Manghalashon Hananaek ni Jesus tu Surgo (Markus 16: 14-20)

Manghalashon Hananaek ni Jesus tu Surgo

(Markus 16: 14-20)

Huria ni Tuhan na hinaholongan dibagasan Jesus Kristus,

Sadarion, tahalashon do ari parningotan di hananaek ni Kristus tu surgo. Jotjot do memang hera na hurang ringkot dihita laho manghalashon ari hananek on. Sai dao do gumodang roha nang pingkiranta manghalashon Natal dohot Paskah. Hape sabotulna sarupa do hinabalga ni pangkorhon ni sejarah hangoluan ni Jesus di hasiangan on. Alani i, ingkon laos sarupa do nang balga ni las nirohanta dinamarnigot sasude. Adong opat tahapan ngolu ni Jesus na tapestahon ima: Hatutubu, Hamatean, Haheheon, dohot hananakokNa tu surgo. Naopat on ingkon taida do hibul sisadahasadaon, ndada boi tarsirang. Molo dang adong sada ndang marlapatan na asing. Isarana molo so tubu ndang adong hamatean, hahehehon, dohot hananaek. Alai molo so adong hamatean, ndang marlapatan nang hatutubuNa. Suang songon i do molo so nakkok Jesus tu surgo jala maotaot diportibion marisuang ma nang haheheonNa. Marhite hananakok na tu surgo gabe singkop ma antong pardalananNa na ro sian surgo jala mulak manaek tu surgo. Tangkas ma na sintong diboto Jesus dalan tu surgo. Sialani i, huria ni Tuhan ari hananaek na taingot sadarion, tung las ni roha bolon do nang dihita. Ai marhite na manaek Jesus tu surgo radema nang inganan dihita disi, dung tatadinghon hasiangan on.

Saonari boa do hita manghalashon hananaek ni Jesus dibagasan ngolu siganup ari? ima nanaeng ta rimangi marhite turpukta sadarion na dienet sian Markus 16:14-20. Turpuk ta sadarion bagian ni barita taringot nadipatuduhon Jesus diriNa naung hehe i sahat tu hananakkokna.

Pahot haporsean di hahehon ni Jesus

Dung dipatuduhon do diriNa naung hehe tusi Maria dohot  tu dua siseanna jala dibaritahon tu sisean na asing alai laos so dihaporsea i nasida (ay. 9-13), diturpuk on, dipatarida Jesus ma diriNa tu nasampulusadai huhut dipinsang jogal ni roha nasida naso manghaporseai barita haheheonNa na binaritahon ni angka naung marnida Ibana (ay. 14). Tontu tung massai ringkot do dihaporseai angka sisean i natutu situtu hehe Jesus asa tung boi nang nasida gabe sitindangi ni barita na uli i. Habot ni roha nasida di ari hamatean ni Jesus mambahen nasida bangkol manghaporseai barita haheheon i natape nungga diajarhon Jesus hian i uju ni ngoluNa. Laos sian pengamalam ni angka sisean on ma boi taalusi sungkunsungkun ni deba halak na mandok: " boasa dang langsung manaek Jesus tu surgo dung hehe sian tanoman i?" Molo langsung manaek Jesus tu surgo di ari haheheon na i, tontu dang porsea angka sisean i dibarita i. Alani i, ingkon diida nasida Jesus asa porsea. Dohot hata naasing, ringkot ingkon apulan jala pamagoon ni Jesus jo habot niroha nasida di hamateanNa suang songon i pamagohon biar ni roha nasida. Laos udut ma tusi paposhon roha nasida naung tutu situtu hehe Ibana. Dohot jempek dohonon, ndang langsung manaek Jesus tu surgo asa jolo diparade angka sisean i.

Manghalashon barita hananaek ni Jesus taulahon ma marhite na pahot haporseaon di haheheonNa. Ihut tusi, molo diparade Jesus do angka sisean i andorang so nakkok Ibana tu surgo, siparsiajaran ma i nang dihita asa mangarade siulaon dohot denggan unang ma asal dipatupa. Unang mura lepas tangan diangka ulaon nang tanggungjawab. Unang muramura mandok, mamereng disi ma i. Halak naporsea tu Debata ima halak na berencana jala parade, mangulahon dohot mempertanggungjawabhon sude rencana na niulahonna.  

