon dohot hadaulatonmu. Unang langgus, unang mardua roha, asal ma adong, jala dang manat.

4.    Magodang di pitu nilai  (5b-7). Molo naeng magodang haporseaon/partondion aha ma si haringgashonon? haringgashon ma manurdukon denggan ni parange (kebajikan) di bagasan haporseaon (Iman), habisuhon (pengetahuan yang diperoleh dari pendidikan dan pengalaman), pangarajaion diri (penguasan diri, disiplin), habengeton (ketekunan, nunut), hadaulaton (kesalehan: hormat dan tunduk pada Tuhan dalam segala hal) holong ni roha di dongan (Philia), holong ni roha disaluhut (agape). Ima pitu nilai nauli na ingkon sipahembangonta angka na porsea, Molo taida on, dipungka dohot haporsean ditutup dohot holong. Dipungka dibagasan parsaoran tu Debata, diihuthon ma muse disposisi sian diri andiri, diujungi tu parsaoran dohot dongan na asing. Asa haporseon i mangkorhon do tu diri sandiri (habisuhon, pangarajaion diri, habengeton) huhut dang tu luar ni dirina (holong tu dongan dohot saluhut). Marhite on, naeng taida ma ia halak Kristen na tutu ingkon berjuang sian nasa gogona asa sai magodang dihaporseaon dohot hadaulaton. Ingkon lam tu majuna/mangerbang do dang lam tu mundurna. Boasa na pitu on disosohon apostel petrus hape godang dope nilai nilai ni hakristenon isarana halambohon, hadameon, dlan? molo niida sian konteks ni huria hatiha i, saluhtna i tung andul ni parange ni angka guru pargapgap na manegai huria i do i. Ai dang dung dengganan parualoan nasida, didok do namalo nasida alai ndang ditanda Debata, ndang boi mangarajai diri (2: 2, 10, 14, 18), dlan.

5.    Parbue ni pertumbuhan i. (8-9). Manang na ise na marharinggason sian nasa gogo pahembangkon nilai-nilai na pitu i, jala olo magodang disi, akan membuat kita efektif (so losok) dan produktif (marparbue)dalam hubungan dengan Kristus. Sabalikna, molo so taharingashon sian nasa gogo pahembanghonsa dipatudos ma nasida songon halak na mapitung, parmata jonok naung manghalupahon haison ni dosana najolo. Mapitung ma nasida di pasupasu ni Debata najolo dohot pasupasu ni Debabata di jolan ni ari, jala laon ima mambuan nasida tu hasesega. Tontu tahirim do asa ngolunta on gabe ngolu na marparbue jala ala ni i do binna diloas Debata hita mangolu rodi ombas on asa tung marparbue ngolunta.!

Huria na hinaholongan di bagasan Jesus Kristus. Tapaihutihut majo naboi taparsiajari huhut patoguhon rohanta mangadopi namasa dingolunta be lumobi ma Virus Korona, sian turpukta sadarion:

a.  Haporseaon + Habisuhon VS Virus Korona

Haporseaon di Jesus sipalua ima na rumingkot adong be di rohanta laho mangadopi virus Korona on. haporseaon na talup do hita mangadopi jala mangalewati hamaolon on, ai sanggup do Jesus paluahon dohot pamalumhon salutna na tinompa na i marhite hatigoranNa, songon tema ni mingguta sadarion Hatigoran ni Debata na paluahon. Molo tung pe adong angka sisolhotta naung jumolo ala ni virus on, tahaporsea i ma, na ainon ni Debata do nasida di lambungna. Marhite i boi sabam rohanta.

Marhite turpuk on, tung di ungkap do parnidaanta diangka perdebatan namasa hinorhon ni Korona on. Nadeba mandok holan haporseaon i do ima marhite tangiang dohot pamujion (ibadah) na ringkot mangadopi Virus Korona on. Na deba, songon hurianta mandok ringkot do nian haporseaon jala ido unok dohot dasorna alai ingkon dihuthon tindakan na marhadomuan tu habisuhon/parbinotoan na pinasahat ni Debata. Ido alana, dang apala salah tarajumi molo dipapinda kebaktian minggu dohot sektor sian gareja tu bagasta be. Nalnal i di pataridahon diturpuk on naringkot do habisuhon/parbinotoan i. Sian dia do mual ni habisuhon i? sian Debata, alai didia do dapotta i, marhite parsingkolaan, manjaha, dohot sian pengalaman. Ido alana mangadopi Virus Korona na on pe tung ringkot situtu do hita ringgas marsiajar sian pengalaman ni dongan nang sian angka na manjaha bukku nang barita na sintong. Asa unang nian mura-mura hita dioto otoi, songon na masa di Afrika pola olo nasida manginum Detol ala Pandita na mangalehon. Haporseaon naso mardongan habisuhon jojot do mamboan jolma i tu lombang rurus.

