Sihol ni Roha di Haluaon

Sihol ni Roha di Haluaon

Jesaya 52:7-12

Huria ni Tuhan na hinaholongan dibagasan Jesus Kristus,

Tontu godang do natahasiholi si hasiangan on, sihol di rokkap, sihol di parkarejoan natama, sihol di pardamean, sihol di hahipason, sihol boi pajumpang dohot keluarga, dlan. Alai dipartingkian sisaonari on, barita aha ma na paling tapaima dingolunta? Maheu jala terbatas sude angka ulaonta namardempak tu na maheu nang pandaraman, parsaoran, dlan. Aha mambahen i? Virus Korona. Ganup ari do hita umbege barita di TV taringot tu Korona on, piga na tamba, piga naung mate, piga na malum, aha na binahen ni pamarenta, dlan. Nga somal be i tabege. Alani tung sihol do rohanta umbege barita, namandok "marlas niroha ma hita ai nungga salpu be Korona"!

Antar songon i ma sihol ni roha ni bangso Israel uju tongon nasida di habuangan Babel. Nungga tung leleng nasida manaon parhatobanan i, alani tung hirim do roha nasida adong barita sibegeon na boi paubahon parniahapan nasida dihatiha i. Barita hatuaon dohot olop-olop na hinirim nasida ima na dipatubegehon panurirang Jesaya songon na dibaritahan di turpukta sadarion.

Huria ni Tuhan na hinaholongan dibagasan Tuhan Jesus Kristus,

Turpukta sadarion ima lumba-lumba haluaon ni bangso Israel na marrumanghon hamumulak nasida sian habuangan Babel. Turpukta sadariaron boi do tabagi tu tolu bagian, jala sian i annon idaonta ma angka aha do naboi taputihi siauhunonta dinglutta siganup ari. Tapaihutihut ma sadasada:

1. Barita nauli haluaon sian Debata (Ay. 7-8). Di tonga ni kondisi ni bangso na dibagasan habuangan i, ro ma barita silasniroha, barita nauli ima paluaonna ma nasida sian habungan i jala mulak muse tu Jerusalem. Nga masa i? dang dope alai lao masa ma! Ido binna didok lehetnai  di atas ni angka dolok angka pat ni parbarita nauli, napatubegehon hadameon, namamaritahon barita nauli, na patubegehon hatuaon, na mandk tu sion Debatam do bangkit Raja!. Barita on di sada sisi tung so masuk akkal dope. Tung mansai dao dope parbarita nauli i, harorona pe dao dope. Alai di bangso ni Debata i, tanda na tung mermet hian pe nungga gabe boni ni panghirimon i dinasida na naeng marujung nama parsorion nasida jala Jerusalem dipuali muse. Ido alana marlas niroha nasida.  Lasniroha nasida ima ala Debata Bangkit Raja (ay. 7); dohot ala mulak Jahowa tu sion (ay.8). Panghorhon na Debata raja nasida ima hadameon, dohot hatuaon, dohot haluaon. Mulak Jahowa tu Sion marlapatan ma i paulion ni Debata ma muse Sion gabe habangsa-Na huhut gabe inganan parminan ni bangso i.s

2. Joujou marlasniroha tu Jerusalem ala haluaon pinatupa ni Debata (ay. 9-10). Diuduti ma muse manjouhon asa pangiaron nasida soarana marolopolop angka pasipasi ni Jerusalem. Pasipasi ni Jerusalem ima angka halak na mangolu dope sahat tu barita haluaon on alai lumobi ma i na sai monongtong manghaporseai Debata natape tongon dihabuangan nasida. Halak na manjaga hapolinon ni haporseaon maradophon Debata. Dijou do nasida marolopolop ala: (1) nungga marpangulahi roha ni Jahowa mida bangsona. Namarlapatan nungga dihalupahon jala disesa Debata pangalaosion nasida; (2) Nungga dipalua (menebus) Jerusalem. Angka namangolu dope di habuangan i dipalua/ditobus Debata sian parhatobanan Babel; (3) Dipatoltol Debata tanganna na badia di adopan ni saluhut bangso. Dipataridahon Debata huaso, hagogoon dohot habadionna di adopan ni angka bangso termasuk bangso Babel dohot bangso Persia na pinangke ni Debata paluahon bangso Israel. Patuduhon na marhuaso do Debata disaluhut bangso. Ido alana disok muse saluhut ujung ni tano on marnida hatuaon ni Debatanta. Huaso ni Debata ndada terbatas holan tu halak Isreal jala holan di Jerusalem/Israel. Alai sahat do nang/melampaui tu saluhut bangso. Hatuaon nanaeng sipatupaon ni Debata na jumonok memang haluaon ni bangso Israel na mulak sian Babel. Ali lobi sian i, haluaon ni saluhut portibi on marhite Tuhan Jesus sipalua.

