Asiniroha ni Debata siboan Lasniroha
4 Musa 21: 4-9
Galas satonga kosong satonga marisi: Ungutungut ala fokus tu nasoadong
Huria ni Tuhan na hinaholongan dibagasan Jesus Kristus,
Ragam do alus na boi tapasahat molo disukkun aha do na boi mambuat manang manundati hita marlasniroha. Isarana sijamaon ni tangan naso ada, parange ni ianakhon, haholiton, sogo ni roha/kebencian dlan. Alai parange na sai marungutungut jala holsoan ido na gumodang mambuat silasnirohanta. Holan halak na susa do manang na olo do halak na maduma marungutungut? ra jalo do alusanta sude do halak olo marungutungut dang tergantung tu sijamaon ni tangan.
Parungutunguton marhadomuan do i tu hamaolon ni jolma i mandok mauliate/bersyukur dingoluna. Asing ni i, jotjot do parungutunguton i marhadomuan tu parange dohot sudut pandang ni sasahalak. Adong do rupani teori na margoar galas satonga kosong satonga marisi. Dipatudu sahalak pangajari ma sada galas na marisi aek. Dungi disukkun ma angka sisean i boa nasida mangida galas i dohot isi na i. Adong ma antong na mandong galas satonga marisi, alai adong do na mandok galas na satonga kosong. Sian on, didok pangajari i ma, manang na ise na fokus tu na kosong ido na mandok galas satonga kosong. Alai halak na fokus tu na adong mandok galas satonga marisi. Biasanya molo sai fokus tunaso adong, ido mambahen jolma gabe marungutungut. Isarana, uju naeng mangan hita, nungga diparade dekke mas alai talullui manuk na pinadar hape dang adong, holsoan ma dungu mago ma las niroha. Manang uju patupa partangiangan hita, molo fokus hita tu kursi na kosong on tontu marungutungut ma hita. Alai molo fokus hita tu jolma na ro jala kursi na marisi mandok mauliate do hita huhut marlasniroha. Alani i, cara pandang ta tusada situasi nang persoalan mansai marhadomuan do i tu silasnirohanta.
Teori i boi do bahenonta laho manaropong parange ni halak Israel na mansai jotjot marungutungut dipardalanan sian Misir tu tano Kanaan songon na tandap taida di turpuk ta sadarion. Bangso naung dipalua Debata sian parhatobanan, didongani di pardalanan, di sarihon sipanganon siiunmonna, alai boasa dope sai marungutungut nasida? alusna dang diboto mandok mauliate jala fokus nasida tu naso adong. Di ayat 5 tangkas ma taida alasan parmunugutmuugon nasida Ai so manang adong sagusagu manang aek dison, jala nungga ginegine ateatenami mida sagusagu na giakgiak on. Natape nungga malua nasida sian ihot ni parhatobanan ni Mesir alai tarihot dope nasida diparhatobanaon ni sipanganon. Adong do dilehon Debata Manna/sagusagu dohot pidong dipardalanan i jala tinggal mangallanghon nama nasida sopola mulamulaon. Alai dang dihamauliatehon i alani haginjangon ni roha jala fokus nasida tu naso adong. Mago ma lasniroha jala laos madabu ma tu dosa.
Ai diparmungutmunguton i, didok nasida do boasa tung togihonon muna hami nangkok sian Misir, asa mate hami di halongonan on huroa? Molo tapamanat i boi do nadituduh bangso i Debata dohot si Musa manahi hamatean nasida/rencana pembunuhan. Dipalua sian Misir laho pamatehon nasida. Jahat nai diroha nasida Debata dohot si Musa. Parmungutmunguton jotjot do mamboan jolma i madabu tu dosa na saling tuduh menuduh.
Respons ni Debata: Ulok tulung Api dohot panolsolion ni Bangso i
Menarik do diturpuk on ndada adong dipatuduhon boa respons ni si Musa mangadopi parmungutmunguton ni bangso i. Natape nungga tung mansai hansit i nian tuduhan nasida i jala disisi na asing diraguhon nasida kapasitasna songon uluan na ditodo Debata. Holan Debata do dipatudu na merespons pamungutmunguton ni bangso i. Sian on ma boi taida hasadaon ni Debata dohot si Musa dimisi haluaon i. Sisada hasadaon do Debata dohot si Musa mangadopi bangso i. Alani i, songon naung didok di 2 Musa 14:14 Jahowa do marporang humongkop hamu asal ma hohom hamu, dipatuduhon ma diturpuk on na hohom si Musa jala Debata na bertindak. Ditongos Debata ma tu tonga-tonga ni bangso i angka ulok tudung api, angka na mamarguti bangso i, gabe marmatean masai torop sian Israel (ay.6). Diuhum jala dipinsang Debata nasida na meraguhon jala na mansoadahon misi haluaon napinatupaNa. Mate nasida ndada ala naso adong sagusagu dohot siiumon songon na nidok nasida i, alai ala ni ulok na tinongos ni Debata.
