Parpadanan Nabadia

Parpadanan Nabadia

(1 Kor 11: 23-32)

Huria ni Tuhan na hinaholongan dibagasan Jesus Kristus, Selamat Kamis Putih ma dihita saluhutna.

               Tung godang do pangkorhon ni Virus Korona na manasok nuaeng masa di portibion. On ma parjolo sahali hita patupahon ibadah Kamis Putih dibagasta be. Ihut do nang tusi sude rangkaian ni parningotan ni Paskah. Marsogot rupani dinamarnigot hita di ari hamamate ni Kristus, di Jumat Agung, somalna tapatupa do disi Parpadanan Nabadia. Alai anggo taon on, ala tong ingkon di jabu hita dang boi patupaonta i di bagas joro.Tung godang do angka hasomalan naso boi be tapatupa, jala ingkon beradaptasi hita tu naso somal i. Maka haporseaonta tu Jesus pe dang boi songon angka na somal. Parsaoranta dohot Debata diganup ibadah dang boi be songon nasomal dihobasi angka parhalado, saonari hita be nama na masihobasan di bagas ta be. Tung ta hangangoluhon do di partingkian on hamalimon na raja/imamat Am orang percaya (1Pet. 2:9).        

               Hinorhon ni i, tung ringkot situtu do nang pangantusion nalam tang angka namarpardomuan tu haporseaon. Sada sian i, ima pangantusion taringot ni lapatan dohot pangkorhon ni parpadanan na badia. Dang boi tapatupa diari marsogot alai ingkon lam taantusi ma nian lapatanna. Marhite sian pangantusion na bagas jala na tepat boi do nang ungkap pingkiran nang rohanta mangulahon na hombar songon singkat ni Parpadanan Nabadia i dingolutta be. Pangantusion di lapatan dohot makna ni Parpadanan Nabadia i ma nagabe turpuk jamita dihita di borngin on na dienet sian 1 Kor. 11:23-32. Tung mansai ganjang do namasa sabutulna di hari Kamis Putih sada sian i ima na manganton Parpadanan Nabadia Jesus dohot angka siseanna. Diihuthon nasida do tradisi ni halak Jahudi na merayahon paskah/pesak/haluluar nasida sian tano Misir (Pat. 2 Musa 12:1-28).

Huria ni Tuhan na hinaholongan ni Tuhan Jesus Kristus,

               Tung somal do tabege ia Parpadanan Nabadia i, ima dalan hasesaan ni Dosa. Asing ni i, adong muse pangantusiaon na mandok molo nungga manjalo parpadanan na badia na marsahit, tanda ma i nanaung jonok hamatean ni namarsahit i. Pangantusion on torop do jumpangta di angka ruas. Jotjot do i ala dipatudos tu na niadopan ni Jesus di borngin na parpudi (Kamis putih) andorang so mate Ibana. Pangatusion naparjolo i sintong ma tutu alai anggo napaduhon i dang apala tung sintong. Ai dipatupa Jesus pe Parpadanan Nabadia di borngin naparpudi i ndada nanaeng mandok dalan/tiket na tu hamatean i. Antong boasa di bahen Jesus i? Marhite turpukta borngin on boima idaonta manang na piga pangantusion taringot tu Parpadanan Nabadia i

1.    Boasa dipatupa Jesus i diborngin na parpudi i: Marningot Tuhan Jesus, "bahen parnigotan di Ahu" (24, 25). Aha do siingoton uju patupahon Parpadanan Nabadia?

a)       Marningot Ibana. Parpadanan Nabadia ima tingki na paingothon hita tu Jesus sipalua i.

b)      Marningot pengorbananNa maningkati hita gabe pelean nahussus tu Debata. Uju didok dagingku do on, na humokkop hamu. Versi Injil Matius dohot Lukas dagingku do on na dipasahat tu hamatean humokkop hamu. Pandohan on ima penggenapan ni barita nadi Jesaya bindu 53  ima birubiru ni Debata na manaon saluhut nabernit laho paluahon hita sian dosa, jala maningkati hita asa unang tu hita dihonahon Debata panguhuman i. Hasalaan dohot dosata dihonahon Debata tu Ibana singkat ni dagingta. Alani i, ganup taulahon Parpadanan Nabadia, sian haporseaonta ta ingot ma pengorbanan ni Jesus manaon na porsuk jala pola mate mamorsan dosanta/humongkop hita. Songon na nidok di 1 Pet. 2: 24 "Diporsan ibana do dosanta dibagasan daging na tu hau i, asa malua hita sian dosa, gabe mangolu dihatigoran i, hinorhon bugang na i do malum hamu".

c)   Marningot hasisingkop ni hasesaan ni dosanta marhite parpadanan naimbaru. Parpadanan  naburuk taringot tu pelean hasesaan ni dosa ndada talup pasaehon dosa (Hbr. 10:11). Alai didok Jesus parpadanan na imbaru maon marhite mudarhu. Ula hamu ma songon i, bahen parningotan di ahu (1 Kor. 11:25). Padan naimbaru martudutudu mai tu padan ni Debata (Jer. 31:34; pat. Heb. 8:12; 10:16-17), marpamuati do sogot rohangku mida hajahatonnasida, jala dang be ingotonku dosa nasida. Marhite Parpadanan Nabadia i, taingot ma naung dipadame Jesus hita tu Debata marhite hamateanNa. Ai hamateanNa i do manesa saluhut dosanta.