3. Respons haradeon ni Bangso i di barita haluaon i dibagasan pos ni roha (ay. 11-12).  Manguduti barita haluaon dohot lasniroha i, disososhon ma nasida asa ruar sian huta Babel i, Ruar, ruar, borhat ma...ruar ma hamu sian tongatonga nasida. Saluhut bangso i, namian di habuangan i disosohon asa renta ma laho maninggalhon huta i, holan dilehon izin tunasida. Ai dang i tano na nilehon ni Debata di nasida. Alani, unang be marpaima, ruarma nasida. Alai molo ruar nasida jaga ma asa: (1) unang jama hamu na ramun; (2) manguras ma hamu ale angka na mangusung ulaula ni Jahowa. Disosohon do nasida asa tung manjaga habadiaon ni pamatang dohot parange pe. Molo tung marsaor nasida dohot bangso Babel unang ma laos diboan nasida pangalaho ni bangso Babel i rap dohot nasida. Lumobi ma angka na mangusung ulaula ni Debata ima angka malim asa tung tutu situtu dibagasan habadiaon. Bagabaga ni Debata dihaluaon dijangkon marhite na marhabadiaon.

Dinahaluar i nasida, naeng ma marsigantung nasida dihuaso dohot pangaramotion ni Debata. Molo songon ido maka, ruar ma nasida dibagasan hademahon unang pola humalaput "ai dang pola humalaput hamu laho ruar manang marlojonglojong songon halak na maporus" (12a). Memang disosohon do nasida asa unang marnalemba alai mangharingkothon/bergegas ruar sian Babel ala unang pola humalaput, humarojor tarsongon halak na mabiar, halak na maporus, halak na hona lele songon parmulak nasida sian Misir sanga dilele si Firaun dohot paranganna. Ala ni posma rohana borhat ma dibaagsan hadameon dohot hademahon. Boasa? ala Debata manjamin haluaon nasida i.. Asing ni i, ai Jahowa do manguluhon hamu, jala Debata ni Israel mangiringiring hamu/ Sebab Allah akan berjalan didepanmu dan Allah Israel akan menutup barisanmu. Sada jaminan do on dipangaramotion ni Debata. Ibana mardalan dijolo jala dipudi ni Bangso i.

Huria ni Tuhan na hinaholongan dibagasan Jesus Kristus,

Tontu ndada na dibagasan habuangan manang penjajahan hita on saonari, nungga bangso na merdeka hita pola 75 taon ne nama di bulan Agustus nanaeng ro. Ndang na sihol hita dihaluaon sian parhatobaon ni jolma. Alai songon bangso Israel na siholan dibarita las niroha, barita haluaon, hita pe dipartingkian on tung sihol do rohanta dibarita las niroha. Barita haluaon sian panosak ni virus Korona on. Ai virus Korona on nuaeng na menjajah hita, ala na godang nagabe dang boi taulahon jala taida. Ingkon mian di jabu, dang bebas be patupa pesta las ni roha. Halak naung sihol rohana marhasohotan jala nungga dapot nanaeng gabe sirongkapni tondinta alai ingkon di tunda jo ala ni panosak ni Korona on. Bahkan ulaon habot niroha baik ulaon saur matua manang mangido tangiang dang tung boi be diulahon dohot singkop. Ingkon tarhipuhipu mangulahonsa ala ni gok ni biar.

Ala ni i tung Sihol ma rohanta mambege lam tamba naung malum jala gumodang sian na monding. Sihol nirohanta ima unang adong be na tamba nian na terinfeksi. Sihol ni rohanta nian hatop ma salpu panosak ni Korona on. Alai dipartingkian on ndang haru dapot hita dope i. Sialani i, antar adong dosta rupani dohot bangso Israel dihatiha i ima tongon mangadopi hamaolon jala manghasiholon hasasalpu ni hamaolon i. Siala ni tontu adong do na boi taparsiajari sian turpukta on nanaeng taauhon tu ngolunta manang naeng pahothon rohanta mangadopi namasa on. Dia mai?

