Jamita Minggu Exaudi Matius 20: 29-34

Dibege Debata do Jojou Pangidoan ni Naporsea

(Matius 20:29-34)

Denggan Mamangke Kesempatan

Huria ni Tuhan na hinaholongan dibagasan Kristus Jesus,

Adong do pandohan songon on: ´Kesempatan tidak selalu datang dua kali". Pandohan on marlapatan naingkon pangheon do kesempatan na adong sadenggan ni dengganna. Prinsip sisongon i ma na pinangke ni dua halak na mapitung di Jeriko uju mamolus Jesus sian luat i. Diok do uju mamolus Jesus, hundul do nasida na dua dipinggol ni dalan i (ay.29-30a). Di na mamolus i Jesus, ria do roha nasida jala hirim situtu asa panghilalaon nasida huaso ni Jesus naung dibage nasida baritana. Sialani i, datung diloas nasida lewat buti kesempatan na arga i, dibahen nasida do haputusan laho mamangke partingkian i laho mangido sipangidoanna. Ai dang binoto manang na andingan muse Jesus mamolus sian inganan nasida i. Alani i, bissan mamolus da ingkon pangheon sadenggandenganna? Ido alana joujou nasida mandok Asi ma roham di hami, Anak nisi Daud (ay.30) . Jou jou marlapatan ma i ndada sahali alai marulak-ulak. Dihaporseai nasida do Jesus songon Mesias naung disuriranghon angka panurirang di padan na robi. Taida do i marhite panandaion dohot pandohan nasida tu Jesus songon anak ni si Daud.

On ma nang na boi tatiru jala tahangoluhon ima asa tapangke saluhut angka kesempatan nasonson dijolonta. Unang adong na mamparsuasaehon angka kesemapatan ningolu. Isarana songon nuaeng adong kesempatan dihita rap patupa kebaktian dibagasta ganup, tung denggan ma i tapargunahon mangkorhon hadimposon ni parrumahtanggaon, patang haporseaon, dalan. Suang songon i kesempatan laho marsingkola, mangula siualoan, mangurupi dongan, marsiajar martangiang, paias diri, dlan. Unang dung salpu kesempatan i gabe adong panolsolion, paling so huulahon ma i, paling so... ai halak na mangolu dibagasan panolsolion tung mansai parir do i ai dang adong be naboi tarbahen. Sabalikna sasian sian godang kunci ni gabe halak na sukse ima kemampuan mengelola dan memanfaatkan kesempatan.

Togu jala dang mura sumurut

Huria ni Tuhan na hinaholongan dibagasan Jesus Kristus,

Dang sude kesempatan na adong i pintor bolas boi tulus ndang adong na mangambati manang tantangan siadopan. Songon i do nang pengalaman ni namapitung i adong do tantangan naniadopan  nasida uju mamolus Jesus. Tantangan na parjolo tontu ro sian diri nasida sandiri. Ala dang marnida nasida, tontu dang boi diboto nasida didia do posisi ni Jesus hatihai. Holan sada do diboto nasida mamolus Jesus. Jonok manang dao sian hundulan nasida ndada diboto. Alai ndang sumurut nasida sai joujou do. Asing ni i, didok do diturpuk ta on, ia nasida hundul di pinggol/pinggir ni dalan i. Boi do ra lao satongkin jo pingkiranta tu namasa taon nasalpu uju ro Presiden Jokowi tu Doloksanggul. Mansai ribur jolma pola sahat tu tongan dalan. Boa ma molo adong na mapitung hundul dipinggir dalan mangido asa marsijalangan dohot Jokowi? aha ma abatabatna? hira songon i ma namasa uju mamolus Jesus. Torop jolma mangihuthon Ibana di dalan i, tontu maol do tarbege soara nasida jala olo do dang boi diida Jesus nasida, ala diondingi angka na torop i. Alai sahali nai, dang sumurut nasida. Aha usaha naboi bahenon nasida tung holan jujou pe diualahon nasida do.

Namangihut muse adong do nang abatabat sian luar diri nasida ima angka natorop i. Didok do diturpuk on: ”Alai dipinsang angka natorop i ma nasida asa sip nian" (ay. 31). Diroha ni natorop i nungga gabe manggangu hademahon suara ni na mapitung i. Hape songon nasomal diulahon Jesus laos sai mangajari do Ibana didalan i. Huroa gabe tertanggu do parbinegean ni natorop i alani suara ni namapitung i. Ra, dipingkiran nasida muse ia pangidoan ni namapitung i songon nasomal ima manjalo hepeng sian na lewat. Dipissang nasida asa sip. Alai dang sip jala so nasida didok do: " Alai lam gogo ma nasida manjoujou Asi ma roham di hami, Tuhan, Anak nisi Daud". Lam diorai lam dipagogo jala lam tanda do panindangion nasida di Jesus. Naparjolo holan anak nisi Daud do Jesus di gora nasida. Alai nuaeng nungga didok Tuhan, anak nisi Daud. Tamba hamaolon lam tamba do nang panandaion nang panindangion nasida, huhut lamgogo suarana. Dang mansohot ala ni abatabat dohot tantangan alai lam marsihohot.

