Marhaposan tu Jahowa ma Hita ai Diargahon do Ngolunta
(Psalm 22: 23-27)
Huria ni Tuhan na hinaholongan dibagasan Jesus Kristus,
Tung mansai jotjot do haporsuhon dinasa ragam na gabe bagian ni pergumulan jala parporangan ni haporseaon tu Debata. Haporsuhon i mamabahen marsitaitan roha na marsihohot tu Debata manang maninggalhon Debata. Lumobi ma molo ronsot marudutudut ro hamaolon i isarana marhite parsahiton, parsirangan ni pamantang, parange ni angka ianakhon, kecelakaan, dlan olo do gabe muncul pandohan boasa ditinggalhon Debata hami? jala laos olo do gabe madabu hita tu pandelean dungi manundalhon Debata.
Panghilaaan na hira naung ditinggalhon Debata masa do nang di ngolu ni raja Daud na manggurithon Psalmen 22 on. Di ragam ni hamaolon naro tungoluna marudutudut ima: dipalealea halak pola hera gea naso marggelok dihilala ngoluna, terancam ngoluna hinorhon ni angka musuna, hansitan pamatangna gabe hira na tangging sude holiholina, jala songon pantis na malala ateatena dibagasan, dlan (ay. 7-19) tubu do sukkun-sukkun na namandok Ale Debatangku Deabtangku! Baasa tung tadinghononmu ahu? (ay.2). Diragam ni hamaolon na marganti soring i, bergumul do si Daud dihaporseaonna, alai dang gabe talu ibana. Dang madabu tu pandelean dungi gabe ditinggalhon Debata laho manomba debata sileban. Di ihuthon ibana do tiruan ni ompuna si Abraham namarsihohot tu Debata dohot padanNa natape ragam angka hamaolon na niadopanna (Pat. Jamita nadiari minggu i). Pos do rohana dang dung ditinggalhon Debata sasada ibana manuhuk angka na masa. Ditonga ni haporsuhon i, dihaposi ibana do naso ditinggalhon Debata ibana. Ido Alana, talup ibana marpangidon tu Debata mandok "sai palua ma hasongku sian podang, sian sisilon ni biang hosangku na tarpunjung. Sai palua ma ahu sian baba ni babiat, jala alusi ahu maradophon tanduk ni angka horbo jalang" (21-22).
Padan Dipangurupion ni Debata: Mamaritahon hagogoon dohot goar ni Jahowa
Huria ni Tuhan na hinaholongan dibagasan Jesus,
Ditonga ni angka pangidoanta tu Debata, olo do soluk nang padan nanaeng taulahon molo dioloi Debata pangidoanta. Huingot do pangalaman ni ngolu ni salak dongan pandita na rap mandohoti ujian masuk vikar hami taon 2008 naung salpu. Ala huida pardompahan ni ibana tung masai jongir hera pareman, hubaranihon ma manukkun boasa gabe tubu rohana gabe pandita? ala tung mansai ganjang do, hupajempek majo cerita na i nuaeng. Didok ibana, memang andorang so masuk sikkola pandita, ibana ma anak ni Among na na tumangkang jala pareman di terminal sambu Medan. Alai disada borngin, targogot ibana ala dilelei polisi ditonga ni doras ni udan. Dinatargogot i ibana, marpangidoan ma ibana tu Debata tung palua ma ahu Tuhan sian tangan ni mangalelei au on." Molo malau ahu borngin on, marhamubaon ni roha ma ahu jala gabe dongan mu saulaon ma ahu". Dibege Debata do pangidoan na i, malua ma ibana borngin i, dungi muba ma rohana. Ditaon na mangihut, mandaftar jala masuk ma tu STT Abdi Sabda Medan, saonari nungga pandita Resort nasida di Humbang on.
Pengalaman sisongon i do nang namasa di ngolu nisi Daud di turpuk ta on. Dipangido ibana asa dipaula Debata hosana di ayat 21-22, mangihut ma muse padanna tu Debata molo dialusi tangiangna "Sai jamitahononku ma goarmu tu angka hahanggikku, jala pujionku ma Ho di tonga tonga ni huria na marluhut" (23). Dibege Debata do tutu pangidoanna i, malua do si Daud sian angka hamaolon i.