Mamaritahon barita nauli

Molo taparrohanon rupani, sada na tung mansai ringkot dingolunta on molo tung pe marsirang hita dohot na tahaholongi ala ni hamatean ima, adong nean tonana andorang so marujung ngolu. Adong hata dohot poda parpudi siingoton. Jala laos jotjot do poda manang tona na parpudi i tung mansai arga tahilala. Alai diari hamatean ni Kristus, adong do tahe tona parpudi ni Jesus tu angka sisean i? ndang adong!, ala nungga lari angka sisean i alani biar ni rohana. Siala ni i, dung hehe Tuhan Jesus jala dipatarida diriNa tu sisampulu sada i, diuduti Jesus ma mangalehon tona na parpudi tu nasida andorang so manaek tu banua ginjang ima parenta asa laho nasida mamaritahon barita nauli. Didok: ”laho ma hamu tu liat portibi on; jamitahon hamu ma barita na uli i tu nasa na tinompa. Naporsea jala tardidi, dapotan haluaon; alai naso porsea i, hona uhum do" (ay. 15-16). Disuru do nasida asa manjamitahon/mamaritahon barita nauli ima ngolu dohot pambahenan ni Jesus mulai sian hatutubu, hamatean, haheheon dohot hahanakokna tu surgo laho manesa saluhut dosa ni jolma jala parade inganan dinasida di banua ginjang. Barita nauli i jamitahonon nasida tu nasa na tinompa. Barita haluaon i ndada holan tu jolma alai tu saluhut na tinompa termasuk ma tu alam semesta. Jala ingkon sahat do barita na uli i tu liat portibi on. Ise na porsea dibarita nauli i, jala tardidi ima na mamparsaulihon hangoluan dohot haluoan na manongtong. Alai molo so porsea dibarita nauli nanijamitahon nasida i, hona uhum ma. Maka dalan asa rap hita hundul dohot Jesus di surgo hasonangan i ima haporseaon.

Onma salah satu dalanta manghalashon ari hananaek ni Tuhan Jesus ima marhtie na rade hita gabe siparsidohot mangulahon parenta mamaritahon barita nauli i. Mamaritahon huhut mangulahon poda hangoluan dohot haluaoan i tu saluhut tompaan. Pamaritaan ta i, boi do marhite angka pandohan, jamita alai lumobi ma nang marhite angka pambahenan. Ditonga ni panosak ni Korona on rupani, ngolu dohot pandohan na pangoluhon boi do i gabe dalan mamaritahon barita nauli. Asa daom asian hita pandohan dohot pangalaho na paro hamatean tu saluhut donganta nang sandok tano on. Sialani i, molo boi tajaga huhut tajamothon dirinta asa unang terinfeksi jala taputus mata rantai ni korona on nungga tung dalan mamaritahon bairta nauli i. Ditonga ni kemajuan teknologi saonari i, tung so adong be batas batas ni inganan. Nungga boi be tajangkau inganan na tung mansai dao. Isarana, panghobasiaonta siganup Minggu dohot partangiangan marhite jamita, renungan malam na dibahen tu Youtube, boi do i diida jala dibege halak di sandok portibion. Keterbatasan jarak ndada be alasan laho sundat mamaritahon barita nauli tu liat portibi on. Tung ringkot ma pahebahebaonta ngolu na  bertindak lokal berpikir/berdampak global.

Siparsaulihonon ni parbarita nauli

Ndada disuru huhut dipaborhat Jesus nasida alai dang dibohali. Dilehon do janji na boi parsaulihonon nasida rap dohot angka naporsea i dingolu siganup ari uju borhat nasida mamaritahan barita nauli i. Adong manang na piga didok diturpuk taon ima: (1) pabalihon sibolis marhite goarhu. Songon naung diida nasida uju ni ngolu ni Jesus, talup do Jesus pabalihon sibolis, tondi na hodar na sorop tu jolma i. Huaso i ma na lehononna tu nasdia dohot angka naporsea i. Pabalihon sibolis dibagsan goarNa namarlapatan marhite jala dibagasan huaso ni Jesus. Ndada huaso nasida sandiri. Dingolu siganup ari, pabalihon sibolis ndada be holan pabalihon tondi nahodar na sorop tu jolma. Alai lobi sian i, ima hatauon pabali parange nisibolis sian ngolunta. Asa halak na porsea i margogo do mangalo jala palua diri sian pangalaho ni sibolis, hajahaton, dlan. Ido alana da tung olo be sibolison halak poresa natape tung godang na boi mambahen hita sibolison dihamaolon hinorhon ni Korona on. (2) manghatahon hata naimbaru. On tung tangkas ma on parjolo tarida uju masa ari Pentakosta. Uju songgop tondi pardia tu angka siseaon i, marpangkuling naasing ma nasida, marguru tu pangalehonon ni Tondi i tunasida (Ul 2:4). saluhut halak na adong diinganan i sian ragam luat boi mangantusi pandohan nasida. Marhata naimbaru dison laos boi do secara simbolis talapati ima mangahatahon angka hata dibasagan bahasa kasih; (3) Manjomput ulok dohot dang mahua natape diinum rasun. Adong semacam kekebalan ni naporsea i maralohon sumbia nisi bolis na diwakilhon diturpuk on marhite ulok dohot rasun. Dimasa di huria naparjolo i, boi godang do namangadopi hamaolon alai margogo do nasida mangalosa sahat tu ujung ni ngoluna. Dipardalanan nisi Paulus hea do ibana diturbing ulok alai dang mahua ibana. Natape masa doon secara harfiah, laos boi do i antusanta secara figuratif. Manangkup ulok ima mangkup jala pamate parange sibolis. Kebal mangainum rasun boi dilapati nang dang mampan angka pangalaho naso gabeak tu ngolu ni na porsea. Panghataion naso gabeak, hoax, dahto angka hata na mangarusuni ndada boi mambahen naporsea i talu. Ai ndada godang nuaeng o  rasun di ngolu on. Haru teknologi on pe godang do rasun naboi manegai ngolu molo so jamot hita mamangkesa. Olo do gabe hona hurung halak ala ni jari-jarina na manurathon naso sintong di FB, dlan. Angka sisongon i ma nasoboi manegai halak na porsea. Alai unang ma laos dilapati on marhite na paro jea tu ngolunta. Isarana mangasahon ayat on gabe tatangkupi ulok jala tainum rasun soada alana, marjea jala olo do mate hita hinorhon ni i; (4). Mangampehon tangan huhut Pamalum halak. Kuasa kesembuhan. Huaso ni Jesus na talup pamalum angka namarsahit ima sijaloon ni angka sisean i. Ido alana panghobasion ni halak Kristen mulai sian penginjilan na parjolo dang tarsirang sian na patupa manang manjaga hahipason. Sai marudut do najolo pembangunan ni gareja dohot pembangunan ni rumah sakit nang sikkola pe. Asa saurdot do pamaritaan barita nauli i hataridaanna dinapatang partondion suang songon i nang pahipas pamatang. Ditonga ni hamaolon ala ni korona on tatambori haporseonta marhite hata ni Debata huhut laos tajaga hahihapasonta dohot hahipason ni donganta. Rade masiurupan asa rap sehat.

