Jamita Partanginagan 12 Mei 2021 1 Samuel 1: 9-18

 

Hanna Parompuan Sipartangiang

1 Samuel 1:9-18

Huria ni Tuhan na hinaholongan dibagasan Jesus Kristus,

Dihasiangan on, hira ndang apala adong imbar ni na porsea dohot naso porsea, saluhut na do ingkon mangadopi hamaolon. Ai molo adong halak na jahat na hona korona, kanker, dohot ragam diparsahiton na asing, naporsea i pe hona do. Molo adong halak na jahat mate ala ni kecelakaan pesawat misalnya, na porsea i pe adong do na songon i. Adong halak nahol, naporsea i pe tong do adong na hol, dlan. Aha do na mambedahonsa? ima cara ni naporsea i mangadopi mangadopi haporsuhon i. Hinorhon ni haporseaon gumogo, lobi tenang, sabar jala marhamonangan do naporsea i maradophon persoalanna. Ido nananeg taida jala tatiru sian si Hanna diturpuk jamita borngin on na tarsurat di 1 Samuel 1: 9-18 naung tajaha nangkin.

Diginjang ni turpuk on di ayat 1-8 tangkas do dipatorang hadiron dohot parsoalan na niaopan nisi Hanna. Mansai dokdok do jala marlompitlompit holso ni rohana. Sada sian dua pardijabu nisi Ekana do ibana. Si Hanna ma na parjoo jala imbangna ma si Penina. Hol do anggo si Hanna jala dang marianakhon. Alai si Penina tubuan anak do nang boru. Hinorhon ni i, sai dihansiti si Penina do si Hanna ganup nakkok nasida tu bagas joro na di silo. Ida hansit na dia si Hanna, borhat tu Silo tu bagas joro laho mamuji Debata alai sai dapotan hansit ni roha ibana disi. Si Elkana pe hurang mangantusi perasaan nisi Hanna. Ido alana gondok rohana sai tumatangis, mangan pe dang lakku. Boa do ibana mangadopi i? marbada do ibana dompak si Penina? Marsoal do ibana dohot si Elkana? mandele do ibana dungi mnaikkot? curhat do ibana tu tentanggana? manang songon jolma saonari on curhat di Medsos? Halak naporsea jala sipartangiang do si Hana, sialani i tu Debata do diusehon ibana holso ni rohana dohot hirim ni rohana asa tung tubuan anak ibana. Sian si Hana on taida ma manang na piga hadirion ni sipartangiang ima:

Sipartangiang: mangusehon saluhut holso ni rohana tu Debata

Songon halak na porsea jala sipartangiang, haporseaon nisi Hanna manguluhon ibana mangadopi gondok ni rohana. Ndada hamuruhon na mangohi rohana alai pos niroha maradophon Debata. Dang adong parsoalan nisi Hana tusi Penina, alai sabalikna do. Si Peninia do nasai patubuhon parsoalan marhite na manghansiti rohana. Dang unduk ibana tu hamuruhon/emosi alai dipatunduk do dirina di adopan ni Debata na dihaposi ibana talup pasaehon holso dohot haberniton  na niae na. Dinahansit parniahapanna disada dingki dung mangan nasida di Silo rap dohot si Elkana nang Penina rodi sude pinompar nisi Elkana, laho ma ibana martanginag tu bagas joro. Diarsak ni rohana na i gabe martangiang ma si Hanna tu Jahowa huhut tumatangis situtu (10). Diusehon ma nasa holso nirohana huhut ma marbagabage ibana tu Debata. Molo tung asi rohan ni Debata marnida parniahapanna naeng ma nian dilehon tu ibana sada anak jala ingkon pasahatonna do i muse tu Debata jala naso tupa hona raut parnabung uluna (11). Dang mansohot pangkirimonna laho tubuan anak natape hol ibana.

Ditangiang on, tung tangkas do na marsitutu ibana pasahat pangidoan tu Debata. Ihut tusi ndada holan sangkapna na dipatujolo ibana alai dipasiat do nang sangkap ni Debata ditangiang na i marhite bagabagana, Dang dipangido ibana tolu anak, sae do sada. Jala pasahatonna do i muse tu Debata. Marlapatan dang boi rap ibana torus dohot anakna i. Disada tingki dung mulai magodang ingkon taruhononna do i muse tu bagas joro i asa gabe naposo ni Debata. Dang holan dirina na rumingkot alai dohot do na ringkot di Debata. Asing ni i tung soadong do ditangiang na i dipangidohon ibana asa tung dibaloshon Debata hansit nirohana tusi Penina. Menurut si Hanna, molo nungga adong anak na, sae do parsoalan dohot si Penina ai dang sai udutanna be mangihiti rohana. Alani i dang ringkot balas dendam patamba soal do i. Kemarahan, kekesalan dan dendam pada Penina tidak akan mengubah keadaan Hana. Oleh karena itu, Hana sadar kemarahan, kekesalan dan dendam tidak akan mengubah masaalnya. Tung tutu ma  parompuan na tigor ibana jala sipartangiang na tutu.