1.      Disosohon do tuhita asa mangolu hita dipanghirimon ditonga ni situasi na maol on. Kita diajak oleh Yesaya untuk tetap berpengharapan meski ditengah dunia dan kondisi yang sepertinya tidak punya harapan. Molo tung dang haru jonok dope tahilala halalao ni Virus Korona on, alai ingkon idaonta do nungga mulai muncul harapan marhite nalam godang halak na malum, data terakhir na huida hami tanggal 02 April nungga adong 112 na malum. Memet dope nian panghirimon  i alai nungga mulai adong.

2.      Marhuaso do Debata disaluhut portibion ndang holan disada luat jala marhuaso disaluhut partingkian. Molo boi di Wuhan salpu Korona on ala ni huaso ni Debata nang di bangso na asing, marhuaso do nang Debata palaohon Korona sian tonga ni bangsonta on. Alai andul rumingkot dope, haroro ni Jesus namanaon naporsuk pola mate Ibana jala mulak mangolu, ido na paluahon hita on sian saluhut panosak nang parhatobanon ni Dosa. Ido na manesa saluhut dosanta jala na manglean haluaon ni tondinta. Ido na tahalashon dinamarningot Minggu Palmarum, dohot rangkaian ibadah paskah. Asa unang gabe holan Korona on na mangarajai ateate roha nang pingkiranta. Antong taharinggashon ma marsaor dohot Debata jala taloas ma marharajaon jala mian Jesus i dingolunta.

3.      Marhabadiaon ma unang ramun. Dipartingkian manosak hinorhon ni Korona on, ringkot do hita mamangke tingki laho mangarimangi kejernihan iman hapolinon ni haporseonta nasailaon. Asa unang marlaok jala ramun hinorhon ni angka panghirimonta dohot panguhumanta. Tapapolin ma panjanghononta di Kristus i, dipartingkian nasonang nang na dangol pe. Tapaiaas ma rohanta sian angka na ramun, harimason, pangiburuon, dlan. Taparinggas ma martangiang jala mangulahon angka na denggan. Asing ni i, ringkot do nang dihita manjaga haiason ni pamatang songon nasinosohon ni tenaga medis nang pamarenta pe.

4.      Unang pola humalaput alai taharingkotma. Uluhonon jala iringiringon ni Debata do hita. Molo tung pe manaon na hassit hita alani Korona on, taihuthon ma boa Jesus naung jumolo mangadopi haberniton i. Songon naung dibaritahon marhite jamita Minggu nasalpu, tung tenang, demak, jala barani do Jesus mangadopi haporsuhon i. Alani i, Jesus do dijolonta mangadopi Korona on jala taihuthon ma Ibana unang mabiar ai tu dalan na dumenggan do hita boanonna. Unang humalaput ai tung bernit pe namasa on iringon jala gomgoman ni Debata do hita mandalanisa.  Taihuthon proses ni Debata jala taharingkothon ma. Ibana ma dijolonta laos ibana dipudinta. Pasti do malua bangso on sian  panosak ni Virus Korona, natape ndang haru taboto hasasautna. Marsabam ni roha ma, martangiang ma tongtong, jala ulahonma nasa naboi ulahononmu. Sai adong do tingki na lehet parsaulihononta nadenggan dibalik ni namasa on. Taingot ma ende NKB. No 170 Jalan hidup tak selalu tanpa kabut yang tebal, tapi kasih Tuhan nyata pada waktu yang tepat. Mungkin langit tak terlihat oleh awan yang tebal diatasnyalah membusur plagi kasih yang kekal. Habis hujan tamplak plagi bagai janji yang teguh dibalik duka menanti plangi kasih Tuhan mu.

5.      Tatangianghon ma asa tung dipangke Debata angka tenaga medis dohot angka pandebisuk di bangso on laho mambaritahon barita nauli barita hatuaon di hita namandok Debata do bangkit raja jala nungga salpu be Virus Korona on.  Jala laos tarjou ma hita huhut gabe siboan jala na mambagihon anka barita nauli unang barita na pabiarbiarhon, barita na so sintong manang na hoax. Pat ta on tapastihon ma asa pat na lehet mambaritahaon barita nauli tu na humaliang. Pat ta do mamboan hita tu nauli jala na tu na roa. Alani i, pastihon pat ta mamboan hita tu na uli jala denggan. Unang be talangkahon pat ta mangeahi jala mangulahon naso tama. Amen.