Dung diadopi nasida rimas ni Debata jala uju naung dipintu ni hamatean bangso i, mulak ma roha nasida tu Debata. Disolsoli ma dirina jala mengaku salah di adopan ni Debata nang si Musa. Dungi marpangidoan asa tung lambas roha nisi Musa asa rade mangondihon nasida anggiat disalpuhon Debata rimasNa jala dipadao ulok tulung api i sian tongatonga nasida (Ay. 7). Diboto nasida ma naso talup dohape malua nasida anggo so alani Debata. Dang tuk gogo nasida mangomgomi ngoluna sandiri hombar tu hagiot dohot lomo nirohana be. Naingkon marsigantung tu Debata do Jotjot do nang dipartingkian on masa sisongon i. Dung naeng mate dihilala baru pe joujou tu Debata. Anggo dihagogoonna i soi nama tangkangna. Alani i, tarjou ma hita asa gira marsigantung tu Debata unang jolo posi dihilala.
Uluan si Lambas roha
Rade do tutu roha nisi Musa mangodihon bangso na jungkat i ditangiangna tu Debata asa tung anggiat dipalua Debata bangso i (7b). On ma sada gombaran jala tiruan dihita dingolu siganup ari. Angka uluan na sintong siihuthon Debata, baik uluan di huria, sektor, keluarga, kantor, dlan, ingkon do parlambas roha jala mengutamahon kepentingan bersama sian kepentingan diri sandiri. Uluan na sintong ikkon sanggup do manaluhon jut ni roha nang haberniton hinorhon ni parange nang pambahenan na niuluhonna demi hademahon dohot haluaon ni naniuluhonna i. Nungga tung bernit jala hansit nean pambahenan ni bangso i tu si Musa, alai rade do ibana manolopi pangidoan ni bangso i. Ndada dipangke ibana partingkian i laho mamalos jut ni roha na i. Isarana rupani, ndada didok ibana, HARU DISIAPHON DEBATA nean hamu. Manang di dok ibana HARU TAON HAMU MA nungga dijalo hamu be bagian muna. Songon na hudok dijamita nadiari minggu i, talup do si MUSA patujolohon holong ni rohana sian jut ni rohana.
Monongtong do diulahon si Musa ulaonna songon uluan ima menghubungkan bangso i dohot Debata. Hansit do na jinalona alai manongtong marsihohot mangulahon aha na seharusna siulahononna. Manongtong mangulahon na denggan natape ndang denggan na jinalona! Dang gabe mansohot mangulahon nadenggan alani naso denggan na pinatupa ni bangso i. LUAR BIASA NDANG i?Molo dingolu siganup ari hita, boa do tahe? ra boi do hatop alusanta holan suhar tajalo sian denggan na taulhon i, olo do pintor mandele jala tapaso mangulahon na denggan i. Bah sitalutalu iba? molo na denggan binahen denggan ma nian na jinalo, dlan.
Huria ni Tuhan na hinaholongan dibagsan Jesus Kristus,
Sikap dohot parange nisi Musa On ma nanaeng sipatupaonta dingolu siganup ari, songon halak na manghaporseai Debata, hukum na parjolo siulahononta ima Relasi yang didasarkan pada Kasih. Relasi kasih bukan relasi kepentingan! Uluan na mandasorhon ulaonna tu holong ni roha ima uluan na pangoluhon ndada pamatehon, Uluan na patupahon na dumenggan di ulaonna natape nadijalona ndada na dumenggan. Ulaon na mambahen marlas niroha na humaliangta. Aha do ulaon na pangoluhon? boi do i pangoluhon hasadaon, parsaoran/relasi, dlan. Natape dihansiti angka ianokhon hita manongtong ma patupahon ulaon na pangoluhon tu nasida ima angka ulaon na denggan. Natape hansit taahap sian angka ruas, songon parhalado manongtong ma mangulahon tugas dan tanggungjawabta songon parhobas sekaligus natoras ni angka ruas dihaporseaon. Natape hansit taae sian angka parhalado alai songon ruas hita tetap ma taulahon tugas dohot tanggungjawabta. Natape hansit taae dikorps kemajelisan manongotng ma mangulahon tugas dan tangggungjawabta. Asa molo tutu situtu tahaholongi Debata dohot ulaon na pinasahatNa tu hita ingkon manongtong do hita mangulahon na denggan ai tusi do hita tarjou. Ulaon nadenggan sipatupaonta ndada ditontuhon respons ni na humaliang. Alai sabalikna, ulaon na denggan i do namengubah jala manontuhon respons ni na humaliangta, sekaligus sebagai responsta tu asi ni roha ni Debata naung paluahon hita.
