Mangendehon
haluaon nasian Jahowa
5 Musa
31:14-22
Debata do na
umboto namasa dohot nanaeng masa dingolu ni jolma i
Huria ni Tuhan na hinaholongan dibagasan
Jesus Kristus,
Adong do hita naumboto andingan ujung ni
ngolunta? manang na umboto boa parange dohot pangalaho ni jolma on haduan? aha
namasa di ari marsogot? tontu dang adong na umbotosa, mambahen prediksi ra boi
do. Isarana, molo adong na marsahit, olo do dokter mambahen prediksi 4 bulan
manang 3 bulan na i nama kesempatan mu mangolu ninna. Asing ni i, Ise ma hita na boi manontuhon secara pasti parsalpu ni Korona on? ndang adong!
prediksi do na boi dibahen jolma. Ai
tung boa pe pistar ni jolma i tong do terbatas hapistaran i. Alai anggo Debata
tung diboto do saluhutna i.
Diturpuk ta on tung tangkas do i taida.
Dipatorang do di ayat 14-16 nadiboto Debata do andingan jumpang ajal ni jolma
dohot pangalaho ni jolma i di ari nanaeng ro. Dipabao Debata ma tusi Musa
ajalna dohot hajungkaton ni bangso Israel dipudian ni ngolu nisi Musa. Parjolo,
di dok Debata ma tusi Musa naung jonok nama tingki hamateanna tu ibana sandiri:
"dungi ro ma hata ni Jahowa tusi
Musa: ida ma nungga jumpang ne ajalmu, na mate ma ho" (ay. 14) dungi
napaduahalihon uju rap si Musa dohot si Josua, didok Debata tusi Musa: "Ida ma na laho modom ma anggo ho, gabe top
dohot angka ompum" (ay.16). Mansai tangkas ma antong na diboto Debata
do andingan hajujumpang ni ajal ni jolma i, ai saguru di Ibana do nang ngolu ni
natinompaNa. Ido binna sai jojot nidok rupani na Debata do mual jala ujung ni
ngolu ni jolma. Datung adong naboi manontuhon ari hatutubuna dohot mangambati
ari hamateanna molo nungga ditontuhon Debata hian.
Napaduahon, diboto
Debata do nang aha nanaeng masa di ari nanaeng ro. Hamubaon ni parange ni jolma
i ipe tung diboto do. Taringot i didok do di turpuk ta on: "hehe ma anggo bangso on jala marmainan
mangihuthon tu angka debata sileban ditongatonga ni tano sibongotannai, jala
tadinghonon nasida do anggo Ahu, jala oseonna do padan naung hubahen i tu
nasida" (ay.16b). Tangkas ma dipabotohon Debata tusi Musa nang si
Josua hamubaon na masa dingolu ni bangso i dung masuhan nasida tano Kanaan na
pinarade ni Debata tu nasida. Lupa do nasida di Debata jala marsomba tu debata
sileban. Jojot do nang songon pangalaho ni bangsi Israel i nang parange ni
jolma partingkian on. Dung dapotan hangoluan na denggan, isarana jabatan,
hamoraon, dlan pintor lupa tu Debata. Alai narumingkot siingotonta sian turpuk
on ima saluhut do diboto jala ditoru ni huaso ni Debata ngoluta ganup jala saluhut
namasa dohot nanaeng masa pe.
Ondo na boi mangurupi hita mangadopi hamaolon
hinorhon ni Korona on. Ditonga ni hamaolon on, taingot ma ia ngolutta on tung
saguru di Debata do. Ibana do naung manuhati bohal ni ngolutta dihasiangan on.
Molo tung pe rongom panosak ni Korona on pola tung godang halak naung mate,
alai molo so tingkina dope hita maninggalhon hasiangan on asa ndang tung talup Korona
on paintophon hita. Alani i, ingkon marposniroha do hita pasahathon ngolu tu
Debata huhut mangulahon naboi taula asa tung siding hita nang donganta sian Korona
on. Pos ni roha pasahat ngolu tu Debata ndada marlapatan gabe marlompit tangan
dang mangula manangaha, alai rap dohot Debata merawat/padimundimun ngolunta. Laos ima na boi mangonjar hita
masiapulan marhite endeta BE. 289 Pos ma
ho, rohangku Di Debata! Bonom ma narsakmu tu rohana da! unang lomos Tiop ma
gomos, haporseaonmu unang ho bobos! Paluaonna Ho ma antong, sian nasa jea di
tano on. Dipalua Debata ma tutu hita sian jea hinorhon ni Korona on.