d)  Marningot naro do muse Jesus. Di ayat 26 didok do ia dipatupa parpadanan na badia ima laho mamaritahon hamatean ni Tuhan rasisara ro Ibana. On paingothon hita na rodo muse Jesus paduahalihon, ala ni patupa parpadan nabadia adalah paingothon hita asa rade manomunomu haroroNa na paduahon i. Rade manomunomu marlapatan ma i tongtong dungo marhaporseaon diganup namasa dingolunta. Dungo mangulahon parbue ni haporseaon naboi tarida dingolu siganup ari. Rade manomu nomu ndada gabe so marlompit tangan.

2.    Boasa dipatupa Parpadanan Nabadia i: Mamaritahon hamateanna,  "hamatean ni Tuhan i do na binaritahon muna disi, rasirasa ro Ibana" (26). Dison tung tangkas do Parpadanan Nabadia ima dalan mamaritahon hamatean ni Jesus dalan haluaon. Ndada hamateanta.

3.    Boa do hita laho patupahon i: Ditangkasi jolma ima dirina (27-32). Proses manangkasi diri napinatorang disoon marmula doi sian na masa di huria Korint na patupa parpadanan ni Tuhan. Dihatiha i, molo dipatupa Parpadanan Nabadia sai ihut do tusi marsipanganon (perjamuan kasih). Masiboan sipanganon nabe nasida. Dipapungu ma dung i rap mangan nasida. Alai adong ma terjadi kesalahan etis di hatiha i, dinapatupahon Parpadanan Nabadia nasida gabe masa ma parbolatbolatan. Na godang sipanganon dohot naso adong sipanganonna. Masisoroan sipanganon, gabe male nasada, mabuhan nasada gabe masipailaaan, dlan (ay.17-22). Dohot hata na asing ndang tung adong be dinasida holong dohot roha marbagi sumarihon dongan. Hape salah satu prinsip dasar ni Parpadanan Nabadia ima haradeon ni Jesus sumeahon/mambagi dirina/daging dohot mudarna, asa dipallehon tu jolma i songon dalan hasesaan ni dosa, haluaon, dohot hangoluan. Hape namasa dinasida i, parpadanan ni Tuhan/ Parpadanan nabadia dipatupa holan pasonang dirina jala pasombuhon dongan na male ala soadong dinasida. Dang gabe dalan pardamean be Parpadanan Nabadia ale gabe dalan parbolatan. Sialala ni, mereka mengambil bagian dalam perjamuan kudus dengan cara yang tidak layak, memalukan seluruh jemaat, dengan tindakan yang tidak dikendalikan oleh kasih untuk saudara seiman yang membutuhkan.  

Marhite situasi dohot pangulahonon sisongon i, didok apostel Paulus ma i parsala do i di daging dohot mudar ni Tuhan i (ay. 27). Alani i, do dipaingot Apostel Paulus nasida, molo naeng parsidohot di parpadanan na badia ditangkasi ma dirina dung pe i, asa dipangan sian roti i jala diinum sian panginuman i (ay. 28). Sialani i, na paling ringkot ditangkasi dison ima boado nasida (cara) patupahon parpadanan na badia i. Sialani i, tung soboi do dohononta ramun jala pardosa do ahu naso talup manganton Parpadanan Nabadia i. Manangkasi diri ndada manangkasi dosa alai lumobi manangkasi boa hita mangihuthon dohot mangulahon parpadanan i. Ai justru ala sipardosa do hita gabe talup jala ringkot manganton daging dohot minum mudar ni Kristus na manesa dosa i. Saleleng pardosa hita talup jala ringkot mangantonsa, alai unang ma gabe ro hita manggallang parpadanan i alai dang mampareatehon dongan, gabe dalan marbada, papuas hagiot ni pamatang, patudu haginjangon ni roha, dlan. Parpadanan Nabadia mangonjar hita asa lam jonok satu sama lain jala masisarihon dongan, asa boi marsada dibagasan daging ni Kristus.

Manang na ise na so mangkasi dirina saurdot do manang dang tu makna dohot esensi spiritual ni Parpadanan Nabadia, ido na paro sahit dohot panguhuman nasian Debata (ay. 29-32).

Huria ni Tuhan na hinaholongan dibagsan Jesus Kristus. Saonari nungga tangkas be taida lapatan ni Parpadanan Nabadia i antong aha siulahononta?

1.    Parpadanan nabida ima dalanta mangingot angka pambahenan ni Jesus na patupahon haluaon di hita, alai sekaligus asa berpartisipasi di dalam kehadiran yang menyelamatkan di masa kini, sambil menantikan kedatagan-Nya yang kedua. Dohot hata na asing masa lalu, masa kini, dohot masa depan dipasada do di parpadanan na badia i.