On ma muse naboi tatiru asa unang mura-mura hita mandele molo tung jumpang angka hamaolon. Alai sabalikna lam marsihohot ma, lam tamba panandaion, jala lam tamba nang hagogoon. Lumobi ma nang diragam ni hamaolon namasa hinorhon ni Korona on, olo do nang mangulahon na denggan pe hita,isarana sian huria, belum tentu i denggan didia donganta. Alai unang ma i mambahen hita gabe so mangulahon na denggan dohot mangulahon aha nagabe tugas dohot tanggungjawabta. Olo diparsingkolaan adong abatbat baik diparhepengon, hahipason, fasilitas dlan, alai  unang tung i mambahen gabe malas belajar. Sabalikna natape tamba loja ingkon do lam togu jala ringggas marsiajar. Adong do pandohan mandok orang sukses selalu datang dari tantangan yang besar. Di masa ni Korona on, taulahon ma nasa naboi taulahon natape dang boi manontuhon ujung ni usaha dohot pambahenanta i. Molo tung pe holan na manjaga diri naboi tapatupa dang boi mangurupi dongan bahkan molo tung pe holan namartangiang nama na boi tapatupa, taulahon ma i dohot denggan dibagasan parsihohoton.

Pangkorhon ni Parsihohoton

Parsihohoton dohot parsitutuon ni namapitung i marpangidoan tu Jesus nata pe ragam do angka abatabat on mamparkorhon do i dingolu nasida. Diturpuk didok ma :”Jadi mangulon ma Jesus, dipanghulingi ma nasida: Aha dipangido rohamuna bahenonku tu hamu?" (ay.32). Sian ayat on, adong naboi tabuat angka parsiajaran ima: (1) Parsitutuon dohot parsihohotn ni namapitung i, mambahen Jesus mangulon sian pardalanan nang pangajarion. Luar biasa, ditonga ni natorop i jala diotnga ni godang ni ulaon ni Jesus, boi dipaso nasida Jesus laho manghatai dohot nasida. Bayangkon majo boi dipaso namapitung si Jokowi dipardalanana uju  ro tu Doloksanggul, hape torop jolma na mangondingisa. Ndada na luar biasa i?; (2) Haungkapon ni roha dohot kepedulian ni Jesus. Tangkas na dipatudu na tung massai diparateatehon Jesus do saluhut angka na ni bolus na. Termasuk ma angka jolma na dipinggirkan, disingkirkan, dohot angka na gale songon na mapitung i. Ihut tusi tung diargahon Jesus do nang usaha, parsitutuon dohot parsihohoton ni namapitung i. Sabotulna, molo so olo repot Jesus jala molo so diargahon angka nagale jala joujou i, boi sajo do Ibana mamolus buti. Da tung adong na mamparsalahon Ibana natape dang dipardulihon nasida. Haru natorop i nungga dipissang nasida. Sabalaikna, boi do nang natorop i suruon ni Jesus laho mangurus namapitung i, ai tung mansai godang ulaon nanaeng siulaonNa. Alai, dipatuduhon Jesus holong dohot solidaritasnya tu namapitung i jala ndang pola diparsalahon natorop i. Diargahon Jesus do parsihohoton i alai ndada pola patutoru natorop i; (3) Disungkun Jesus aha sibaheneon ni Jesus tu namapitung i. Diparade Jesus do tingkina mambege nasida huhut laho manungkun nasida aha do na tung diharingkothon nasida dihatiha i. Ndada naso diboto Jesus, alai naeng mangarahon nasida do mangantusi keadaan huhut taronjar mangidohon naringkot dingoluna secara langsung. Ringkot antusan nasida aha na hinaporluhon nasida jala nalobi penting ima haporseaon nasida na talup do Jesus pasauthon jala mangalehon kebutuhan nasida i.