Tarhinsat Jesus jala hundul tu simaun ni Debata

Uju manghatahon i Tuhan Jesus tarhisat ma ibana tu banua ginjang, laho hundul tu siamun ni Debata. Dung singkop diparade Jesus nasida dihaporseaon dihaheheonNa, disuru mamaritahon barita nauli, dohot tanda sijaloon nasida, manaek ma Jesus tu banua ginjang. Mulak ma Ibana tu inganan haroroNa. Singkop ma pardalanaNa sian surgo mulak tu surgo. Hundul disiamun ni Debata marlapatan ma i mulak mamuse ibana tu hamuliaonNa. Hananaek ni Jesus on laos on do pahothon rohanta tudia do ujung ni pardalanan ni ngolunta. Ndada hasiangan on, alai surgo hasonangan i do. Alani i, marparange ma hita songon na tongon mardalan tu surgo.

Borhat marbarita nauli jala diurupi Debata

Gira dung manaek Jesus tu surgo borhat do angka sisean i mangulahon parsuruon i mamaritahon barita nauli tu ganup luat. Diurupi Debata do nasida jala dipahot angka jamita nasida marhite angka tanda na mangihut i. Onma na paingothon hita angka na manghalashon hahahaek ni Jesus, ingkon adong ma dihita haradeon dohot harentaan laho mangulahon parsuron ni Jesus dingolunta siganup ari. Ditonga ni panosak ni Korona on, tabaritahon ma huaso ni Jesus na paluaho jala pangoluhon i marhita na rade hita masirupuan jala pangoluhon donganta. Rade jala renta ma nang hita patupahon angka partangiangan dohot kebaktian diganup bagasta be. Taingot ma sai naurupan ni Debata do hita songon panurupiuonna tu angka sisean i namarbarita nauli i nasida. Ndang pasombuon ni Debata angka naprosea i mangula sandiri alai sai urupanna jala donganana do. Aha naung jinanjohon ni Debata da ingkon do gonopanna. Ai dang parjanji koling manang siose janji Ibana. Loas i ma na mangurupi hita asa unannga dong hita on siose padanan nang janji dingoluon.

Alani, marsiajar ma hita mamangke tingki, unang adong madipasuasaehon. Unang be sai adong dihita parange namarpainte jo. Aha na boi taulahon, lumobi ma angka ulaon na denggan, gira jala ria ma taulahon. Lumobi ma dipanosak ni Korona on unang marnalemba diangka ulaon alai tapahinsa jala taharinggashon ma. Tahalasson ma ari hananakkok ni Jesus on marhite: Patanghon haporseaon tu haheheonNa manaluhon hamatean, rade jala renta mamaritahon barita nauli, rade ma mamparsaulihon ragam ni pasupasu ni Debata, margogo mangalo sibolis asa unang sai sibolison, rade manaluhon ragam ni rasun ni hasiangan on, paro hahipason unang paro parsahiton, sipamalum sahit ma unang patubu parsahiton. Amen.