Mangulahon padan pangidoan
Huria ni Tuhan na hinaholongan dibagasan Jesus kristus,
Pengalaman nisi Daud dohot dongan pandita i, boi jadi do masa dingolunta siapari. Dihagogonta hinorhon ni parsahiton, parkarejoan, sompit ni ekonomi, parsikkolaan, olo do hita marpangidoan tu Debata jala huhut marpadan hita na ulahononta sesuatu molo dioloi Debata pangidoan i. Isarana, pamonang ahu Tuhan maralohon parsahiton on. Molo malum ahu, ringas nama ahu marminggu. Manang, pasupasu Tuhan usaha nami on, molo sukses ringgas nama ahu pasahat bakti bulanan jala mangurupi angka dongan na dangol, dlan. Alai ringkot ma tutu asa satia hita mangulahon padan i, unang talupahon molo nunga dioloi Debata pangidoanta. Unang ma songon carita naung hea ra tabege songon on: Disada tingki adong ma sada ama manjangkit kalapa, dung sahat ibana diginjang jala dung didabu manang na piga kalapa i, roma alogo na gogo pola sampe naeng madabu ibana. Dihagogotan i, martangiang ma ibana tu Debata, palua ma ahu Tuhan. Molo malua ahu tolu anak ni pinahan nami i, hupelehon pe tuho marhite huriam. Dungi turun ibana nanget, alai dung sahat satonga dalan, marpingkir ma ibana dihinaarga ni pinahan nuaeng, dungi didok ma muse dua ma tahe anak ni pinahan i hulehon da Tuhan. Ihut ni i, turun ibana muse jala nungga tolu paropat dalan didok ibana muse diroha na nga jonok be hutawar ma muse bah ninna sada ma anak ni pinahan i hulehon da Tuhan. Turun ibana muse natape sai rodope alogo i, tinggal sada satonga meter nai nama asa sahat tu tano didok ibana ma muse holan hamauliateon ma hulehon ari Minggu da Tuhan, dang jadi be pinahan i. Dungi manimbung ibana hape laos tarbaliksu. Si ose padan na tarjea!
Hasatiaon mangulahon padan tu Debata ima na pinatudu ni raja Daud di ayat na mangihut di turpuk borngin on. Dang marhaganguaon ibana laho manghatindakkon naingkon gagaronna bagabaganai didok ma: gararonku ma angka bagabagangku di jolo ni angka na mangkabiari Ibana (26b). Ido alana diontang ibana torop halak laho mamuji, pasangap jala manghormat Debata. Puji ma Jahowa, hamu ale angka na mangkabiari Ibana, sude pinompar ni si Jakkob pasangaphon Ibana, jala sude pinompar ni Israel mangkormat Ibana(ay. 24). Sahali mangontang ibana laho mangulahon tolu hal dalan asa tutu situtu hibul dipasahat natorop i dirina tu Debata. Ai boi do halak mamuji Debata holan marhite hata, alai pasagap Debata naingkon do nang saurdot tarida dipanghation nang pambahenan pe. Suang songon i do nang ma mangkormat/gentar/manghabiari Jahowa sian hibul ni ngolu do i ndada boi holan di hata. Alani i, selain manjamitahon goar ni Jahowa, diarahaon Ibana do asa torop halak pasahat diri hibul tu Debata songon ibana. Asa ngolu ni parpesalmen ma nagabe tiruan nang jamita di natorop i, ndada holan hatana.
Dasor/Alasan Mamuji Debata.
Huria ni Tuhan na hinaholongan dibagasan Jesus Kristus,
Tontu molo manjamitahon huaso dohot goar ni Jahowa hita manang na tuise pe, ringkot do nang paboaon boasa ma ingkon pujion Debata. Asa memang saluhut parngoluan on ringkot do adong dasorna. Ido alana, uju diontang si Daud na totop i mamuji dohot pasangap Debata, di ayat 25 di papatar ibana do tolu alasan manang dasor laho mamuji Debata. ima:
(1) Ai ndang lea rohana (hina) manang marbiasbias(jijik) mida pardangolan ni na dangol. Pandohan on martudutudu tu sikap ni Debata na marempati dipardangolan ni na dangol/ penderitaan orang tertnidas. Empati ni Debata i do mambahen talup Ibana manghilala pardangolan i huhut rade mangurupi na dangol i. Mansai arga do di Jahowa ngolu ni angka jolma na tinompa na i termasuk angka na dangol. Alani i, dang dipasiding jala dang marbiasbias rohaNa mida angka na dipardangolan.
Holan dihata sambing do i? Daong, ai molo didok si Daud pe songon i naung jumolo do ibana manghilalahon. Asa pandohan i marmula do i sian na nialaman ni si Daud dihaporsuhonna, di palea jala sodiargahon jolma ibana pola songon gea diida jala sai diparengkeli (7-8), Alai anggo Jahowa di argahon do ibana dipardangolanna i huhut ditogu jala dipalua. Sikap na sama do nang na taida diharadeon ni Jesus sumolukkon hajolmaon, manaon naporsuk laho paluahon jolma na dipardangolan ala ni sumbia ni Dosa i. Ido nang na taingot di minggu-minggu prapaskah na tadalani saonari. Laos on ma na paingothon jala na mampargogihon hita na sai donganan jala urupan ni Debata do hita dinasa pardangolanta. Rade do Debata rap marsitaonon dohot hita. Arga do hita di Ibana natape leas roha ni jolma marnida hita alani hapogoson, parsahiton, hagaleon, dlan.
