Khotbah Minggu Joh 4:5-14

 

AEK HANGOLUAN

Joh 4:5-14

Huria ni Tuhan na hinaholongan dibagasan Jesus Kristus,

Sadarion, singkat ni ari marsogot 26 Oktober 2020, rap marningot jala tahamauliatehon do naung gok umur ni huria on 17 taon. Sialani i, jumolo ma dohonon nami SELAMAT ULANG TAHUN MA DIHURIA GKPI JK SAROHA ON. Tung sihalashononton do antong ganup jumpang ulang tahun, natape hinorhon ni Korona on dang boi hita pungu sude manghalashonsa, alai anggo apala mamotong kue ulang tahun patupaonta do annon simpul kebaktian mulai sesi I sahat tu sesi III. Asa tung talup hita sude ganup sektor rap martangiang jala manghamauliatehon dibagasan las ni roha dipangaramotion ni Debata di pardalanan ni huria on naung bolas 17 taon.

Diparningotan ni ulang tahun ni hurianta sadarion dipangkulingi Debata do hita marhite hataNa na tarsurat di Joh 4:5-14 napatoranghon pardalanan ni Jesus sian Judea mulak muse tu Galilea. Dipardalanan i, jumpang do ibana dohot sada boru Samaria di sumur nisi Jakkob na dihuta Sikar huhut dibaritahon Jesus taringot tu aek hangoluan. Songon somalna halak na marulang tahun, sai adong do rujiruji sipatupaonna, ima marningot pardalanan di ari naung salpu, manghamauliatehon ngolu natongon didalani, huhut ma i pajojor panghirimon dingolu nanaeng ro. Natolu hal on ma nang nanaeng tarimangi sadarion diulangtahun ni huria on marhite hata ni Debata naung tajaha nangkin. Sian barita pardalanan dohot parjumpangan ni Jesus dohot boru Samaria i, adong ma manang na piga naboi taputihi mutiha na arga dalanta laho manguduti pardalanan ni huria on. Angka dia mai? tapaihutihut ma:

Mangaloha Tembok Pemisah Pajongjong Jambatan: Jahudi vs Samaria

Huria ni Tuhan na hinaholongan dibagasan Jesus Kristus,

Molo naeng mulak Jesus sian Judea tu Galilea, ingkon bolusonna do luat Samaria (ay. 4) namaralo tu halak Jahudi. Memang adong do dalan na asing naboi bolusonna alai ingkon mangaliati ma sian sugai Jordan. Torop do halak Jahudi molo lao tu Galile mamillit dalan na mangaliati i asa unang jumpang manang marsidaisan tu halak samaria naung leleng gabe alao nasida. Nian nungga ratusan taon parsoalan nasida i, mulai sian masa habuangan tu Babel bolas sahat tu partingkian ni Jesus dang marhadomuan nasida. Alani i, tumagon ma mangaliati, tumangon ma loja, tumangon ma godang tingki habis asal ma unang pajumpang. Di hata na asing sai dipartahanton nasida do Tembok pemisah i dingolu siganup ari.

Nang hita pe dingolu siganup ari olo do ra songon i ate. Isarana naeng tu Lumban Gorat do hita sian Lumban Munte, alai ala adong alonta disimpang sihite i, gabe olo do hita marputar sian simpang opat bolas sahat tu SMA laho tu Lumbangorat, asa unang tung talewati bagas ni alonta i sotung maon gabe pajumpang. Di tonga ni huria pe songon i do, molo adong nahurang pas dirohanta angka parange ni ruas dohot parhalado, olo do ra hita pasiding diri laho pajumpang dohot nasida, natape nungga tongon di sada gareja. Isarana, olo do ala petugas pengukur suhu dijolo ni gareja sogo rohanta marnida, gabe tapaima jolo sidung sude diungkur jala masuk tu gareja siukkur suhu i asa masuk hita tu gareja. Sabalikna, molo siukkur suhu i do na marsogo ni roha mamereng ruas naro diukkur do nian alai paboa so dibereng ma i. Manang contoh na asing, molo sogo rohana pajumpang dohot donganna sahuria di pintu utama ni gareja on uju mulak kebaktian, rade do ibana marputar haluar gabe sian bilut parhobasan, dlan. Ndada paloja diri do i? Ndada na pajongjong tembok pemisah do i?

