Marhamubaon, Marsiurupan, Jala Marhatigoran

Marhamubaon, Marsiurupan, Jala Marhatigoran

(Sepania 2:1-3)

Huria ni Tuhan na hinaholongan dibagasan Jesus Kristus,

               Hea do ra mangulahon angka na humurang gellengta, ate. Isarana, dang dianturehon ulaonna, mangalaosi ajar dohot parenta ni natoras na, ndang marsemangat mangulahon manang na ahape, holan mamingkiri na ringkot didirina. Molo masa songon i, hinorhon holong ni rohanta, ra jumolo do nasida tapungu, tapodai, tapaingot, molo na so semangat be sikkola misalnya dilehon semangat dohot dorongan. Alai molo so dianturehon be i, olo do  hita on mandabu uhum tu nasida asa anggiat nian marhamubaon. Manang na  i, olo do gabe dapotan eja nasida, alai salana namai ai nungga di paingot. Taingot do ra, do pandohan Tinampul bulung si hupi, Pinarsaong bulung sihala unang sumolso dipudi ndada sipaingot naso ada. Marlapatan ma i, nungga dipaingot hian, ba molo sai marjogal do lok ma ditaon bukkukkna. Molo adong natuatua, komandan, manang guru na pintor hatop mamuruki, mamungkul, manguhum andorang so adong sipasingotna, didok ma KEJAM, molo di sikkola Killer.

               Asa tung holong do roha ni halak Batak marianakhon, marripe, dohot mardongan. Tanda ni holong i, salah satuna ima haradeon laho paingothon huhut manganturehon naringkot di dongan. Molo so olo be halak Batak paingothon jala manganturehon na humaliangna tanda naso holong be i. Molo sanga didok halak eee pasombu ma songon i, loja ho. Tada ni putus asa jala naso adong be holong na. Alani i, unang ma las rohanta molo so hea hita dipaingot nahumaliangta hape nungga mangulahon na sala. Molo so dipaingot angka pardijambuta hita hape nungga tung tonga borngin mulak sian lapo, sai marisapi, mabuk, sai haluar sian jabu hape nungga diorai pamarenta, dlan tanda bahaya mai, naso adong be holong ni rohana di hita. Ido sipata, dihalojaon niba rupani, sai jotjot do Inang pandita paingothon iba asa mangan, godang minum, bahkan olo do i sampe piga hali, di sada sisi olo jut roha alai di sisi na asing las roha, ala tung mansai holong dope roha na di iba natape nungga mulai ubaonon dihaposoon on, hehehe.

Huria ni Tuhan nahinaholongan,

               Songon i do nang Debata tu bangsona. Tung so hadodoon do holong ni roha ni Debata di bangsona. Natape sai mulak-hulak ditinggalhon bangso i Ibana, tung so mura do bali manang sumurut holong-Na, alai sai tong dope diparateatehon, marhite angka naposoNa. Sada sian ima Panurirang Zefanya, najinou jala disuru Debata paingothon bangso Israel asa tung marhamubaon andorang so didabu Debata panguhuman di ari pangarimason-Na. Tung sude do sange parange ni bangso i hatiha i. Di pemerintahan, diparugamoon, di parsaoran si gaup ari, di budang hukum, dlan tung sursar do. Dohot jempek dohonon, tung butuha jala ngolu pardagingon do na hinaringkothon ni bangso i, ndang tung adong be rohana laho mamingkiri naringkot tu partondion, mamingkiri dongan. Dang lomo be roha nasida jala dang marsemangat be laho marpungu mamuji pasangap Debata.

               Alai natape songon i, tong dope dipatudu Debata holong Na na paingothon nasida huhut manjou jala mangalehon kesempatan tu nasida asa marhamubon ni roha. Diturpukta na tolu ayat on, dipatarida do bentuk ni holong ni roha ni Debata di bangso na i, ima marhite:  

1.    Joujou tu hamubaon. Seruan untuk bertobat (ay.2). Di bindu 1: 14-18 nunga dibaritahon panurirang Zefanya panguhuman na nanaeng dabuon ni Debata. Alai andorang so songgop dope paruhuman i, dipaingot jala di jou Debata bangso i asa marhamuboan. Tujuanna ima, asa tung anggiat onding manang dang parsidohot nasida dipanguhuman i. Didok ma "tangan so songgop dope uhum i...tagan so songgop dope tu hamu parpiar ni rimas ni Jahowa, tagon so songgop dope tu hamu ari pangarimason "i marhamubaon ma. Tung manongtong do holong ni Debata di nasida.

