Patik Raya
(Mateus 22: 37-40)
Huria ni Tuhan na hinaholongan dibagasan Jesus Kristus,
Dingolu siganup ari boi do jumpangta ragam alasan ni jolma manukkun sisukkunon. Naparjolo, Adong do halak manungkun sesuatu ala memang dang diboto. Dohot hata na asing manukkun ibana laho patamba parbinotoanna. On tung mansai denggan do pangkorhonna. Ai boi pabidang parbinotoan tanpa harus manusai manang mangarugii jolma naasing. Napaduahon, adong do halak nungga diboto nian alai disukkun dope. On ma na jotjot taida di parsikolaan, nungga diboto guru/dosen alus ni sukkunsukkun i alai disukkun do angka muridna dalanna laho manguji parbinotoan ni sisean i huhut manguji keberhasilan ni pangajarionna. Tontu hal na positif do i, natape boi do sikap singonon i gage margeser tu na negatif. Isarana sipata olo do masa i nang di huria, diparsermonan rupani. Nungga diboto sittua i alus na alai antar disukkun ma laho manguji parbinotoan ni Pandita manang sintua na manguluhon sermon i. Asa molo so diboto pandita mannag sintua i, gabe boi ibana hira na paburnang diri mangajarisa. Napatoluhon, adong do halak manukkun sesuatu dalanna laho manaoni, manambil/menjebak, manang manjehehon halak na sinukkun na i. Dibalik ni sukkun-sukkun i harop rohana asa adong dalan laho mandabuhon na sinukkun na i. Ai dirajumi, tung aha pe alus na natau salah ma i jala laos i ma bahenonna laho manggosa. Parange sisiongon i ma na niulahon ni angka siboto surat, Parise, Saduki dipartingkian ni Jesus. Godang do nasida manukkun Jesus holan naeng manjehehon Ibana.
Turpukta sadarion na tarsurat di Mateus 22: 37-40 alus ni Tuhan Jesus do i tusukkunsukkun ni halak Parise nang siboto patik na naeng mangunjuni Ibana. Didok di ayat 35 "dungi diunjuni sahalak sibotopatik sian nasida ma Ibana, di sukkukn ma: Guru nami, dia do patik raja sian angka patik i?" Patik na nimaksudna dison ndada holan patik na sampulu i, alai saluhut patik na adong di hajahudion na marjumlah 613 Patik. Mangalusi i, didok Tuhan Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham; Sihaholonganmu do donganmi doshon dirim, Patik na dua on do na manghangkam nasa patik dohot hata panurirang. Alus ni Jesus on ndada pandohanna sandiri i, alai na dienet Jesus do i nang sian padan narobi ima 5 Musa 6:6; 10; 12 dohot 3 Musa 19:18. Dohot hata naasing ndada hal naimbaru i diparbinegean ni halak Parise. Nungga diboto nasida i nian. Bahkan nungga gabe pengakuan iman (shema) i di nasida. Nungga peam jala otomatis boi dihatindaghon molo adong manukkun. Antar songon hata haporseaonta i rupani, nungga peam jala taingot i.
Alai dang dung hirim roha nasida i alus ni Jesus. Asa molo i alus ni Jesus ndada adong dalan nasida manjehehon Jesus. Ai dang adong sian patik i na dipatujolo Jesus dungi pagellenghon patik na asing. Alai tung pangarimpunan na do dibahen Ibana. Marhite sian i, rap arga do saluhut patik i siulahonon dalan manghaholongi Debata nang Jolma. Sian i do naeng nian hantus ta antusi ndada adong nanggo sada sian patik i na disesa Jesus, termasuk ma patik na sampulu i. Alani i, dang adong dalanta mandok dang porlu be patik dingolu ni na porsea. Molo so disesa Jesus Patik, boasa naeng hita manesasa? Holan i tutu, ndada patik dalan haluaon, alai sabalikna songon nanung pintorang dijamita nadiari minggu i, halak naung dipalua Debata do mangulahon patik.