Sian on marsiajar do hita naso tupa marisuang hapadoton, parsitutuon, dohot parsihohoton mangulahon nadenggan dohot mangido sipangidoan tu Debata. Ditangihon Debata do joujou ni naporsea marparniahapan. Marsiajar do nang hita sian kepedulian, solidaritas ni Jesus tu angka na humaliangta. Asa tongon dihamaolon ala ni Korona on rade nang hata mangalean perhatian tu angka donganta. Taulahon ma angka na denggan alai unang pola manihai halak naso talup dope olo mangulahon na denggan. Asa unang gabe dalanta pambahenannta na denggan i laho manihasi dohot manguhumi halak na asing. Sotung marisuang haburjuon mi. Rade ma nang hita mangargahon donganta na ro usouso unang pagodang hu marsidalian molo memang sanggup do hita laho mangurupi. Rade ma nang hita mambege holso ni donganta, rade manangianghonsa molo tung dang adong naboi tapatupa laho mangurupi ibana diholso na i. Asing ni i, taantusi ma hibul nang situasi dohot kondisinta marsada sada asa tung hantus nang taboto mangido sipangidoanta.

Mangantusi huhut mambutbut urat ni Parsoalan.

Mangalusi sungkunsungkun ni Jesus i didok angka na mapitung i ma: "Naeng mungkap mata nami, Tuhan!(ay.33) Tangkas do diboto nasida aha do na gabe urat ni parsoalan ni ngoluna. Gabe sipangidoido nasida dipinggol ni dalan, bergantung tu asi niroha ni jolma na lewat ngoluna ala dang boi nasida mangulasiulaon songon halak na marnida. Dang dipangido nasida tu Jesus hepeng manang sipanganon songon nasomal dipangido jala dijalo nasida sian angka jolma namarasi roha tu nasida. Alai ala tangkas do diboto jala dihaporseai nasida ndada holan jolma sambing Jesus, alai Mesias jala Tuhan, dipangido nasida asa mungkap mata nasida. Dibutbut Jesus ma nian urat ni parsoalan nasida. Molo dibutbut Jesus i, tontu dang be gabe sipangidoido alai boi ma mandiri mangulahon siulaona.

Ringkot ma taparrohahon on dingolu siganup ari, asa manat hita marnida urat ni parsoalan asa laos taboto mambutbut huhut mangidohon tu Debata molo memang dang talup holan gogonta mambutbutsa. Asa unang nean sai loja hita holan na mangarantingi parsoalan ni ngolu alai boi pintor hibul malua sian parsoalan i ala nungga dibutbut uratna. Ringkot ma hita on berpikir seutuhnya molo tung mangadopi angkap persoalan.

Dioloi Jesus namapitung i jala laos di ihuthon Ibana

Umbege alus ni namapitung i, gabe asi ma roha ni Jesus, di jama ma mata nasida jadi pintor marnida ma (ay.34a). Pangidoan na tung balga do nian pangidoan ni namapitung i, alai ala ni asi ni roha ni Jesus, dipamalum do nasida secara langsung. Dung dijama Jesus mata nasida mungkap ma jala gabe marnida. Dison memang hamalumon i tung satangkarisap do dibahen Jesus. Alai unang salah hita, songon naung pigapiga hali pinatorang di renungan malam, olo do proses hamalumon di bahen Jesus secara bertahap ndada instan. Asa unang rupani gabe pintor mandele hita jala tatihai Jesus molo adong parsahitonta naso pintor malum hape nungga sai tatangianghon. Marhite pambahenan ni Jesus on, dipatudu ma nang tuhita ndang adong hape pangidoan na pabalga hu tu Jesus. Sude to talup tarpatupasa homabr tu huaso nang asi ni rohaNa. Jala dibege huhut dialusi Debata do suara pangidoan ni naporsea. Loas hombar ma antong turpuk on tu goar ni minggutta ima Minggu Exaudi namarlapatan saitangihon ma soarangku ale Jahowa.

Manghamauliatehon pambahenan ni Jesus na mangungkap mata ni namapitung di didok di turpuk on jadi di ihuthon nasida ma Ibana (ay.34b). Tung tangkas ma ditanda naida dirina jala laos diboto do manghamauliatehon pambahenan ni Debata. Ndada gabe lari marlojong naisda tumopot natorasna manang sisolhotna dungi manghalupahon Jesus. Sabalikna dihuthon do Jesus. Dilehon Jesus parnidaan tu namapitung i, dungi dilehon nasida ma haunduhonna tu Jesus. Dang tung adong memang na boi bahenon nasida mambayar pambahenan ni Jesus na pamalun nasida alai sai boi do antong nasida manghamauliatehonsa.

Ondo nang parsiajaran na arga dihita asa unang olo hita manghalupahon Jesus dohot pambahenanNA dingoluta molo nungga tung dapot hita natapangido baik di pardagingon nang partondion pe. Memang torop do halak sisongon i, alai anggo halak na porsea tarjou do ingkon marroha mauliate. Memang dang tarbayar hita pambahenan ni Jesus dingolunta alai manogntong ma hita mandok maulite huhut mamuji pasangap goarNa.  Amen.