Boa do hita tahe? molo adong holso nirohanta, dang dapot natahirim, adong na manghansiti hita, adong naso mangantusi panghilalaanta, adong lungun ni rohanta, tuise do hita mangalualu? turpuk mangajarhon hita asa tausehon ma i tu Debata ditangiangta unang tu na asing isarana di Medsos. Jala unang ma tabahen tangiangta dalan laho mamalos hajahaton.

Sipartangingan: Tenang uju disalah mengerti

Huria ni Tuhan na hinaholongan dibagasan Jesus Kristus,

Ndada satongkin si Hanna na martangiang dibagas joro i, Alai tung mansai leleng do. Didok di turpuk on jadi dung leleng ibana martangiang di jolo ni Debata, sai dipamanatmanat si Elia ma pamanganna (ay.12). Hata leleng dibahasa Indonesia didok terus menerus, di hata Heber didok Rabah marlapatan tangiang na marulakulak jala marsitorus. Pandohan on patuduhon parsihohotn nisi Hanna dipangidoanna tu Debata. Dang sahali mangido alai dijugulhon marsitorus, leleng, marualkulak. Marnida i, dipamanat si Eli ma pamanganna. Nungga songonna palelelnghu inanta on na sai mangubitubit i ninna roha nisi Elia. Na marhua do nuaeng pola songon i leleng na di bajas joro i. Dung sai dipamanat ibana, dang adong nanggo sangkababa tarbege soara nisi Hanna alai anggo bibirna sai ubitubit. Dang diboto si Eli namartangiang do si Hanna dibagasan rohana (13). Dirimpu si Eli ma si Hanna i na mabuk jala salah masuk tu bagas joro. Ai dang inganan ni na mabuk bagas joro alani i, dipinsang si Eli ma ibana si Hanna didok ma: sadia leleng on ma ho mabuk?utahon ma anggur niinummi sian ho (ay.14).

Boa do molo songon i masa tu hita? sian ias niroha martangiang dibagas joro ala ni gondok ni roha alai ro parhalado mandok hita mabuk? hansit do ra roha ate, tamba nang parsoalan, ai olo ma gabe muruk, mamburai, jala marbada, dlan. Salah do pangantusion nisi Eli marnida si Hanna. Alai muruk do si Hanna? tersinggung do ibana? alusna: Daong!. Tung tenang jala sabar do ibana natape nungga disalah mengerti. Tangkas do dipatorang ibana aha na binahenna di bagas joro i. Denggan do diklarifikasi ibana rupani. Sabar jala tenang do ibana pasintong pangantusion nisi Eli. Sitongka do ibana mabuk jala dang boru parjahat ibana, alai na sian ponjot ni roha nang arsakna na godang i do ibana binna sai manghatai patolhashon nadiroha na i tu Debata (15-16). Dingolu siganup ari pe songon i do ateh, halak na sintong pasti do bersedia memberi klarifikasi molo adong barita nahurang sintong taringot tu dirina. Sabalikna molo halak na so sintong i sai loja do laho membenarkan diri alai bangkol mengklarifikasi langsung. Antong molo halak na sintong do hita rade ma hita maniru si Hanna on. Kemarahan dan dendam tidak akan menyelesaikan kepedihan hati hanya doa, ketenangan, kesabaran dan kemauan memberi klarifikasi yang akan menolong kita menghadapi kepedihan karena disakiti dan disalah mengerti.

Marparbue do sikap nisi Hanna i ai gabe sintong ma pangantusion nisi Eli, dirajumi ma hasalaanna jala dipahot si Eli ma roha nisi Hanna marhite alus na na tung mansai lambok ima laho maho muli mardame dame! sai lehonon ni Debata ni Israel tu ho na pinangidom sian Ibana. Umbege i hera naumbege suara ni Debata si Hanna dang hapalang lasnirohana dungi didokma sai dapotan asi ni roha ma naposomi di jolom! (18).

Sipartangiang: Dang mangalului panombosan/pelarian diluar ni Debata

Nungga tung borat nian dihilala si Hanna hinorhon ni na hol ibana dang marianakhon, hape ingkon hona insak muse sian imbangna si Penina. Dang tarbayanghon rupani mian nasida sajabu dohot sinondukna rap dohot imbang na si Penina nang anka dohot boruna i. Sadia posang ma panghilalaan i. Somal do jolma nang mulai sian narobi sahat tu bagasan ombas on, molo adong hasusaan ni rohana, olo gabe mangalului pelarian dungi gabe mangulahon naso gabeak isarana minum anggur dungi mabuk. Adong do muse na gabe marisap, marnarkoba, lao tu cafe, dlan songon dalan laho paago holso manang gabe dalan panombosanna.