2.       Joujou asa marharinggason. Seruan untuk bersemangat (ay.1). Dung dipaingot nasida asa marhamubaon, disosohon ma muse nasida asa tung renta muse mandapothon jala mamuji Ibana. Di dok ma Tungki ma hamu jala mardangoldangol, ho ale bangso naso umboto maila. Dihata Indonesia di dok Bersemangatlah dan berkumpullah, hai bangsa yang acuh tak acuh. Bangso naso umboto maila/acuh tak acuh martudutudu do tu pangalaho ni bangso i na so bersemangat marsaor dohot Debata, mamingkiri na ringkot didiri, dang peduli tu dongan marhite na papeol uhum, menindas na pogos jala na gale, marhaporseaon na rumar/sinkritis, di somba do Debata alai laos dioloi do debata sileban ima dewa kesburan/dewa Malkom, tentara langit, dlan (1:4-6), dlan. Di tonga ni kondisi na songon i disosohon ma tu nasida asa tung semangat  nasida mangolu dibagasan panghirimon tu Debata, semangat marhamuboan ni roha, asa tung renta muse marpungu mamuji Debata, semangat mangadopi angka hamaolon ni ngolu, semangat mangeahi hamajuon lumobi ma hamajuon ni haporseaon dohot partondion, semangat laho masiurupan.

3.       Sosososo asa hamubaon i marhataridaan di ulaon nasida. Seruan untuk beraksi (ay. 3). Dipatota do di ayat tolu on aha ma sibaheonon nasida asa anggiat tung diondingi hamu diari pangarimasan ni Jahowa. Dang diloas bangso i bingung, dung dijou mulak, dilehon semangat, dipaboa muse aha sipatupaon nasida ima:

ü Lului ma Jahowa. Carilah Tuhan. Disuru nasida mangalului Debata ndada ala na mago Debata, alai sabaliksa nasida do na mago. Hata lului ma Debata marlapatan do i mulak ma mandapothon Debata. Ai torus do mian ditonga-tonganta Debata, bangso i do na jojot maninggalhon Ibana. Alani i, mulak ma tu abingan jala mangasahon Debata. Tung so margelleok do nasida rupani mangadopi paruhuman i. Ai so adong be sipangasahonon nasida anggo sian dirina molo naeng malua sian ari pangarimason ni Jahowa. Dang hamoraon, pangkat, habisuhon, dlan ndada holan Debata sandiri ma pangusandean nasida. Ido nang na nisosohon ni panuriang Amos lului hamu ma Jahowa asa mangolu hamu (Am. :4-6). Hangoluan dohot haluaon sian paruhoman i diparade Debata diangka na mangalului ibana. Molo taparrohahon do rupani dingolu siganup ari, jotjot aha na talului i mangatur gerak ni ngolunta. Isarana molo bagudung do talului maka sai unduk2 mahita, molo dekke do di sunge dadapdadap, dlan. alani i, molo mangalului Debata, ngolutta on pe di atur Debata ma.

ü  Lului hamu ma hatigoran. Cari keadilan. Ditonga ni kondisi ni bangso i napapeol uhum, mangarapu napogos, mangotootoi nagale, menindas naso marggellok, disosohon ma bangso asa mangulahon hatigoran jala mangolu dihatigoran i. Ditinggalhon nasida ma roha na ahut tu diri, unang dibuat be naso bagianna. Alai mangolu ma nasida ganup hombar tu bagian/jambar nasida be.

ü Lului hamu ma haserepon. Carilah kerendahan hati. Haserepon ni roha nadul ni langgus dohot ginjang niroha. Haserepon ni roha i tarida ma i dibagasan panghataion nang pambahenan pe. Asa boi marhaserepon ni roha naingkon do mian rap dohot Debata. Ai ise na mian rap dohot Debata naumpuna jala mual ni saluhut tung naso tupa be i marhaginjangon ni roha. Ai dang tung adong hita on na lobi sian Debata.