Sian turpuk on marsiajar ma hita dipambahenan ni Jesus. Ndang olo Jesus mangaliat holan pasiding luat ni halak Samaria. Sabalikna bolas do ibana rap dohot angka siseanna mardalan mamolus luat ni halak Samaria i. Ndang olo Jesus hot di balik ni tembok pemisah i, alai rodo ibana laho mangalohasa. Asing ni i, dipatudu Jesus ma na rumingkot do pajongjong jambatan daripada tembok pemisah ditonga ni parsaoran diharajaon ni Debata. Memang ingkon taangkui do ummura do mangaloha jambatan daripada pajongjonghonsa. Diparsaoran siapari, olo do nungga sampulu pitu taon hita on marsaor pajongjong jambatan silaturahmi, alai boi do i maloha holan sadari, saminggu, holan ala ni sangkababa hata, holan ala ni sada parsaolan. Olo do sega angka parsaoran naung denggan holan ala ni na mamaritahon/manghatahon/menyebarkan barita naso tutu, naso gabeak taringot tu dongan. Olo do sega jambatatan ni parsaoran holan ala ni parangenta nasai ringgas pamohopmohop parsoalan na metmet dungi gabe balga jala dang marhaujungan. Sai torus dipabahabahas dang dung adong pansohotanna. Lam sega ma antong jambatan parsaoran i alani na saling menuduh halak na salah laho paias diri jala mengklain dirina na sintong. Ihut tusi gabe so tahan be angka pangisi ni punguan i mian dipunguan i, olo ma adong na haluar ala nungga gabe harsean. Maloha ma jambatan, sursar ma parsaoran, mago ma nang las niroha.

Alai hita na tongon manghalashon parsaoranta dihuria on 17 taon unang ma sega jambatan ni parsaoranta holan ala ni parsoalan sadari, saminggu, bahkan sabulan. Molo so marnaloja Jesus mangalului angka nasala songon boru Samaria i, asa mian dibagasan parsaoran dohot Ibana, unang ma marnaloja hita merangkul angka donganta bahkan angka dongan na mangulahon hasalaan asa manongtong hita mian dibagasan parsaoran na rosuk dihuria on natape ragam angka namasa natabolus.

Diturpuk sadarion, jambatan na padomu Jahudi (Israel Selatan) dohot Samaria (Israel Utara) naung maloha mulai sian habuangan Babel, dipauli Jesus muse. Dilohai Jesus ma tembok pemisah i dungi pajongjong jambatan naimbaru. Ai ndang olo Jesus marsaor holan tu halak Jahudi, jala dang olo Ibana mangalehon haluaon i holan tu halak Jahudi, alai ungkap do i tuse halak termasuk ma halak Samaria. Bakan sada boru Samaria na rumar ngoluna. Ai dipardalanan i, loja jala mauas do Jesus. Sialani i, hundul ma Ibana di lambung ni sumur i, jala roma sahalak boru samaria, manuhi aek. Jadi didok Jesus ma: "Lehon Ahu Minum". Umbege i, didok boru Samaria natongon dope dibagasan parbolatan dohot na merawat tembok pemisah i,: "Boasa mangido tapian Ho halak Jahudi, sian ahu boru Samaria? Ai dang marparsaoran halak Jahudi dohot halak Samaria" (ay. 6-9).

Manghatai sian roha tu roha: percakapan personal.

Ra, tubu do turonta, boa do Jesus mangaloha tembok pemisah i jala paulihon jambatan i? sian turpuk on taida ma i marhite na rade ibana mamolus sian luat Samaria jala laos rade mamangkulingi boru Samaria i. Jala laos marudut ma panghataion i sahat tu na dipatorang Jesus taringot tu aek hangoluan dohot hadirion ni boru samaria i. Sian gombaran di sumur i, taida do boa sada baoa halak Jahudi marsaor, manghatai dohot sada boru Samaria naso hea masa dope dihatiha i. Hata "tongka" disesa Jesus marhite hatoruhon ni rohaNa mamangkulingi boru Samaria i. Disisi na asing taida ma gombaran na rap mian Debata dohot jolma pardosa di sumur i, pataridahon basabasa ni Debata tu pardosa. Ihut tusi taida do nang sada gombaran na rap mian nabadia (Jesus) dohot halak na ramun dipangalaho  (parompuan Samaria i). Ai di ayat na mangihut dipatorang do naung lima hali mardongan saripe jala baoa na rap dohot ibana ditongki ndada dongan na saripe (ay.18). 

