Jamita Paskah 2020

Huaso Haheheon ni Jesus

Matius 28:1-10

Huria ni Tuhan na hinaholongan dibagasan Jesus Krsitus, Selamat Paskah ma di hita saluhutna.

Unok ni haporseaonta

Sadarion di tonga ni kondisi na mamaksa hita ingkon markebaktian dibagasta be tahalashon jala tarayahon ari heheon ni Kristus manang Paskah. Paskah ima unok/pusat ni haporseaonta, ai didok hata ni Debata 'Ai molo so hehe Kristus sian angka namate, rumar do jamitanami, loas rumar ma nang haporseaon muna (1 Kor 15:14)'. Asa marisuang do hatutubu dohot hamaten ni Kristus molo dang hehe Ibana. Haheheon ni Kristus do nang na manjamin haheheonta muse. Oleh karena itu, memperingati kebangkitan Kristus juga momen meneguhkan kebangkitan kita mangadopi nasa namasa. Termasuk ma disi haheheonta maradophon virus Korona. Siala ni i, ditonga ni parmingguonta dibagastabe tama ma hita lam patanghon panatapanta diunuk ni haporseoanta i, marhite turpuk jamita minggu paksah naparjolo on, ima Matius 28:1-10.

Nasogot di buhabuha ijuk nunga tabege jala tarimangi hata ni Debata sian Markus 16:1-8 na tong manghatahon barita hahehon ni Kristus songon turpukta sadarion. Sarupa do nian anggo nabinaritahon na ima haheheon ni Jesus alai sai adong do parasinganna. Alani i, dang tung pola ulangan nami patoranghon jamita buhabuha ijuk i nungga tung tangkas be tabege manang tajaha i. Molo tung dang dibege/dijaha dope, ala talu dibahen ngali ni ari, panarik ni simalolong gabe laos tarpodom, boi ma muse annon dijaha/dibege.

Paskah: Mangargahon naso nietongan ni hasiangan on

Huria ni Tuhan na hinaholongan dibagasan Jesus Kristus,

Dingolu on, olo godang jolma dang apala dietongi donganna ala ni statusna isarana ala na pogos, gale, marsahitsahit, dlan. Suang songon i do nang luat pe olo do dang apala dietongi jolma ala kawasan kumuh, angka na pogos mian disi, ndada songon kawasan elit na mian angka na mora. Di paskah, angka naso niargahon ni hasiangan on tung diparateatehon jala diargahon Debata. Diturpuk ta on, boi ma i taida di dua bentuk:

Naparjolo ma i, angka parompuan naro tu tanoman i. Dihatiha i, parompuan di halak Jahudi tung so apala dipardulihon do i. Dang dietongi ala memang tradisi budaya Patriakhal na nianut ni hajahudion mambahen parompuan gabe kelas bawah di masyarakat. Alai di peristiwa ni haheheon ni Jesus justru parompuan do na mendapat tempat na arga jala istimewa. Nasida ma na gabe saksi pertama di barita haheheon. Parompuan na ro tu tanoman i, ido na pajumpang jala manghatai dohot surusuruan na manggulang batu ni tanoman i jala na paboahon naung hehe Jesus (ay.5-6). Parompuan naro tu tanoman i do nang na pajumpang dohot Jesus naung hehe i (ay.9-10) Parompuan napajumpang dohot surusuruan rap dohot Jesus i do na disuru gabe panindangi/saksi pertama ni haheheon i. Naso diargahon portibion nasida alai dibahen Debata gabe apostel ni angka apostel. Tung diargahon peristiwa haheheon i do angka parompuan i. Napaduahon, tudia do didok angka sisean i manjumpangi Jesus? Galilea. Boasa dang tu Jerusalem songon pusat ni pemerintahan dohot peribadahan ni Israel? boasa ma tu luat ni angka halak naso dietongi halak Israel Jesus na hehe i marsaor jala pajumpang dohot angka sisean i? Ai dihatiha i, luat Galilea ima luat na dianggap terbelakang na diingani angka jolma na hurang di pendidikan, gale secara ekonomi, dlan. Ra dohononta do nungga di paboa hian i uju so mate dope Jesus alai dung hehe Ahu sian na mate, joloananku ma hamu tu Galilea (Mat. 26:32). Jala laos i do na dipaingot surusuruan nang Jesus tu angka parompuan i uju disuru nasida paboahon haheheon i (28:7;10). Toho do i, alai boasa ma ingkon Galilea? Ala marhite barita Paskah diargahon jala lehon Debata do perhatianNa tu inganan naso nietongan ni hasiangan on.