Holong Silompit Dua/Kasih Rangkap Dua
Huria ni Tuhan na hinaholongan dibagasan Jesus Kristus,
Sian alus ni Jesus on, tangkas ma taida dasor ni sude parsaorannta dohot Debata nang dongan jolma, suang songon i dasor ni saluhut nasa na taula dihasiangan on, ima: Holong Silompit Dua. Holong tu Debata, holong tu dongan Jolma. Ai dos do arga ni na dua i! Boasa holong nagabe dasor ni saluhut parsaoran nang ulaon? ala memang Debata do haholongon i jala holong na i do dibahen laho manompa, paluahon jala mamparmudu jolma i. Ido alana didok nang dihata ni Debata ise naso mian dibagsan holong dang taripar dope i tu hangoluan alai mian dihamatean. Ido didok di 1 Joh 3: 14b naso parholong ni roha mian do dibagasan hamatean. Alani i, dasar ni hangoluan ima holong.
Holong do nang dasor ni saluhut hatuaon jala dasor ni haunduhon tu patik nang angka ragam ni aturan ni hasiangan on. Molo unduk hita mangulahon patik alai ndada didasorhon tu holong madabu tu legalistik dohot kemunafikan do hita disi! Songon i do nang molo unduk hita tu uluan di huria, dikantor, dihuta, dijabu, tu guru, dlan alai molo so didasorhon tu holong do madabu tu ketaatan buta jala parhatobanan do i. Jotjot do i mangkorhon haberniton, parsahiton, dohot jut niroha. Boi do ra tabayangkon ate, unduk hita mangulahon parsuru ni uluan alai dang sian ias ni roha, aha ma na masa? diulahon do ulaon i alai terpaksa, marungutungut, jut roha, mamurai, dlan. Ndada patubu parsahiton do i? Alai molo alani holong ni roha do hita mangulahon parsuruon ni pardijabu isarana, tung mangkorhon las ni roha do i. Alani i, asa martua halak na mangulahon haunduhon ingkon do marojahan tu holong ni roha tu uluan i nang tu ulaon i. Jala laos holong do na margogihon jala mangapuli hita natape natahirim i dang tung dapot hita. Ido isarana di parhelleton ni angka naposo adong pandohan di hata Indonesa mencintai tidak harus memiliki!
Holong silompit dua na niaarjhon ni Jesus on ma na paingothon hita dang tung boi dohononta holan manghaholongi Debata do na ringkot anggo dongan jolma dang pola. Holan parsaoran di huria do na ringkot, di huta dang pola. Holan dongan sahuria, sahaporseaon do sihaholongan, naasing i dang pola. On do na godang masa dipartingkian on. Dihaholongi do Debata, ringgas marminggu, pelayanan, alai dang mardomu tu natoras nang angka sisolhotna. Hape mangihuthon hata ni Debata di 1 Joh 4: 20 Pargabus do halak molo didok holong rohana tu Debata alai dihosomi dongan na! Alani i, molo taida parsaoran nang panghobasionta di gareja songon sada dalan patudu holong ni roha tu Debata ingkon saudot ma i marhite na masihaholongan sama ruas, unang masihosoman, masitihasan, masijehean, masitaonan, unang saling mansoadahon alani ragam ni angka parasingan na adong dihuria. Ingot ma hita kasih menutupi banyak hal.
Alai sabalikna, masiurupan, masitoguan, masitangiangan, masiapulan, masidukungan. Pargabus do hita molo sai ro mamuji Debata di gareja, alai sai marbadai jala masipahatahataan, masipasidingan, bahkan dang masiantoan sesama ruas ni huria nang sesama parhalado. Pargabus do hita molo tadok holong rohanta di Debata alai las rohanta molo susa manang marsak donganta sahuria. Pargabus do hita molo tadok holong rohanta di Debata alai tahi pamolamola tahinta di huria nang di huta. Bahkan pargubus do nang hita molo ringgas marminggu hape dang boi masiantoan dohot dongan hombar jabu, dongan sahaporseaon manang dang dongan sahaporseaon. Alani i, marhite turpuk on, dipaingot hita muse asa tahangoluhon holong ni roha silompit dua i.
Manghaholongi Debata Sian Hibul Ni Ngolu.
Huria ni Tuhan na hinaholongan dibagasan Jesus Kristus
Hombar tu patik i, boa do manghaholongi Debata? di dok Tuhan Jesus sihaholonganmu do Tuhan Debatam sian nasa ataeatem, sian nasa hosam, dohot sian nasa roham (ay.37). Marlapatan ma i manghaholongi Debata sian hibul ni ngolu. Ndada boi holan di hata alai dohot ma dipambahenan. Debata ma na utama di sude ngolunta. Tabahen ma Debata na ummangat didalam segala hal, dimana saja, kapan saja, dan didalam segala kondisi. Tarsongon somalna hita na manghaholongi ianakhonta, sai tapatujolo do nasida sian na ringkot dihita ndang i? Ido alana molo holong rohanta di Debata, Ibana na utama di sude ngolunta, isarana diparkarejoan, diparadatan suang songon i disude gulmit ni ngolu pe.