Dison ma tangkas taida inisiatif ni Debata do mamulai paulihon jambatan i. Ai Jesus do parjolo mamangkulingi parompuan i, bahkan tung dipatutoru Jesus do dirina marhite na mangido aek  sian parompuan i. Sian on, natape diboto Jesus do parange ni boru samaria i, alai dang pintor diuhumi ibana boru Samaria i. Dihata saonari dang di bully Jesus boru Samaria i, alai dipangulingi marhite na mangido aek. Mamungka panghatiaon dengan menempatkan perempuan Samaria i diposisi na berharga. Alani i huria ni Tuhan, manang didia hita naeng mangaloha tempbok pemisah jala pajongjong jambatan parsaoran taulahon ma i dibagasan haserepon niroha dibagasan percakapan personal, manghatai roha tu roha, jala unang mulai marhite na manguhumi, membully alai menempatkan mereka dalam posisi yang berharga. Ise na mamulai? metode ni Jesus sarupa do torus, halak na badia, na sintong ido na gabe pionir ni pardengganan.

Pamalum Hailaon VS Pailahon

Huria ni Tuhan na hinaholongan dibagasan Jesus Kristus,

Sada na ringkot laho mangaloha tembok pemisah jala pajongjong jambatan parsaoran ima pangalaho na rade pamalum hahurangan ni dongan na mambaen hailaon, jala pasiding parange na pailahon dongan. Diturpuk ta on, tung tangkas do i taida. Molo tapamanat rupani boasa ma ingkon di hos ni ari i ro boru Samaria i tu sumur i? ndada somalna manogot manang dibotarina do angka boruboru ro tu sumur manahui aek asa lambok ari jala asa adong donganna didalan nang disurmur i manghatai? Dapot suraon do, hinorhon ni kondisi ni parripeonna na sodenggan, gabe maila ibana rap donganna boruboru na asing tu sumur i. Sialani i, sasadasa ma ro jala tongon tonga ari. Maila ibana jala laos maus diparsaoran nang dipartondion pe. Ai ise naso magopu rohana molo sai dipasiding? ise naso mandate molo sai holan ibana sandiri na mangolu? dapot botoon ni Jesus do uas ni roha na i, ido alana dang dipasiding Jesus Ibana. Baliksa diantoi Jesus jala diargahon Jesus songon sada boruboru na talup marsilehonlehon. Ai dijalo Jesus aek i sian ibana.

Molo taihuthon sude panghataion ni Jesus dohot boru Samaria i gabe dihatindakkon ibana do Jesus i tu donganna sahuta jala gabe torop halak Samaria na porsea ala dihatindakkon boruboru i (ay. 28-29; 39). Halak na maila hian patudu diri tu situan natorop dihuta i, dung pajumpang dohot Jesus ibana sandiri na patudu dirina tu natorop i. Halak na maila alani sandok pambahenna gabe diingot songon sada parompuan parbarita nauli na mamboan torop halak Samaria porsea tu Jesus. Malum ma hailaonna, jala dang adong na pailahon ibana be.

On ma naneng siulahononta dipardanlan ni ngolu ni huria on tu angka ari nanaeng ro. Unang ma tatahi laho pailahon halak ala ni angka na humurangna, alai tatogu nasida ruar sian hahurangan i asa tung malum ila ni rohana. Unang tahi laho paburukburuk halak ditonga ni keluarga, huta, lumobi ma nang huria. Ai dirim sandiri do angka na dihuria i songon pamatang ni Kristus. Lumobi ma tahe unang ma ala ni parangenta gabe maila manang tarurak huria on ditonga ni masyarakat. Molo tapaihutihut do nean saleleng on, anggo goar ni huria on boi dohonon angur do dinahumalian. Alani i, diulang tahun pa 17 on, tarjou do hita ganup baik parhalado, majelis, nang ruas ni huria asa taloha nagka tembok pemisah naadong asa unang nian ala ni parangenta gabe tarurak huria on ditonga ni masyarakat. Songon panjanghonon ni Jesus diboru Samaira na ramun i, tajanghon ma nang angka dongan na marhahurangan namarsala jala tatogu gabe dongan saolaun marbarita nauli. Unang nian ala ni sikapta gabe parbarita na roa angka donganta na marhahurangan nang na marsalah i ditonga ni masyarakat. Ingot ma hita haru Jesus rade manjangkon na mardosa, lam ma hita?

