Jamita Partangiangan 19 Mei 2021 (Joh. 17:6-19)

 

Hatuaon ni halak partigor

(Joh. 17:6-19)

Hadirion ni halak na porsea/sintong: Ampuna ni Debata dohot Jesus

Huria ni Tuhan na hinaholongan dibagsan Jesus Kristus,

Di Minggu Exaudi on tarimangi do tema na mansai tabo begeon ima Hatuaon ni halak partigor/Kebahagiaan orang benar. Jala laos ido na tarimangi borngin on marhite turpuk jamita naung tajaha nangkin na dienet sian Joh. 17:6-19. Sambolus, hera naso adong do kaitan ni turpuk on tu tema ni minggunta. Ai dang adong dihatai di turpuk taringot hatuaon jala hata hatuaon pe dang adong tarjaha hita disi. Alai molo manat tasulikkit, aha na dibaritahon ni turpuk on tung hatuaonta do i songon halak na porsea.

Godang do nean namambahen hita martua. Isarana, adong do mandok martua ho burju amantam, martua ho bah nunga ASN borum, martua ho karejo di bank anak dohot parumaeonmu, martua ho sai adong na sumarihon ho, martua ho poang burju tokkem nampuna tokko on tu ho, dlan. Jala martua do hita tahe molo boi dope martangiang jala sai adong na manangianghon hita? Martua ma tutu dibanding halak naso adong manangianghonsa.

Alani i, ombuk do turpuk ta on tu tema hatuaon ala tangiang ni Jesus tu siseanna do turpuk on. Antong hantus ma hatuaon ni halak na porsea nagabe sisean ni Jesus ima ala tangkas do ditangianghon jala diondihon Jesus hita hape sian mulana. Ditangiang ni Jesus on dipatarida do haburjuon dohot perhatian ni Jesus tuangka na manghaporsea i ibana jala laos dipatorang do ia hatuaon ni halak na porsea parjolojolo tarida do i sian hadirionna ima songon Ampuna ni Debata dohot Jesus. Tung tangkas do diturpok on i taida marhite pandohan ni Jesus: Ho Hian do nampuna nasida; ai hodo nampuna nasida (ay.6-10).  Aha do na boi taida molo didok ampuna ni Debata hita? minimal adong dua hal ima: Di tanda Debata hita jala mangolu tu Debata do hita on. Ai molo ampuna ni Debata hita, tontu ditanda Debata ma hita secara singkop. Boa hadirionta, aha na ringkot di hita, boa memperlakukan hita, jala na rumingkot ima sai na jagaaon ni Debata do hita asa unang nean gabe sega, dlan. Sarupa do i molo adong ugasanta isarana sepeda motor. Tontu tatanda do sepeda motorta i, taboto aha naringkot tusi jala laos ta jamothon do i asa unang sega nean. Ima hatuaon ni halak na porsea ampuna ni Debata ai Ibana ma na menjamin hangoluan ni angka ampuna na i. Alani i, molo porsea doho na ampuna ni Debata, martua ma ho jala pos ma roham donganan jala ramotanna do ngolum siapari.

Ihut tusi, hatuaon ni halak na prosea ima molo tung boi ibana marsihohot mangolu hombar tu halomoan ni roha ni Debata. Pintor marsak jala busesaon do halak na tutu porsea molo mangulahon naso hinalomohon ni Debata. Alani i, molo so mallabok be taroktokta mangulahon hajahaton, pargabuson, manakko, marjuji, paroaroa halak, memfitnah, dlan tontu naung dao do hita sian Debata jala dang sintong be hita on halak na porsea. Manang na ise na mandok Debata nampuna au, mangolu ma hombar tu na hinalomohon ni Debata. Ido nang na dihangkam di BE. No. 470: 1-4  namandok: "Jesus ho nampuna au dohot na adong di au, Gogo dohot hosangki sahat ma tu tangan mi; Sai rajai ma matangki manangkasi dalanMi, Sai patinggil pinggolhi manangihon hatami; Dohot tangangki tahe naeng manjama na ture, dohot pat sai naeng mandalani dalanMon; Hata nang soarangki sai rajai madohot i, Sai denggan huhut sintong bahen hatangku sae tongton" Antong martua ma halak na mardalan di dalan ni Jahowa.