Asi ni roha ni Debata: Dipalua bangso i
Huria ni Tuhan na hinaholongan dibagsan Jesus Kristus,
Songon na dioloi si Musa pangidoan ni bangso i, dioloi Debata do tangiang nisi Musa. Disuru Debata ibana mambahen ulok tombaga dung i disanghothon tu sada hau. Manang na ise na dipargut ulok tudung api i jala diida ulok tombaga i, dang mahua/malua do nasida (ay.8-9). Nungga tung balga nean lamabas niroha nisi Musa maradophon bangso i, alai dao dope umbalga lambas nang asi niroha ni Debata. Molo diondihon si Musa bangso i, alai anggo Debata dilehon do dalan haluaon tu nasida.
On ma naingkon sihalashononta di minggu Letare on ima hinabalga ni asi niroha nang holong niroha ni Debata mangalehon hasesaan ni Dosa i. Holan ro jolma pardosa i sumolsol bagi dipangalaosionna, rade jala ungkapdo roha ni Debata manjanghon jolma i huhut manesa dosana. Sai na umbalga do holongNa sian rimasNA. Sai dipatujolo do holongNa jala dang olo Ibana ditaluhon rimas dohot sogo ni rohaNa mida bangso na geduk i. Sai umbalga do holongNa sian hajahaton dohot dosanta. Ndada olo Ibana ditaluhon hansit ni roha dungi madabu tu hamuruhon naso marujung. Alani i, ahu dohot hamu jolma pardosa do tahe? ahu dohot hamu parungurungut do? ido pardosa na balga jala na mandele. Saonari dung tabege barita nauli on, ro ma hita songon halak na mardosa tu Debata na manghaholongi hita. Tung dihirim Debata do hita ro tu Ibana ai Debata sandiri nungga ro manopot hita marhite Jesus Kristus.
Adong na menarik dison, pangidoan ni bangso i tu si Musa nang tu Debata ima asa anggiat dipadao Debata angka ulok tulung api i sian nasida. Alani dialus ni Debata on, ndada ulok tulung api i nadipalao/dipamate Debata. Tetap do disi ulok tulung api i alai dilehon Debata pulungan/tawarna. Ima uluk tombaga i. Tudutudu do i nang tu Jesus Kristus na gantung dihau pinorsilang i. Asa manang na ise na dipargut sumbia nisi bolis alai ditatap jala dihaporseai Jesus na gantung di silang i dang dung mahua mamang malua do hosana. Dingolu siganup ari, jotjot do hita mangido asa dipasiding Debata angka abat-abat manang galumbang ni ngolu alai dang sai dioloi Debata. Galumbang i sai adong do alai dilehon Debata do tawarna ima pandonganionna na mampargogihon hita. Dang pintor dipalao Debata korona on alai dilehon gogo dihita mangadopisa. Songon naung hea hudok di awal taon on kesaksian ni keluarga ni iboto nami na hona covid di bulan Desember pola gaba dang boi nasida marnatal rap dohot keluarga. Didok nasida do ndang pintor dilehon Debata hamalumon di hami alai dilehon do hati yang kuat laho manalpuhonsa.
Alani i, unang pola sai tapangido laut dang margalumbang alai tapangido ma dilehon Debata dihita gogo laho manalpuhonsa. Ai sipata galumbang i do diloas Debata laho mengasah parsihohotanta tu Ibana. Jala na paling penting ima, dao do gumogo Debata sian nasa angka hagogon dohot parmaraan di hasiangan on. Mengikut Tuhan bukan berarti jalan hidup kita serba mudah, tetapi bukan pula serba sulit. Yang tepat ialah mengikut Tuhan memampukan kita menjalani kehidupan seberat apapun. Antong tahaslashon ma asi nirohaNa i, tadok ma mauliate jala tapasiding ma angka parmungutunguton i. Songon na nidok ni endeta paso ungut ungut mi paso paso ungut ungut mi paso hohom maho paso saritami (BE. No 503.). Pos rohanta dipangaramotion nang holong ni roha ni Debata. Selamat marletare, selamat marlas niroha. Amen.
Tidak ada komentar:
Posting Komentar