Namangihut molo di boto Debata do ujung ni ngolu dohot nanaeng masa sogot,
tontu botoonNA do nang ujung ni Korona dohot nanaeng masa diari nanaeng ro. Ala
ni i, ditonga ni hamaolon on tapasolhot ma tu Debata, ditanganNa do ariarinta
jala ditanganan do nang ujung ni korona on.
Pangaradeon/Antisipasi ni Debata diangka nanaeng
masa.
Huria ni Tuhan na hinaholongan dibagasan
Jesus Kristus,
Sada na tung massai uli sian turpuk ta
sadarion ima haradeon ni Debata mangantisipasi angka nanaeng masa di ari
nanaeng ro. Allah yang mengetahui apa
yang akan terjadi adalah Allah yang tergerak untuk mempersiapkan orang percaya
untuk menghadapi masa depan. Dang dipasombu Debata mardalan boti manang
mardalan sandari bangso i tanpa panuturionNa. Diturpukta on, antisipasi ni
Debata tu dua hal nanaeng masa di ngolu ni bangso i ima: hamatean nisi Musa
dohot parange ni bangso na manimbil i tung tangkas do dipatarida Debata.
Diparade do aha na ringkot andorang so diloas masa angka na masa.
1. Regenerasi
Naparjolo, dipaboa do naeng mate nama si Musa
ala ni i tontu ringkot do adong namanguduti hapartogion di Israel. Ingkon adong
do namanguluhon bangso na jungkat jala mura mubauba i asa tung bolas tolhas tu
tano Kanaan. Ido alana, andorang so mate si Musa nungga diparade Debata
namanggantihon ibana ima si Josua. Didok ma asa jouonna si Josua jala rap
jonjong nasida dibagasan undungundung parluhutan i asa martona Debata tu si
Josua (ay. 14). Nean dang haru tarida aha tona ni Debata tusi Josua di turpuk
ta on, dungpe di ayat 23 tarida tona i ima: ´"ingkon pir ma tondim jala marsihohot, ai ingkon ho do saut manogihon
halak Israel masuk tu tano naung huuarihon tu nasida, jala Ahu do mandongani
ho". Dang tolhas si Musa tu tano Kanaan alai dang diloas Debata
punjung bangso i dang maruluan songon manuk naso marindung. Dipiliit jala
diparade Debata do na gabe sikkat nisi Musa ima si Josua. Tung tangkas do
dipatarida Debata regenerasi kepeminpinan di bangsona. Nungga diparade Debata
hian ganti nisi Musa andorang so monding dope ibana.
2. Rimas jala
uhuman tu bangso na manimbil
Napaduahon, dilumbahon Debata hian aha ma
nanaeng siadopan nisi Josua, ima parmainan ni bangso i namanadingkon Debata.
Ihut tusi dilumbahon Debata hian do aha nanaeng sibahenonNa tu bangso i. Di
ayat 17-18 dipaboa Debata ma na hona uhum do bangso i molo mandao sian Debata.
"Jadi marsigorgor ma rimashu...jala
tadinghononku nasida, jala padaoonku bohinku sian nasida asa suda nasida
marhinamago.... alai anggo ahu tontong padaonku situtu Bohingku di ari sasada i,
ala saluhut hajahaton na binahennai, ala naung marbalik nasida tu debata
sileban". Pola sisongon on ima unduk tu Debata dapot pasupasu, manimbil
sian Debata dapotan tung mansai nalnal do taida di buku 5 Musa. Andorang so
diulahon bangso i hajahatonna i, nungga dilumbahon hian aha ma dampak na tu
ngolu nasida, molo so dirohahon be i salah nasida nama. Molo so taula poda
dohot sosososo tontu molo masa naso tama dohohonta do songon nanidokni halak
batak tinallik bulung sihupi pinarsaong
bulung sihala unang sumolsol dipudi ndada sipaingot nasoada.
3. Ende sitindangi
songon sarana pengajaran
Ragam do lapatan nang pangkorhon ni ende
dingolunta siganup ari. Adong do halak manggurithon ende sian pengalaman,
parnidaan, panghirimon, dlan. Ido binna adong ende parsirangan, ende na lungun,
ende las ni roha, ende taringot tu haulion ni tompaan na niidana, isarana ende
taringot tu hinauli ni tao toba, haulion ni parompuan hasoloan ni rora, adong
ende pujian di pangurupion ni Debata, dlan. Alai di turpuk ta on, fungsi ni ende na ginuthon ni si Musa ima gabe
sitindangi di halak Israel dipambahenan ni Debata nang pambahenan nasida pe. Sitindangi/saksi
marlapatan ma i na patoguhon/meneguhkan hasintongan ni hata ni Debata. Marhite
ende i, dipaingot nasida diholong ni Debata nang hajungkaton nasida. Marhite ende
i, idaon nasida ma pangalaosionna jala tangkas ma antusan nasida na diboto
Debata do saluhut parulaon nasida. Sian i, naeng ma jumpang dinasida dalan
hamubaon ni roha. Markantate sian sudut jamita on boi ma taida laho manindangi
jala marnigot denggan basa ni Debata asa i nean na manait jala mangarahut hita
manongtong mangihuthon Ibana. Asing ni i, laos marlapatan do ende i laho
pangihothon hita mamareso parangenta nasailaon. Huhut ma tarjou paubahon diri.