Hatuaon ni halak na porsea: Diondihon Tuhan Jesus

Huria ni Tuhan na hinaholongan dibagasan Jesus Kristus,

Aha do pangidoan ni Jesus ditangiang na i binna dohonon hita martua ala ni tangiang i? Sian turpuk on boi ma idaonta adong tolu pangidoan ni Jesus tu Ama ima asa:

a.       Di ramoti (pelihara) Debata angka na porsea i dibagasan goarNa asa gabe sada. Didok do tangkas di turpuk on:"Ale Amang na badia, ramoti ma nasida dibagasan goarmu angka na nilehonmi tu Ahu, asa sada nasida songon hita" (ay.11). Tangiang on dipangidohon Jesus uju naung jonok tingkiNa tarsilang Ibana. Alani i dipangido ma asa diramoti/dipelihara Debata angka sisean i asa tung marhagogon marnida jala manaon haprosuhon i. Taida ma tung mansai diargahon Jesus do ngolu ni angka na porsea i jala dijamothon. On ma nagabe hatuaon ni halak na tigor roha i. Asing ni i, Sian tangiang on tangkas ma taida andorang so didalani Jesus haparironNa marhite dalan Silang i, nungga dipangidohon Jesus asa tung manontong sada angka siseanna mandalani haporsuhon nanaeng ro sahat tu bagasan ombas on. Alani i, tung mansai ringkot do tarimangi pangidoan ni Jesus on asa tung aha pe namasa dingolu nang parsaoran ni huria manongtong ma dibagasan hasadaon di panghilalaan, parsaoran nang haporseaon pe. Asa molo gabe sursar, marbolat halak naporsea nang huria i, boi dohonon ma na mangalaosi tangiang ni Jesus ma i. Manang na ise na manahi hasesega ni parsaoran ni huria baik hinorhon ni angka hagiot/ambisi, hansit ni roha, dlan. Maralo ma i tu na hinirim ni Jesus tu ngolunta. Sabalikna tarjou ma hita manongtong padimundimun hasadaon ai ido hatuaonta. Ai saleleng dibagasan parbolatan sada huria, ndada boi sintong nasida marbarita nauli tu portibion. Alani masihaholongan ma hita asa dao angka parbolatan jala togu manonun hasadaon.

b.       Ramotan (lindungi) ni Debata maralohon na jahat. Didok di turpuk on: ”Ndang apala hupangido, taitonmu nasida sian portibon; alai naeng ma ramotanmu nasida maralohon na jahat i (ay.15). Baosa tung ringkot ramotan ni Debata angka na porsea i sian angka najahat i? ala memang sai dihosomi portibion do angka naporsea i jala sai naeng siaphononna (ay.14). Sian pandohan i boi ma idaonnta sai manongtong do adong halak parjahat na mansogohon halak na porsea di portibion. Alani i, molo pe sai adong hamaolon diae halak naporsea ndada pola gabe tahuton hita bahenon ni i, ai nungga songon i sian mula ni halak na porsea i sai dihosomi portibi on. Alai marhite tangiang ni Jesus di turpuk on pahothon rohanta nasai ramotan ni Debata do hita. Nang pe malua hosanta jala mate alai anggo tondinta i sai manongtong do dibagasan pangaramotion ni Debata.

Sian tangiang ni Jesus on tangkas ma nang taida dang dipangido Jesus asa taiton ni Debata naporsea sian portibion. Ndang ditangianghon Jesus asa adong dalan pelarian ni naporsea i. Alai dipangido Jesus asa boi nasida marhamonangan. Haporseaon ni halak Kristen harus dihayati di tengah-tengah persoalan dan hiruk pikuk kehidupan. Haporseaonta di Debata ndada manawarhon ngolu na malua sian angka parsoalan, alai manawarhon cara untuk memecahkannya dibagasan pangaramotion/lindungan ni Debata. Dengan kata lain, Tuhan tidak menawarkan kepada kita kehidupan yang terlepas dari kesulitan, melainkan kehidupan yang dapat menghadapinya dan mengalahkan kesulitan itu. Alani i, unang pola sai adong giot ni rohanta pintor naeng manadinghon portibon alai marusaha ma hita dibagasan pangaramotion ni Debata laho manghamonaghonsa.

Aha mambahen hita jotjot talu maralohon hajahaton? ala sai tapangasahon hagogogonta sandiri jala tahalupahon pangurupion nang pangaramotion ni Debata na manongtong hadir dingolunta. Antong ise do halak na martua? ima halak na marningot jala mangasahon pangaramotion ni Debata jala na manaluon nasa ragam ni haporsuhon. Hea do didok sahalak pande bisuk songon on: "Halak na paling martua diportibion ndada halak naso adong hamaolon nang parsoalan ni ngoluna. Halak na paling martua diportibion ima halak na manaluhon angka hamaolon nang parsoalan ni ngoluna". Antong molo pe tongon nuaeng hita dibagasan angka ragam ni hamaolon, dibagasan pangaramotion ni Debata angka halak nanaeng martua ma hita na manaluhon hamaolon i.