Alai anggo si Hanna, parompuan na porsea jala sipartangiang i ndang dung olo ibana mangalului panombosan dohot jalan keluar andul ni Debata. Sitongka do diibana i. Didok ibana do diturpuk on: Sitongka do i ale tuanku! parompuan na gondok roha do ahu tahe, ndang dung huinum anggur, manang siinumon na koras, rohangki do na huusehon dijolo ni Jahowa (15). Pangalualauanna holan Jahowa do. Dang mangalului pelarian ibana ala memang dang na boi lari sian masalah i ibana. Ingkon adopanna do i alai dang talup sahalakna ingkon rap dohot Debata do ibana mandalanisa.

Parange sisongon i ma nean nannaeng tatiru songon halak na porsea hita. Di rangam ni angka hamaolon, holso ni rohanta, unang ma gabe talului panombosan nang ulaon na gabe dalan pelarian  dihita. Ai dang dung boi saluhutna i pasaehon parsoalan nang holsonta. Holan satongkin do i dungi mulak muse tu parsoalan i. Ingot ma hita ndang boi hita lari sian parsoalan dingolu on alai ingkon siadopan jala sitaluhononton do i. Unang ma nian rohanta naeng mangalului pelarian sian masalah justru gabe manambai masalah. Ingot ma hita dipandohan hidup ini adalah sebuah perjalanan oleh karena itu harus dijalani, bukan pelarian sehingga kita harus lari.

Sipartangiang: Taripar sian gondok ni roha tu las ni roha.

Huria ni Tuhan na hinaholongan dibagasan Jesus Kristus,

Aha do hagooon ni tangiang jala dampakna tungolu ni namartangiang i? godang do halak namandok ndang adong lapatan ni tangiang, apalagi ma molo nungga tung maol sitaonon jala leleng diadopi, jotjot do tubu turoha ni jolma mandok ndang adong be gunana martangiang ai dang adong pangkorhonna. Marhite turpuk on, taida ma tung tangkas do marpangkorhon tangiang nisi Hanna dingoluna natape ndang haru dialusi Debata dope pangidoanna. Molo tapamanat kondisi nisi Hanna andorang so martanginag dohot dung martanginag tung tandi do parasinganna. Tangkas do tarida hamubaonna. Andorang so martangiang, diayat 8 tabege do pandohan nisi Elkana taringot si Hanna songon on ale Hanna, boasa tung tumatangis ho? jala boasa soolo ho mangan?  jala boasa sai gondok roham..." Alai dung simpul ibana martangiang didok ma di ayat 18b dungi ditulus parompuan i ma dalanna, jala mangan, bohina pe dang be surbot idaon.

Mulak ma ibana tu hutana, tu amantana si Elkana, tuulaonna siapari rap dohot si Penina, alai dang be tumatangis nungga minar bohina, nungga lakku be mangan. Marhagogoon ma ibana mangadopi hamaolon i, na hol ibana nang nasai dihansiti si Penina pe dang be sai marsak rohana, alai las ma rohana manghirim dialus ni tangiangna. Tangiang margogoihon ibana mangadopi hamoaolon, tangiangna tu Debata mangurupi ibana manaluhon gondok ni roha. Tangiang mangurupi ibana palakku sipangangaonna. Tangiang margogihon ibana manjalo kenyataan jala marpanghirimon. Jala molo tajaha sahat tu ayat 28, dialusi Debata do pangidoan na i. Sorang do si Samuel jala diulahon ibana ma bagabagana dipasahat ma si Samuel gabe naposo ni Debata.

Antong, huria ni Tuhan na hinaholongan ingot ma ma hita parsoalan, hamaolon, gondok ni rohanta sai na masa do dipardalanan ni ngolu ni saluhut jolma. Alai taadaopi ma  i marhite haporseaonta jala gabe halak sipartangiang ma hita songon si Hanna. Tausehon ma holso ni rohanta tu Debata jala tahaposi Ibana, jala idama sai na patureonNa do i. Ingot ma manangianghon dirim andorang so ditangianghon halak ho. Marhite barita nisi Hanna on, tahaporseai jala tahaposi ma Debata di tanginganta, dipanghirimonta, dihatanta, disangkapta, dibagasta nang dimasadepanta pe. Margogo jala marhamonangan ma angka sipartangiang i natape martangiang dibagasan rohana. Ai diida Debata do sahat tu rohanta. Amen.