Debata do patujoloon di karejo ndada hepeng nang hamoraon. Debata do sipatujoloon di paradatan nang panghobasion di huria ndada hasangapon ni diri, dlan. Boa do cara na mangulahon i? Molo tabahen patik nasampulu i gabe contoh, hombar tu jamita nadiari minggu i, ni paingot ma muse hita ia dalan laho manghaholongi Debata ima: Mambahen sasada Debata nagabe Debatanta. Unang marimbar jala unang marlaok; Manomba jala mamuji ibana di dalan na sintong; Mamparsangapi Debata marhite naso marsineang mandok goarNa; Mamparbadia i ari paradianan i marhite pamujion tu Debata di gareja nang na paluahon dongan sian perbudakan, keserakahan, halojaon, dlan. Dohot hata na asing, molo manghaholongi Debata tarida ma mai sian: hasatiaon, hasangapon, habadiaon, haradeon manghobasi dohot parroha paluahon.
Manghaholongi dongan Jolma doshon dirim
Huria ni Tuhan na hinaholongan ni Tuhan Jesus Kristus,
Boa muse ma manghaholongi dongan jolma? diturpuk on tangkas didok Jesus Sihaholonganmu do donganmi doshon dirim! Secara sederhana, manghaholongi dongan jolma ingkon dos songon dia hita manghaholongi dirinta sandiri. Bahenonta ma donganta i sisadahasadaon dohot hita. Boa hita mamparmudu dirinta songon i ma dongan ta parmuduaonta. Molo male hita, mangan. Molo mauas talului tes dungi minum, molo loja mangaso, molo marsahit laho marubat. Tung masai intens go hita mamarateatehon dirinta ala holong ni rohanta. Songon ima naneg bahenon tu dongan, saudot ma di komitment, usaha, instensitas, pambahenanta tudirinta. Molo ture denggan tapadimundimun dirinta asa malua sian angka naso denggan ala holong rohanta tu irinta, songon i ma nang pambahenanta tu donganta. Tapature jala taparmudu nasida asa unang madabu tunaso denggan. Unang sabalikna, tatahi asa madabu manang mangopo nasida. Molo so olo hita manghansiti perasaanta, unang ma tahansiti perasaan ni dongan, dlan. Memang, sada ciri khas ni hita jolma ima, kecenderungan holan mangkaholongi diri sandiri. Dirinta do jotjot nagabe pusat ni hangoluan. Alani i, naeng do holan na ringkot di dirinta taeahi. Alai marhite parenta na paduahon on, diarahon do ngolunta asa berpusat tu dongan.
Molo didok di turpuk ta on, dos do arga ni na manghaholongi Debata dohot manghaholongi dongan jolma marlapatan doi na saurdot jala naso tarsirang do nadua i. Molo tadok holong rohanta di Debata pataridaonta ma i marhite na manghaholongi dongan jolma. Molo tabahen Patik nasampuli dalanta nalo mangidasa boi dohonon ma, bukti ni natahaholongi Debata hombar tu Patik I-IV, haholonganta ma dongan jolma songon na dipaandar di Patik V-X. Secara sederhana bentuk ni holong niroha tu dongan jolma na nihangkan di patik V-X ima: (1) Mamparsangapi natoras (Patik V);(2) ndang manghansiti dongan marhite pambahena baik marhite na melukai, manegai parumatanggaonna/mangalangkup; mambuat angka ugasan nang artana (PAtik VI-VIII); (3) Dang manghansiti dongan marhite hata, pingkiran nang hagigiot (Patik IX-X). Dohot hata na asing, manghaholongi dongan jolma dalan do i dihita laho mangulahon parsuruon songon singkat/wakil ni Debata di portibion mangulahon tugas tu diri sandiri nang tu dongan jolma pe marhite na mangomgomi/melindungi hangoluan, hapolinon, hadumaon/arta, hasangapon/kehormaton; dohot melindungi parngoluan ni keluarga.
Antong mulak ma hita tu ngolu siganup ari dipargogoi Debata mual jala haholongan i ma hita mandalani ngolunta dibagasan holong na polin tu Debata nang dongan jolma pe. Amen
Tidak ada komentar:
Posting Komentar