Jamita Jumat Agung 2020

Hamatean ni Kristus na Paluahon

(Mateus 27:45-56)

Huria ni Tuhan na hinaholongan dibagasan Jesus Kristus,

Nungga somal nian hita marningot barita hamatean ni Jesus. Jala nungga tung piga hali jamita tabege taringot tu hamatean ni Jesus di Jumat Agung. Dung Kristen hita, ganup taon tapatupa do parningotan ni hamatean ni Jesus. Alai sadarion, taingot do hasomalan i, alai taulahon ditingki jala kondisi naso somal. Ai ingkon diganup bagasta be tapatupa parningotan i ndada songon somal na di gareja. Somalna taptupa do nang Parpadanan Nabadia sadarion, alai ipe dang boi taulahon saonari. Alai anggo maksa sosial ni Parpadanan Nabadia i, songon naung pinatorang nabodari naeng ma nian boi tahangoluhon. Asa naeng ma nian gabe tarajumi ia hamatean ni Jesus i, diingot jala dihangoluhon pangkorhonna diganup bagas ta be. Tapatupa parningotan ni hamatean ni Jesus ditonga ni kondisi naso somal on, huhut do nang i paingothon ia hamatean ni Jesus pe ndada hamatean na somal. Alai hamatean na mamboan hangoluan. Hamatean na manaluhon hamatean i sandiri. Asa molo taingot hamatean ni Kristus na so somal di situasi naso somal on, naeng ma nian haporseaonta tu Ibana ndang be songon na somal, alai ingkon ma lam tang jala marparbue dingolunta siganup ari.

Huria ni Tuhan na hinaholongan dibagasan Jesus Kristus,

Di Jumat Agung sadarion, dipanghulingi Debata do hita marhite Evangelium Mateus 27:45-56 na mamaritahon proses hamatean ni Jesus marmula sian hos ni ari. Turpukta on, boi do tabagi tu dua bagian na balga ima aha do namasa uju so mate dope Jesus (ay. 45-50) dohot aha do namasa dung mate Jesus (ay. 51-56). Taida majo na dua bagian i sadasada:

1.     Aha na masa uju so mate dope Jesus di hau pinarsilang i (ay. 51-56). Uju dihau pinorsilang i dope Jesus, molo manurut kronologisna, onom jom ma Jesus tarpajal disi, adong do angka namasa nadorang so mate Ibana. Di turpuk ta on dipatorang ma aha do namasa di silang i selama tolu jom parpudi, ima sian hos ni ari sahat tu pukkul tolu. Naparjolo, holom ma sandok tano i (45). Dang tiur ari i songon nasomal. Dang apa tangkas aha alana gabe mangholom ari i. Adong do mandok ala ni gerhana matahari, adong muse ala na hinukkupan ni ombun mataniari i, gabe laos mangholom ma ari. Napaduahon, marsurak Jesus manjouhon Ale Debatangku, Debatangku, boasa tung tadingkononmu ahu (Eli eli lama sabachtani). Pandohan on nungga adong hian tarsurat di Pslam 22: 2 jala digonopi Jesus ma i dihau pinorsilang i. Godang do pangantusion taringot tuson alai naboi taida ima marsurak Ibana alana ampe salut dosa ni jolma tu Ibana. Jala taboto do, dampak ni dosa ima holang sian Debata. Huhut laos ido parsorion nasumalin. Jadi marsurak Jesus ndada ala naso tahan manaon nahansit i. Napatoluhon, didok angka soldadu i ma na manjou si Elia do Ibana. Salah do nasida mambege hata ni Jesus i, alani i laos sala ma nasida mananggapi sa. Ido alana di dok nasida muse taida ma manang na ro si Elia paluahon ibana. Hasalaan mambege, mambahen nasida sala mangalapati, jala huhut salah bertindak. Napaopathon, dipainumhon sahalak sian soldadu i tu Jesus asom. Dihatihai, asom sisongon i dirajumi do margogo mangorui nahassit. Dibahasa saonari obat bius. Ai dirimpu soldadu ala na so tahan be Jesus manon nahansit i binna marsurak. Didok rohana molo olo Jesus manginum asom i, moru ma nahansit i manang dang pola hilalaon na be nahanasit i. Alai dang olo Jesus manginum, ai dang tung olo ibana mangorui haberniton na i. Napalimahon, diulahi Jesus ma muse marsuara na gogo, dungi tos ma hosana. Dison ndang didok aha na nihatahon ni Jesus dinalaho tos hosana. Alai di injil na asing di dok nungga marujung (Joh. 19:28-30). Namarlapatan nungga singkop ulaonna, marujung ma sumbia nisi bolis,  pelean hasesaan ni dosa nungga dipaujung, dlan. Uju na boi ibana marsaura na gogo laho tos hosana tudutudu doi na dibagsaan kesadaran penuh do Jesus mangadopi hamatean i. Tung rela do Ibana sumeahon hosana songon sikkat ta.