2.    Parpadanan Nabadia ima parningotan di pengurbanan ni Jesus. Haradeaon ni Jesus mambagi daging dohot mudarna tu hita jolma asa dapotan hangoluan dohot haluaon. Ide pokokna ima Pengorbanan na sumeahon diri, sumeahon naringkot di diri asa mangeahi naringkot didongan. Parpadanan Nabadia manogihon hita asa haluar sian sikap egois jala masuk ma tu pangalaho na ra sumarihon dongan. Molo soboi pe taulahon Parpadanan Nabadia diari marsogot, tangkas ma tapingkiri pengorbanan aha na boi tapatupa di ari marsogot asa tung tahangoluhon lapatan ni parpadan na badia i, natape ndang boi taulahon. Singkat ni parpadanan na badia i, naeng ma tabahen tindakan berkorban demi orang lain. Olo ma nian hita mambagi roti dohot anggurta (sipanganon, siinumon, sihumisik) tu angka dongan na susa alana ni Korona on asa tung dapotan haluaon dohot hangoluan nasida. Alani i, tapingkiri majo, Aha ma na boi talean tu halak ditonga ni panosak ni Korona on. Husoba hami mamingkiri rupani, anggo ahu marsogot sian na adong sisaotik na dihami i, rade ma hami mambagi 10 Kg boras, 2 Papan Tolor, 5 Kg gula, dohot 5 Kg Minyak Goreng. Jala nungga adong manang na piga ruas ni huria naung olo marbagi rap dohot hami melalui gerakan Diakonia GKPI Saroha na ginagas ni angka ruas ni huria. Parpadaan nabadia mandorong hita asa rade to share something with someone, berbagi sesuatu kepada seseorang. Antong huontang ma hita sude na boi marbagi asa marbagi hita. Asa parsidohot hita diulaon haluaon na pinatupa ni Jesus dipartingkianta sisaonari on. Rade ma hita mahita MANARUHON na adong dihita lao MANARIHON na ringkot di dongan.

3.    Parpadanan Nabadia ima dalan mamaritahon hamatean ni Kritus. Alani i, molo tung adong halak na marsahit manganton Parpadanan Nabadia ndada na mamaritahon naeng mate na ma ibana, alai sabalikna paingothon naung mate Jesus humokkop sude dosa ni na marsahit i. Asa marhite i, rade ibana manomunomu aha pe sangkap ni Debata dingoluna. Marhite nadipaingot ibana di huaso hamatean ni Jesus na paluahon hita sian sumbia ni sibolis huhut naeng manaluhon hamatean i, rade ibana manjalo huaso hamalumon sian parsahitonna. Huhut doi i paingothon nasida masisesaan dosa. Lumobi ma  paingothon angka keluarga na hipas dope asa rade mangihuthon tiruan ni Jesus na rade berkorban sahat tu na mate humokkop hita na hinaholonganna. Rade ma angka keluarga mengorbankan tingki, tenaga, nang sinadongan laho mangurus dohot humokkop na marsahit i dibagasan holong na polin.

4.    Parpadanan Nabadia ima proses mangingot. Molo salpu haduan Korona on, 20 manang 30 taon naro ra marcerita ma hita tu pinomparta manang pahomputa taringot tu namasa on. Aha ma siingototnta sian na masa on asing ni angka pembatasan-pembatasan na taadopi saonari? isarana penundaan ni pesta, pembatasan ni ulaon natorop, sekolah jarak jauh, ibadah online, dlan? adong do nadenggan sian dirinta sandiri naboi ingoton ni jolma? tangkas ma jota rimangi dibagasahan rohanta be.

5.    Parpadanan Nabadia paingothon hita mangulahon hatigoran/keadilan. Molo taingot do Parpadanan Nabadia, sude do halak dapotan roti dohot anggur na sama natape berbeda do anggo pelan ni na manganton parpadanan na badia i. Marlapatan ma i paingothon hita tung dos do hita sude diadopan ni Debata. Rap manjalo daging dohot mudarna napaluahon hita. Alai anggo sipelehononta tu Ibana dalan hamauliateon ni rohanta diungkur ma i sian na adong dihita. Suang songon i do molo tung naeng marbagi hita dipartingkian on, ukuranna ima na adong dihita. Asa molo so boi pe hita magulahon Parpadanan na badia marsogot, alai tung boi do hita mangulahon hatigoran/keadilan. Asa unang masa be dihita marnida bohi, penindasan, pangotootion, dlan.

6.    Prinsip dasar ni Parpadanan Nabadia ima pasadahon dohot padomuhon, padamehon jolma i tu Debata. On ma prinsip sitioponta di masa ni korona on, hasadaon ni roha dohot hadameon, marpanarihon. Molo dang boi tapatupa Parpadanan Nabadia marsogot, alai anggo hita boi do masisalpuan manang masiseaan angka hahurangan dohot dosa rap dohot angka na humaliang hita. Margogo ma hita mandalani ngolu on dibagasan spiritualitas Parpadanan Nabadia.  Amen.