Ende na niajarhon ni Debata tusi Musa jala
nanaeng ajarhononna tu bangso i, boi taida ma gabe dalan ni Debata mangajari
bangso i asa tung ingot nasida di Debata nang pambahenan nasida i naung
dilumbahon hian. Jotjot do nang on tapangke dingolu siganup ari, marsiajar jala
mangajari marhite ende. Najolo uju dakdanak iba, diajari do martangiang alai
marhite ende isarana metmet au on bahen ia rohangkon sasada ho
Jesus rohangku tongtong. Diparsingkolaan pe rupani model na sama tong do
boi ta jumpangi. Di kalas sada SD taon 1991 diajari guru nami do hami, ima Ibu
br Pakpahan wali kalas nami hatiha i, abjad marhite ende: a a a hutanda leter a
songon pidong do rupana holan patna naso ada, dlan.
Huria ni Tuhan na hinaholongan dibagsan Jesus
Krsitus,
Sian pambahenan jala sikap ni Debata na
antisipatif, mangarade bangso i nang si Musa dohot si Josua andorang so masa
dope nanaeng masa, paingothon hita nang ditingki hamaolon namasa nuaeng asa
rade nang mangulahon ulaon antisipasi dohot pencegahan. Molo nungga dilumbahon
angka na berwenang rupani angka namungkin masa jala dipabotohon tindakan
tindakan antisipatif laho mencegah asa unang hona hita virus korona on, misalna
paske masker, rajin manucci tangan, manjaga haisaon, olah raga teratur, dlan
taulahon ma i dohot denggan dibagasan haunduhon dohot kedisiplinan. Taparade ma
nang angka sisolhotta nang dakdanakta pe laho mandalani ari nanaeng ro. Taajari
nasida di hata ni Debata nang ragam ni parbinotoan asa molo tung jumpang
tingkina ingkon sirang hita hinorhon ni hamatean, nungga tung rade nasida talup
mandalani ngoluna siganup ari. Ala nungga diparade jala dibohali dohot denggan.
Regenerasi kepemimpinan tung mansai ringkot do dingolunta on, baik di huria,
dijabu nang dimasyarakat pe. Alani i, unang pola las rohanta mangolu diharajaon
batu. Suang songon ni taparinggas ma nang marende mamuji Debata paningothon
denggan basaNa huhut mangarimangi hadirionta.
Haunduhon di
tonga ni Hamaolon
Huria ni Tuhan na honaholongan dibagasan
Jesus Kristus,
Sada na mansai menarik sian sudut hajolmaon
di turpuk ta on ima haunduhon nisi Musa mangulahon parsuruon ni Debata. Adong
opat parsuruon ni Debata tusi Musa di turpuk ta on ima: Manjou si Josua asa rap
nasida jongjong di bagasan undung-undung parluhutan i, manurat, mamparsiajari,
dohot mangajarhon Ende tu bangso Israel. Sude parenta i dioloi jala diulahon si
Musa, natape tongon nungga diboto si Musa ari hamateanna nungga jonok. Unggodang
do rohana dompak hata nang parenta ni Debata daripada tu hamateanna dohot
hajungkaton ni bangso i dung hamateana. On ma na boi tatiru dingolu on baik
songon parhobas hita di huria nang dingolu siganup ari, asa unang gumodang
pingkiranta tu hamatean alai tu Debata rap dohot hata nang parentaNa. Asa tung
aha pe nataadopi, termasuk ma natongon hita mangadopi ragam ni hamaolon
hinorhon ni Korona, tongtong boi hita satia mangulahon na sintong na pinodahon
ni Debata. Asing ni i, tongtong boi marende nang mangajarhon ende sitindangii
ni huaso nang denggan basa ni Jahowa dingolunta nang tu angka sisolhot pe. Mansai
ringkot do parendeon natape tung humurang uli suaranta na marende i. Tung uli do panimpuli ni turpuk ta on
paningothon hita di minggu Kantate on, ia Berita kematian dan kefasikan tidak akan
menghentikan umat percaya untuk bernyanyi. Antong manongtong ma hita
marende marningot denggan basa ni Debata huhut mamareso hadirion dohot
parngoluanta. Amen
Tidak ada komentar:
Posting Komentar