c.       Diparbadia i Debata. parbadiai ma nasida dibagasan hasintongan; hatami do hasintongan i (17). Tangkas do taboto hinorhon ni dosa, gabe ramun do hangoluan ni portibion. Ragam do hajahaton nang harorangon na manegai habadiaon ni jolma nang tompaan na asing pe. Alani i, dipangido Jesus ma asa diparbadia Debata angka na porsea i. Hata diparbadia i marmual do i sian hata hagios manang hagiazein dihata gorik na marlaptan marasing manang terpisah. Alani i secara sederhana dipangido Jesus asa marasing, jala terpisah ngolu ni angka na porsea i sian angka hajahaton nang haramunon ni portibion. Ise do na pabadiahon? Debata. Alani i habadiaonta ndada alani hita alai ala na diparbadiai Debata do. Ido alana ringkot hita manjaga habadiaon na pinasahat ni Debata i tu ngolunta asa unang gabe marisuang silehonlehonNa i tuhita. Habadiaonta tajalo marhita Jesus Kristus na mamparbadiai diriNa humongkop hita dalan haisntongan i. Aha mambaehn hita manongotng badia ima mian dibagasan hata ni Debata ndada dibagsan hatatta. Ai hataNa i do hasingtongan i. Antong taparbadia i mangolu ni angka naporsea i alai jumolo ma sian dirinta nang ngolunta sandiri. 

Hatuaon ni halak na Porsea: Marasing sian Portibion

Huria ni Tuhan na hinaholongan dibagasan Jesus Kristus,

Boa do panghilaanta molo dang adong be napaingothon hita ditonga ni golu siganup ari? disada sisi boi do i mambahen hita bebas mangulahon manang na aha pe, alai disisi na asing boi dohonon hita ma na dumangol diportibion. Alani i martua ma antong angka halak na adong dope narade paingothon ibana ditonga ni ngolu on. Paingothon asa mangan, minum, martanginag, marsiajar, pasiding naso denggan, asa mangoli, dlan. Boi do tabayangkon boa lungunna molo dang adong be na paingohothon hita asa mangan, dlan? dangol ma i. Sialani i, tung martua do angka halak na porsea i mulai sian angka sisean ni Jesus sahat tuhita nang tu ujung niportibion ala dibagasan tangiang ni Jesus di turpukta sadarion dipaingot do hita dihadironta na ampuna ni Debata hita jala alani i tung marasing do hita sian portibion. Songon Jesus naso sian portibion songon i ma angka na porsea i dang sian portibion (ay. 14;16).

Hata portibi dison ingkon lapatanta do ndada holan martudutudu tu hasiangan na taingani saonari on, alai martudutudu tu masyarakat yang mengorganisir dirinya lepas dari Allah. Alani i, molo didok dang sian portibion halak na porsea marlapatan ma i angka halak na mangolu jala marmual sian Debata. Parpunguan na mengorganisir dirinya di dalam Allah. Ido alana ni nilai dohot standart na pinangke jala dihangoluhon halak naporsea marasing ma sian portibion. Jala hinorhon ni parasingan i gabe dihasogohon portibion ma halak na porsea i. Alai paraloan maradophon portibion jala manghamonghonsa ido silasniroha nang hatuon ni naporsea i. Molo boi hita manongtong di nilai dan standar  ni Debata ditonga ni panosak ni nilai dan standar niportibi on, ima hatuaonta. Uju pargabuson/hoaks gabe hasomalan ni portibon, hatuaon ni naporsea i ima molo hot ibana mambaritahon hasintongan/kejujuran. Uju korupsi manosak dingolu ni portibion, hatuoan ni halak partigor ima molo manongtong manulak korupsi tung ala ni alasan aha pe. Uju KDRT dan parsirangan ni rumatangga gabe nilai na masa di portibion, hatuaon ni halak na porsea ima molo manongtong dihasatiaon dohot hasadaon ni rumah tangga, dlan. Alani i manongtong ma tapatuduhon parasinganta sian portibion na tarida di ngolu siganup ari baik di panghataion nang parange pe.

Antong, mulak ma hita tungolu siganup ari ingot ma halak na martua do hita na mangolu dihatigoran jala naporsea ai ingot ma ampuna ni Debata do ngolum alani i sai ramotan ni Debata hita saleleng nihasiangan on. Tapareak ma mahasadaon dohot hadameaon huhut ma tapatudu parasinganta sian portibon. Dipasupasu Debata ma hita manongtong martua dibagasan hatigoranNa. Amen.