On ma nang na mangungkap roha nang parnidaanta huhut haporseaonta tung naso dipasiding Debata do hape angka nagale dihasiangan on. Marhite haheheon i, tung diangkat Debata do harkat dan martabat ni angka naso margellok dohot naso dietongi hasiangan on. Kristus yang bangkit dari kematian secara nyata memosisikan diri-Nya sebagai seorang pembela dan Juru Selamat bagi setiap orang yang terbuang, tersisih, dan ditolak oleh dunia ini. Ido nang na tahalashon dipesta paskah on. Diargahon jala diparateatehon Debata do hita angka naso margellok jala dang dietongi hasiangan on. Molo dohot do hita manghalashon i, laos ingkon las niroha i do mangonjar hita patupahon songon na binaen ni Debata i. Marhite semangat ni paskah on, talehon ma perhatianta tuangka na gale, namarhahurangan, taargahon ma angka naso dietongi dihasiangan on. Taloas ma dirinta gabe alat ni Debata manarihon nasida. Ditonga ni panosak ni virus Korona on, ingkon patuduhononta ma holong niroha ni Debata diangka na marhagaleon dohot marhahurangan. Taparateatehon masida, marhite na MANARUHON na adong dihita laho MANARIHON angka dongan na marhahurangan i. Ido sada konsep na tabangun di huria on saminggu on. Papunguhon angka na tinaruhon ni ruas i tu bagas joro huhut taruhonon ni huria i ma tu ganup bagas ni ruas ni huria na marhahurangan. Asa tung dijangkon nasida las ni roha ni haheheon ni Kristus dipartondion nang pardagingon pe. Antong masiargaan ma hita sama hita ai tung diargahon Debata do hita pola sampe olo Ibana mate jala hehe tumaluhon hamatean i.

Paskah: Transformasi Panghirimon (dang manongtong dosa, hamatean dohot pangkorhonna)

Huria ni Tuhan na hinaholongan dibagsan Jesus Kristus,

Marhite haheheon ni Kristus tahalashon do tung so permanen do dosa, hamatean, dohot saluhut pangkorhonna. Isarana, habot ni roha, pandelean, dlan. Paskah ima peristiwa matinya kematian. Marhite haheheon i, nungga mago be sorop ni hamatean. Ro angka parompuan i tu tanoman ima nanaeng laho mamiahi bangke ni Jesus (ay.1). Tontu dibagasan habot ni roha dohot pandelean do nasida hatiha i. Mereka sedih dan kehilangan harapan. Pahlawan, Mesias dan guru mereka, yaitu Yesus telah tiada dengan kematian yang sangat tragis. Alai, dinasahat nasida tu tanoman i, ndang jumpang nasida be bangke ni Jesus. Ise di nadijumpangi nasida? Jesus naung hehe tumaluhon hamatean i (ay. 6, 9-10). Dang manongtong hamatean dohot sude dampak na hinorhonna. Dibagasan habot ni roha do nasida ro tu tanoman i, mulak dibagasan las niroha. Didok do di turpuk ta on ”las situtu do rohanasida, marlojong do nasida laho mamaritahonsa tu angka siseanna" (ay.8). Marhite haheheon i, dipaingot ma tung boa pe hape balga ni dosa tung naso permanen do i ai nungga disesa Tuhan Jesus. Alani i, las nirohanta ima ala naung dapotan hasesaan ni Dosa hita marhite na ro sumomba jala marunduk niroha tu adopan ni Jesus na hehe i. Panghirimon naung maloha ala ni hamatean ni Jesus di pauli/dipulihkan Debata marhite haheheon i. Sialani i boi dohonon do ia Paskah ima transformasi pengharapan/panghirimon.

Marhite parningotan ni haheheon ni Kristus hita ditonga ni kondisi ni panosak ni Korona on, dipaingot do nang hita asa unang gabe madabu tu pandelean dohot habot niroha naso marujung. Ai marhite paskah on pos ma rohanta nang Korona dohot sude dampakna marujung do bahenon ni Debata. Molo tung dibagasan habot niroha hita hinorhon ni na agoan na tahaholongi dungi dang boi tapatupa penghormatan terakhir dinasida songon adat di habatahonta. Tung borat situtu do i jala maol. Mansai dokdok do manaruhon nasida tu tanoman i ndang boi tapatupa adat na seharusna sipatupaon. Tung diapuli haheheon ni Kristus ma hita. Nasingkatan ni Debata do habot ni rohanta i dohot las ni roha ditingkina. Molo Jesus pe dang dimiahi bangkena, dang dipatupa penghormatan terakhir tu Ibana songon adat ni Jahudi dihamateanNa i, alai hehe Ibana gabe sude sandok portibion pasangap Ibana. Ima hirim ni rohanta jala na mangalehon gogo dihita, tung hera naso marsangap pe natuatuanta i diparmondingna, alai sai dapot ma tingkina marsangap do muse nasida. Tapauli ma angka panghirimon nasanga maloha nasailaon, asa hisar jala hiras roha, pingkiran, nang pamatangta pe mandalani ngolu on.

Paskah: Marlojong marbarita nauli (Rade Marbagi Dibarita Lasniroha)

Haheheon ni Jesus namanaluhon hamatean rodi sude sumbia na ndada barita sigolomon sambing, alai sibaritahononton tu saluhut portibion. Diturpukta on tung tangkas do semangat kesegeraan i dipatuduhon. Asing ni kesegeraan semangat ni paskah taringot tu marbarita nauli ima haradeon manjangkon panjouon dohot penugasan nasian Debata. Parsuruon i, dipatuduhon diturpuk on dalam dua bentuk ima parsuruon langsung sian Jesus (ay. 10),  dohot parsuruon marhite perantara ima Surusuran (ay.7). Dung dibege nasida parsuruon i, dungi hatop ma nasida laho sian tanoman i...marlojong do nasida mamaritahonsa tu angka siseanna. Las roha nasida manjangkon barita i, Rade manjangkon parsuruon i, jala laso rade laho mangulahonsa dibagasan parsitutuon ndada marnalemba. Paskah dengan demikian meruntuhkan tembok egoisme diri.