2.      Aha do namasa dung mate (dihammate) Jesus (ay. 51-56). Dinamate Jesus di hau pinorsilang i, mangihut do angka namasa ima:

Naparjolo, Maribak Hirehire. Hirehire di bagas joro adong dua. Naparjolo mai hirehire nagabe pembatas ni halaman depan dan ruangan dalam. Halak na boi masuk tu ruangan dalam holan halak Isarel do, ala bilut na badia do i. Anggo bangso di luar ni Israel dang masuk tusi, olat ni halaman depan do nasida. Hirehire napaduahon ima na memisahkan ruang kudus dohot ruang mahasa kudus.Ruang maha kudus ima inganan panimpanan ni tabut perjanjian jala dihaporseai bangso Israel do ruang maha kudus on gabe inganan habangsa ni Debata. Dang adong na boi masuk tusi dungkon ni Imam besar. Dohot jempek boi dohonon fungsi ni hirehire i ima laho menghalangi, memisahkan, dan membagi. Naparjolo menghalangi halak naso Isarel beribadah, hirehire na paduahon mangambati halak Israel masuk tu habangasa habadiaon ni Debata. Hirehire i pe memisah-misahkan jolma; adong bagian ni Israel, non Israel, iman besar dohot halak biasa.

Marhite na maribak hirehire i sian ginjang sahat tu toru patuduhon nungga ungkap be sude. Hamatean ni Jesus mambukka penghalang dohot pemisah ni Jolma dohot Debata. Dang adong be bilut na nabadia dohot na sun badia. Hamatean ni Kritus gabe tanda ni haradeon ni Debata ruar sian bilut na sun badia i laho tumopot jolma pardosa. Ima sintuhu ni barita haluaon. Asing ni i, hamatean ni Kristus na mambola hirehire i, patuduhon naso adong be pemisahan dohot diskriminasi antara bangso na pinillit dohot bangso sileban. Sude halak marnampunahon hak na sarupa huhut dipasada.

Napaduahon, Humuntal ma tano, marigat ma dohot angka batu mamak mungkap ma angka tanoman jala hehe ma angka nabadia. Namasaon ima dalan ni Debata laho mangohi panurirangon ni si Hesekiel (Hes. 37:12). Dalan ni Debata papatarhon haluaon ni bangsoNA nang saluhut bangso marhite hamateanNa i.

Napatoluhon, Panindangion ni Induk ni Soldadu: Tutu don on Anak ni Debata. Dung diida angka soldadu na manjaga Jesus i angka na masa i dihatindakkon nasida ma Jesus i anak ni Debata. Hal na menarik dison ima halak na parjolo mangakui Jesus anak ni Debata di peristiwa hamateanNa ima induk ni Soldadu i, seorang non Isarel. Ungkap ma hamubaon ni roha dohot haluaon i tu saluhut bangso ndang be holan tu bangso Israel. Muba ma roha ni induk ni soldadu sian naso porsea gabe porsea, sian panginjahi gabe pamujion.

Napaopathon. Parompuan na manatap mandaodao. Disaluhut namasa na tinaon ni Jesus di hau pinorsilang i, asing ni angka soldadu na manjaga ibana, dibaritahon do diturpuk ta on na dohot do nang torop angka boruboru na manatap pardangolan ni Jesus sahat tu hamateanNa i. Natape, ditatap nasida i sian na dao alai dang dung ditinggalhon nasida Tuhan Jesus. Dison dipatudu do parsihohoton ni angka parompuan ni mangihuthon Jesus. Mulai sian Galilea nungga diradoti nasida Jesus ai didok ima angka naung mangihuthon Jesus sian Galilea, patureturehon Ibana. Parsihohoton ni parompuan on marasing do sian sisean nasampulu dua i naung meninggalhon di porlak Getsemane. Parsihohoton nasida i marudut do i sahat tu nahundul nasida di udean ni Jesus, ro tu tanoman sogot manogot i laho mamiahi Jesus. Ido nang alana laos parompuan i do parjolo mangida Jesus naung hehe. 

Huria ni Tuhan na hinaholongan dibagasan Tuhan Jesus,

Molo taida hatornagan na dignjang i, tung luhut do sude hasiangan on, baik namangolu dohot namate, nang alam pe mambahen respons na be do di peristiwa penyalipan dohot hamatean ni Kritus i. Saonari molo tabahen parningotan ni hamamate ni Kristus jala tabege barita na uli on, aha ma nagabe responsta? Sialani i ringkot ma hita mangarimangi aha ma na boi ta auhon di ngolunta sian barita hamatean ni Jesus na binaritahon ni si Mateus di turpuk ta on:

1.    Hamatean ni Jesus manaluhon hamatean i sandiri. Marhite naung mate Jesus dipalua ma hita sian sumbia nisi bolis asa tung dapotan hangoluan hita sogot. Sialani i ndang tung sihabiaran be hamatean. Molo tung pe ingkon dalanan hamatean, dalan ta ma i laho pajumpang dohot Debata.