b. Pangarajaion diri VS Virus Korona

Dipartingkian on tung ringkot situtu do nang ta haringgashon sian nasa gogonta asa tung talup hita mangarajai diri, magarajai hagiot. Tung unduk majo hita mangulahon sosososo ni Pamarenta nang angka uluan ni hurianta pe. Asa molo didok tu hita unang jo sai haluar sian jabu molo so haru ringkot boi ma i taulahon. Unang jo sai marpungu-pungu di lapo, cafe, dlan.  Gabe huingot rupani, diangka taon na salpu, ragat do halak lumobi angka ina ma melakukan program Diet Keto na mamaksa nasida mangorom hagiotna. Tahan do nasida ndang mangallang indahan, makanan berlmak pola tolu bulan rupani, jala berhasil do nasida. Ima sada sian godang contoh na nalnal dijolonta naboi do hape hita mangarajai diri dohot hagiotta molo tarohahon. Sialani i, tung tarohahon jala taharinggashon majo mangarajai diri di masa ni Korona on, asa tung haru tibu salpu on sian ngolutta.

c. Holong ni roha tudongan nang sude halak VS Virus Korona

Dikonteks ta sisaonari on, pangarajaion ni dirita i boi do nang tanda ni holong ni roha tu dongan dohot tu saluhut halak. Holong nirohanta tu akka dokter, perawat naberjuang mangalo Korona on ndada pola ingkon na adong sumbanganta rupani isarana Hepeng, alai holan olo hita mangarajai diri, manjaga diri, nungga tung na holong situtu be rohanta di donganta dohot holong ni rohanta di pasien dang hita pe tahe. Marhite na mian hita dibagasta be, nungga parsidohot hita paluahon hosa ni torop halak, huhut merawat kehidupan. Molo tung partigatiga hita, sotung pola patorbang hu hita mambuat untung ditonga ni namasa on. Taingot ma tung haru sadia pe dapotmu dinamasa on, boi do i satangkarisap buaton ni Debata.

d. Hadaulaton Vs Virus Korona.

Di panosak ni Virus Korona on, tongtong ma hita marhadaulaton, manghabiari jala unduk tu Debata. Boi ma i tapatarida marhite na ungkap nang rohanta laho patupa kebaktian Minggu nang Sektor dibagasta be, lumobi ma nean kebaktian keluarga siganup ari. Unang ala dang adong dipatupa kebaktian di gareja dohot di sektor gabe laos modom be hita. Unang tung gabe mundur haporseaon dohot hadaulaton ta ala ni panosak ni Virus on, alai songon ondolan  ni turpuk on ingkon do lam tu majuna jala lam tu rosukna. Sian bagasta be tatanginaghon ma saluhut donganta na berjuang maralohon Virus Korona on dohot angka donganta naung agoan siholhot na marujung ngolu ala ni virus on asa tung marhamonangan nasida rap dohot hita, marhite hagogoon dohot hatigoran ni Debata na paluahon i.

e. Habengeton Vs Virus Korona.

Marhite na taharinggashon mangulahon saluhut naung pindandohan diginjang i, lam marhabengeton ma hita mangadopi angka dampak ni Virus Korona on. Isarana rupani di sada sisi lam arga situhoron jala maol dapot. Di sisi na asing, mura angka suan suananta songon tomat, cabe ala naso ro be tongke mangalap tu luatta on. Parsaoran dohot siholhot naung lam renggang ala ni angka pembatasan na ingkon taulahon, isarana dang boi masijalangan, mangumma dakdanak, dlan. Dang haru taboto manang olat ni andingan panosak ni Virus Korona on, alai marhite haporseaon na magerbang i pos rohanta talup do hita manghamonanghon hamaolon on rap dohot Debata na manjou jala na mangalehon hagogoonNa i di hita huhut na paluahon hita marhite hatigoranNa.

Huria ni Tuhan na hinaholongan dibagasan Jesus Kristus, Songon goar ni mingguta sadarion Judika rap  ma hita joujou tu Debata luluhon ma ahu, Ale Debata. Tung taharinggashon ma sian nasa gogo pahembanghon dohot pabagashon haporseaonta. Margogo ma hita mangadopi namason jala laos hatop ma maporus Virus Korona on.  Amen.