Paskah paingothon hita asa rade torus menerus mamaritahon manang mambagihon barita nauli. Boa carana? niingot ma rupani pandohan ni Santo Agustinus Bapa Gereja na mandok beritakan lah injil bila perlu dengan kata-kata. Pandohan on naeng mangonjar hita asa mamaritahaon barita haheheon na pangoluhon i gumodang marhite angka pambahenan. Ringkot do jamita alai rumingkot do pambahenan. Aha ma bentuk ni barita haluaon dohot haheheon diombas on? Ditingki sisaonari on dipanosak ni Korona, barita haheheon na paluahon i paboaonta ma marhite pambahenanta na paluahon dongan sian hamaolon hinorhon ni Korona jala paluahon dongan sian virus i sandiri. Asa unang gabe tertular. Pengorbanan ni angka tenaga medis dohot angka na asing boi taida doi songon barita haheheon na mangurupi dongan manisia malua sian virus Korona on. Tindakan diakoni gereja boi do gabe barita nauli ni haheheon ni Kristus. MANARUHON na adong dihita MANARIHON naringkot di dongan. Paskah adalah momen dimana kita berbagi sukacita dan kehidupan dalam ragam bentuk.

Paskah: Hadameon dohot Lasniroha Palao Biar ni Roha

Huria ni Tuhan na hinaholongan dibagasan Jesus Kristus,

Tontu songgot jala mabiar do roha ni angka parompuan i di tanoman i ai masa do lalo nagogo jala diida nasida surusuruan ni Debata songon hilap dorupana, sasksak di ulosna songon hapur" (ay.2-3). Haru angka soldadu na manjaga tanoman i pe mabiar sampe hira naeng mate (ay.4). Ra sisongon i pe masa do tu hita molo tongon mangadopi hal na sama di tanoman an. Tabayangkon majo rupani ro hita dibuhabuha ijuk tu udean ni sisolhotta hape tompu ro lalo jala adong na marbaju nabontar dijolonta, tung songgot jala mabiar do hita.

Alai biar niroha i dang manongtong ai mago muse ala dung dipademak surusuan i jala pabaoahon barita haheheon i. "unang hamu mabiar...(ay.6).Barita haheheon i pamagohon biar niroha jala mangganti gabe las niroha. Dipapos do roha ni parompuan i naung hehe Jesus marhite na pataridahon inganan hapeahan ni bangke ni Jesus i. Alai menarik do pamanathon uju holan Surusuran i mandok unang mabiar tu nasida, hera naso hantus lao sude biar ni roha nasida ai didok muse mabiar huhut las situtu roha nasida (ay.8). Panghilalaan nasida bercampur aduk dope antara biar dohot las niroha. Alai nungga rade nasida marlojong laho mamaritahon haheheon i. Alai diturpuk ta on. Dipatuduhon Jesus do dirina tu nasida laho pamagohon saluhut biar nasida i. Ai didok ibana do Dame ma di hamu...unang mabiar hamu... Dibutbut Jesus ma sude biar ni roha, habot niroha, kegelisahan, kekuatiran nasida, disingkati dohot hadameon. Asa dinaborhat nasida mamaritahaon barita nauli i, tung hibul ma roha nasida marlasniroha. Merespons i, dipajonok angka parompuan ima, dihaol ma patna, huhut manungkap tu jolona. Tanda ni penyerahan diri dan panombaon na polin diparsaoran na homi. Tanda penyerahan diri dan penyembahan yang murni dalam perjumapaan yang sunyi.

Laos ido na sinosoan dihita saluhutna. Molo tarayahon nueng haheheon ni Kristus na talup paagohon biar ni roha dohot habot ni roha i, antong hita pe marhadameon ma, tapasiding ma biar dohot kepanikan na sumalim sian ngolunta ditonga ni panosak ni Korona on. Alai tapahotma marposniroha, marlasniroha, alai dang sae holan hita namarlasniroha ingkon dohot do angka na humaliangta. Alani i, molo tunga adong na marhabot niroha, tarjou ma hita masiapulan. Molo adong na tongon marsak rade ma hita masiurupan. Hehe ma jala marlasniroha ma. Mago biarta tu portibion dohot nasa isi na alai lam mabiar ma hita maradophon Debata. Molo tung dibagasta be tapatupa kebaktian paskah unang mampangkurangi di las nirohanta. Taingot ma, penyembahan pada Tuhan tidak senantiasa dalam perjumpaan yang semarak tetapi juga dalam keheningan yang sunyi. Seperti perjumpaan perempuan itu dengan Yesus dihari kebangkitan, dalam keheningan dan kesunyian tetapi dengan hati yang bersoraksorak. Amen.