2.    Dipartingkian sisaonari on, boi do hira na holang hita sian Debata dohot dongan jolma hinorhon ni Korona on. Ai dang boi be hita ro tu bagas joro rap mamuji pasangap Debata. Alai marhite parningotan di ari hamamate ni Kristus on, dilehon do hita gogo dohot haporseaon tung naso jadi sirang hita sian Debata dohot sian habangsaNa. Molo tung dang boi pamatangta ro tu bagas joro, alai boi tapajongjong joroNa diganup bagasta be. Asa tung dang boi Korona on manirang hita sian Debata. Ditingkina, lohaon ni Debata do muse hirehire na taaopi on ima Korona na manosak on. Disisi na asing, adong do tong an niribahan ni korona on. Gabe tarjou do hita nasabangso marsada mangalo korona on. Ndang apala tandi be tarida pendiskriminasian, pengkotakkotakan hinorhon ni agama, suku, dohot ras dibangso on. Tung sada do mangalo Korona on. Diribahi do hirehire na manirang hita nasailaon. Nasomal, diorai do hita karisten dibeberapa dareah laho patupahon kebaktian di jabu. Saonari justru disosohon.

3.    Mandao alai ndang manadingkon. Parningotan ni hamatean ni Kristus mangarahon hita di ketangguhan ni haporseaon, holong ni roha ni angka parompuan i. Tung ditatap jala dingani nasida do sude proses niadopan ni Jesus sahat tu namate, natape mandaodao nasida manatap. Penderitaan ni Kristus nang penderitaan nasida ndang pasuruthon roha nasida mangihuthon Debata. Diihuthon do sahat tu hamatean jala marlaba nasida gabe parjolo mangida Jesus na hehe. Spiritualitas sisongon ma natung ringkot ta hangoluhon dipartingkian saonari on. Dinapinamasa ni pamarenta physical distancing/penjarakan tubuh, mandao majo hita sian dongan dohot sian Debata secara fisik, alai tung naso tupa tinggalhononta Debata nang donganta i, natape tongon mangadopi hamaolon on hita. Sahali nai, Korona ndang boi mambahen hita maninggalhon Debata natape hira na mandao hita satingkin secara fisik. Parsihohoton mangihuthon Debata sahat ro diujungna, ima nanaeng siulahonnta dipargogoi parnigotan ni ari hamamateNa sadarion.

4.    Anak ni Debata. Parsihohoton dohot haunduhon ni Jesus disangkap ni Debata sahat tu hamatean na sumalim i mangungkap roha ni induk ni soldadu i marhatopothon/marpanindangi na Anak ni Debata do Jesus. On ma hagogoon nihaunduhon sahat tu hamatean i. Marhite parningotan di ari  hamamate ni Kristus margogo ma hita mangadopi nasa hamaolon, hapariron, termasuk ma ala ni dampak ni panosak ni Korona on. Margogo mangadopisa dibagasan haunduhon tu Debata. Asa tung unang nian adong nanggo sada sian hita on na manimbil sian sangkap ni Debata. Marhite na tatiru parsihohotn dohot haunduhon ni Kristus mananon naporsuk i, naeng ma gabe marpanindangi angka na humaling hita namandok tutu do angka anak ni Debata ruas ni huria GKPI Saroha i. Mangihuthon Jesus dohot do nang haradeon ta MANARUHON na adong di hita laho MANARIHON dongan na hahurangan.

5.    Hamubaon ni roha mangaribak hirehire. Marnida hinabalga ni haunduhon di Jesus mangadopi haporsuhon sahat tu hamatean i.  Marnida saluhutna i gabe didok induk ni soldadu i Tutu do on Anak ni Debata. Pandohan on patuduhon hamubaon niroha nang haporseaon. Sian na dohot mangaleai Jesus rap angka soldadu na asing, gabe manghatindakkon Jesus ANAK NI DEBATA. Hagogogon ni Debata marhite hamatean ni Kristus, mangonjar roha ni naso porsea i gabe porsea. Na jungkat tu hamubaon niroha. Antong saonari dinataingot hamatean ni Kristus i, aha ma respons na nihalomohon ni roha ni Debata sian ngolunta? Hamubaon ni roha nang hatangon ni haporseaon. Molo tung adong angka hirehire na manirang hita nasailaon sian Debata dohot dongan jolma, isarana hajungkaton, ginjangniroha, parbadaan, parsagi ni arta, dlan. Marhite huaso hamatean ni Kristus, taribahi mai asa marsada hita dohot Debata nang angka nahumaliang.

6.    Mabege, mangalapati, magulahon. Natolu on tung ringkot do saurdot. Alana molo sala mambege, gabe sala do mangalapati huhut laos sala mangulahon. Alai ni i, tung ringkot do tinggil jala tangkas hita mambege hata ni Debata asa tung talup tangkas nang pangantusionta huhut sintong ma pangkorhonna di parniulanta. Tung godang do dibagasan partingkian on, hinorhon ni naso singkp tangkas dibege manang dijaha hata ni Debata gabe asal dipangultomhon hatai dungi dihonahon tu namasa ima virus korona. Isarana rupani taringot tu isolasi 14 ari disejajarhon tu pesta paskah na di bukku 2 Musa 12, dlan. Ala ni i, tangkas ma tabege/tajaha dungi taantusi asa tung tangkas sintong pangulahononta.  Amen.