Huria ni Tuhan na hinaholongan,

               Molo tarimangi tu parngoluonta dibasagan ombas on ndang apa sarupa konteks ta dohot bangso Israel na niadopan ni panurirang Sepania. Alai, di sisi nasing adong do angka hasarupanna. Ima rap mangadopi ancaman ni ngolu. Di masa nisi Sepania, anacaman na niadopan nasida ima panguhuman rimas ni Debata. Molo hita tongon mangadopi ancaman ni virus Korona. Alani ahama  nanaeng si ahuononta dingolunta asa tung boi hita bertahan mangadopi angka namasa?:

               Naparjolo, Hot jala manongtong do holong ni roha ni Debata. Olo do nungga lam godang hita on naso semangat be mangulahon angka siulonta. Partigatiga maheu, ala ndang adong panuhor, partani pe marsak ala arga ni suansuanan dang adong, dakdanak mulai malas jala bosan marsaiajar  di jabu, angka dongan supir jut rohana ai dang adong penumpang ala ni libur parsikkola, parkarejo, dlan. Dikondisi sisongon on, dipaingot do hita tung maol pe nataadopi hinorhon ni Virus Korona on, tong do diparateatehon Debata hita. Dilehon do gogo nang semangat asa unang tung mandele hita alai kuat menghadapi jala manghamonanghon hamaolon hinorhon ni Korona on. Molo tung adong hita on na sanga hurang semangat marpungu tu gareja nang partangiangan, tarjou ma hita dipartingkian on asa tung lam rosuk hita mandapothon Debata natape marhite parpunguan partangiangan di ganup bagasta be. Taingot ma, hot jala manongtong do holong ni roha ni Debata nang dihita pe dipartingkian on. Hotma hita bersemangat mandalani ngolu on dibagasan panghirimon dipangaramotion ni Debata. Dibalik ni i, ringkot do nang hita sama hita masilehonan semangat marhite hata nang pambahenan pe.

               Napaduahon, Tung retes situtu do hape ngolunta on. Dipanosak ni Virus Corona on, dipaingot do hita tung naso adong do naboi sipangasahononton. Tung boa pe bonggal ni jolma i, dipamatang, diarta, dipangkat, boi do talu bahenon ni virus nametmet i. Sialani i, ditonga ni kondisi on, disosohon do hita asa mangalului Debata dingolu on. Ai Ibana do na talup pangunsanddean, pangalualuan, jala na paluahon hita. Mangalului Debata, mangonjar ngolunta asa saurdot tu na hinalomohon ni rohaNa, unang be sai holan lomo ni rohanta sambing Halomoan ni roha ni Debata na parjolo ima Hamuboan ni rohanta.  Dungi tapangke ma habisuhon na dilehon ni Debata i tu angka na denggan laho padimundimun hangoluan bersama unang be holan ngolum sambing.

               Napatoluhon, Mahaserepon, Masiurupan, Mongolu di Hatigoran. Unang tung taulahon be pangarapuon, mangotootoi, isarana mangalbang arga ni tiga-tiga, pasipal-pasipal halak na gale. Andul ni i, di tonga ni panosak ni Korona on, tatingalhon roha na ahut di diri, roha na cuek naso peduli tu dongan, tauji ma mangolu dibagasan roha na ra masiurupan. Marsada ni roha unang siboan dalanna be jala sibahen lomona be. Tung marsada ma hita masiurupan mangalo virus Korona on dohot angka dampak na muncul baik dibidang ekonomi, sosial, dohot partondion pe.. Diangka na hahurangan, tarjou ma hita asa rade mangalehon pangurupion sian naadong dihita. Tung bagas do hurimangi hami nuaeng, aha ma naboi bahenon ni GKPI JK Saroha mangurupi pencegahan dohot penyebaran ni virus on? Holan gabe panonton do hita? Sae do holan tangiang? tontu ndang sae! boi do nuaeng taurupi angka na susa ala ni korona on? baik di konteks ni Hurianta, Doloksanggul, Humbang, maupun nasional? Atik tung naung adong do ruas ni huria na gabe maol dapotan sipanganon dinaso taboto? Alus ni Sukkun sungkunon ima: "BOI MOLO RADE JALA UNGKAP ROHANTA". Alana ni i, taparrohahon majo angka dongan sa sektor ta, dongan sahutta ambetak tung adong na hahurangan ala naso boi be karejo. Huhut laos tapaboa ma i tu sintua, pandita asa tapingkiri boa mangurupi nasida. Asing ni i, boi dop tabahen penggalangan dana asa tabahen aksi sosial.

               Naparpudi, Marhamubaon ni roha ma. Molo tung tarajumi Amang/Inang panosak ni Korona on songon panguhuman, sungsungkun, nang dalan ni Debata on laho papita haporseonta huhut asa tung marhamuoan portibion, tatopoti ma dosanta jala marhamubaon ni roha ma. Paima so sahat dope tu ngolum, muba ma. Binsan dilehon dope tingki, kesempatan, muba ma! Amen.