(2) Ndang ditabunihon bohina maradophon ibana. Alasan na paduahon on, martudutudu tu sikap ni Debata na sai mamarateatehon jala manondangi pardalanan ni angka na dangol i. Dang olo Debata bersikap cuek, paula sodiboto, dungi martabuni pasombu angka na dangol i mardalan sandiri di pardangolanna. Alai ditatap jala disondangi Debata do nasida. Pandohan manabunihon bohi di padan na robi tudutudu do i tu na maninggalhon. Alani i molo didok dang ditabunihon bohina marlapan ma i dang olo Debata maninggalhon angka na dangol i. Ima na paingothon hita sadarion, natape sipata tubu tu rohanta hira naung ditinggalhon Debata hita dipardangolan ala ni ragam ni hamaolon na marudutudut ro, alai anggo sasintongna dang dung hea Debata maningalhon hita. Natape sipata tatabunihon bohinta marapohon Ibana alai anggo Debata sai diadophon do bohiNa tu hita paima hamumulakkta. Hasatiaonna mamaratatehon, maonondangi, jala paima hita ido alasana na tung mangonjar hita rade mamuji, pasangap jala mangkormat Ibana.
(3) Jala ditangihon do anggukna i tu Ibana. Alasan na patoluhon on, saurdot manang udutan ni dua alasan na parjolo i ma on. Molo dang lea rohana jala dang ditabunihon bohina maradophon angka na dangol, sada sian godang tanda ni i, ima na rade Debata manangihon angguk ni angka na dangol i. Ai somal na, molo so arga sasahalak di hita jala lea hita marnidasa, dang olo hita mandoppakhon bohi tusi, jala dang olo hita mambege hatana apalagi angguk na. Diparngoluan siapari, godang do namasa songon i taida. Angka angguk-angguk ni na dangol/tertindas i tung maol do di bege angka parharajaon i. Ido sipata, ditonga ni hamaolon na niadopan ni angka nadangol i, jojot do gabe peop sandiri ala dang marlapatan rupani dianggukkon. Ai dang dibege, dang ditanggapi angka parbapaan i. Mangurus siuruson pe jotjot do masa songon i na marrumanghon diskriminasi. Molo na bongal na ro sigop di adopi alai molo na dangol ro olo do dipamaol maol. Diparhalleton ni angka naposo pe, dijaman sisaonari on, olo do adong na holan marnida hepeng/matre. Molo na mora ro martandang tu jabu na, pintor dohot do Among/Inong na heppot majujui asa pintor dioloi. Alai molo anak ni napogos, pintor diorai jala dibursikkon. Alai asing do anggo Debata. Pengalaman nisi Daud na digurithon di bindu 22 on papatarhon naditangihon Debata do anggukna na dipardangolan i huhut dipalua ibana. Datung sipujion ma Debata disi?
Huria ni Tuhan na hinaholongan dibagasan Jesus Kristus,
Marhite turpuk jamita borngin do dipaborhat ma hita mulak tu ngolu siganup ari huhut dipaingot asa molo pe mangadopi ragam ni hamaolon hita unang ma i gabe padaohon hita sian Debata, alai sabalikna, tapangke ma i dalan laho pasolhot diri tu Debata. Hamaolon i tapangke laho patanghon haporseaon unang sabalikna. Ingot ma hita, molo sai jojou jala tarangguthon Debata, sai marujung tu hamonangan do hita songon na pinatudohon ni ngolu nisi Daud nang Tuhan Jesus na digombarhon diturpuk on. Dung salpu pardangolan i rodo hasangapon. Dung salpu hapariron i rodo hamonangan dohot hadumaon songon na nidokna ayat parpudi ni turpuk ta on "Sai mangan do sogot angka na dangol i jala butongan (ay.27). Alani i, natape sipata leas roha ni jolma marnida hita, diparengkeli pardangolnata, dlan manongtong ma tapuji Debata na sumarihon hita, na mangargahon hita dipardangolnata, napadompakhon bohina manondangi hita, jala na mambege angka angukta. Margogo ma hita marhaporseaon jala marhaporusan tu Debata diragam ni angka na masa dingolunta. Amen
Tidak ada komentar:
Posting Komentar