Menyeimbangkan Logika dan Perasaan

Huria ni Tuhan na hinaholongan dibagasan Jesus Kristus,

Menarik do mamparateatehon boa parghatiaon ni boru Samaria i rap dohot Jesus. Dang sai pintor hatop parompuan i mangolohon pandohan ni Jesus sai jumolo do disungkun ibana ala dang haru yakin ibana rupani tuangka na binegena. Dihata saonari sai jolo dikonfirmasi ibana do hasintongan ni hata na binegena. Lehon Ahu Minum, ninna Jesus; didok ibana boasa manjalo tapian ho sian boru samaria? didok Jesus muse naeng lehonna tu ibana aek na mangolu; didok ibana; Tuan tahutahu gari soada diho, tole bagas do sumur on, tung sian dia ma tu Ho aek na mangolu? Dikonfirmasi ibana di pandohan ni Jesus ai songon naso masuk akkal pandohan i. Dipangke ibana do logikana, boa ma tutu bahennon ni Jesus mangalehon aek na mangolu haru tahutahu ndang adong di ibana? ihut tusi gabe emosional ma ibana muse marhite na mandok: Tung umbalga ma Ho asa ompunta si Jakkop, na mangalehon sumur on di hami? Mangalusi i dipatorang Jesus ma beda ni aek hangoluan dohot aek na adong disumur i. Sai mangulahi mauas do nasa na minum sian aek on. Alai namanginum aek silehononki nasotupa mauas be rodisalengnilelengna. Ai anggo aek silehononki, gabe mual do i dibagasan ibana, na mabaor sahat ro di hangoluan nasaleleng nilelengna.

Marhite na sai dikonfirmasi boru Samaria i angka na binegena, bolas do ibana dapotan panorangioan na sintong sian Tuhan Jesus taringot tu aek hangoluan i. Pandohan Alai namanginum aek silehononki nasotupa mauas be rodisalengnilelengna. Ringkot taparateatehon pandohan manginum namarharoron sian hata pineto namarlapatan minum terus menerus. Marlapatan doon dibagasan parsaoran/percakapan terus menerus dohot Debata. Parsaoran/percakapan na manongtong dohot Debata ido mambahen hita ndang uasaon be dihangoluan. Alani i, diari ulang tahun ni huria on, tapahot ma dirinta marsihohot diparsaoran na rosuk dohot Debata. taseimbanghon ma haporseaon, logika, dohot persaaan emosionalta dipardalanan ni ngolu. Unang sai holan na perasaan, emosianal na tapajolo, alai ringkot do logika berpkir asa unang muramura manangkup, manhaporsea i, jala menyebarhon sada barita andorang so dikonfirmasi dope.

Aek hangolouan na jinalo ni boru samaria i sian Jesus ima hatana na badia i do natalup mambahen ibana porsea, gabe parbarita nauli, jala dapotan hamalumon sian sude dosa nang hailaonna. lambok ma panghilaanna, dang harsean be ai nungga mian diibana mual na mangolu i.

Huria ni Tuhan na hinaholongan dibagasan Jesus Kristus,

Diulangtahun pa 17hon on, ringkot ma hita marujiruji tupudi, boa dipardalanan ni ngolu ni huria diado na gumodang parbue ni huria on, angka na mambahen halombohon/kesejukan/kelegaan do mannag kegerahan/harsean do? Songon ruas ni huria hita, dia ma na tapatupa paro halombohon do tunahumaliang manang mambahen dongan gabe harsean? Mangihuthon turpuk on, tatiru ma Tuhan Jesus asa gabe gareja nang ruas ni huria na paro halambohon pasiding naharsean sian ngolu ni na humaliangta.  Aek hangoluan naung tajalo sian Tuhan Jesus ingkon baorhononta do nang tu humalinag ta marhite na rade hita mangalohai tembok pemisah, rade paulihon jambatan parsadaan/parsaoran, rade mangurupi dongan malua sian hailaon jala pasiding diri sian pangalaho nanaeng pailahon dongan nang huria, rade manjangkon angka na marhahurangan jala mangurupi nasida malua sina hahurangan i, rade mangurupi dongan asa gabe parbarita na denggan unang parbarita na roa, rade mengkonfirmasi angka barita unang asal dibondut jala disebarhon, rade geb siboan halambohon andul ni hamuruhon dohot na harsean. Boa carana asa boi taulahon i? Mian hita dibagasan Jesus, aek hangoluan i. Marsihohot marsaor dohot Jesus i, tahauasson nang hataNa. amen